YUNIRÜBO RHIMO 18
18
Korint ching
1Ha dunglim apinü Athen chingnü chamachihbah Korint ching yü. 2Tüsho apinü Pontus chingnü asürükhi Jihudarü amung Aquila, aniube Priscilla bebah Itali chingnü ashude arükhi ngü, tümütüsho Klaudianü Jihudarü alala Rom chingnü atsopü thiyukhüm jih. Tüsho apinü ane shorupü yü; 3tümütüsho ane nangde api she khimyam-thsürü lamonü ane lung rhimode mung. 4Apinü sinagog ching Amuni aban atsangachih tüsho Jihudarü le Greekrü mushuyukpü mürang.
5Küyimki Sila le Timothi büne Macedonia chingnü arükhea, Paul a Jisu ju Khrista lakheah de Jihudarü ki thiyumütsan thsüde thsangyuthsangrade alakheah. 6Tüsho küyimki arünü api azhihde aluhkhea, apinü akhim chingnü asungthulung dütrüna bahde arü ki tha, “ Nüsa thiyih nüsa kubo kheak lashang! Inü a tümü mümükheah. Kheakü I khiungkerü kilim yübah.” 7Apinü ju chingnü chamachihbah Thrünpuh kingaünrü Tita Justa yam ching yü; api yam ju sinagog ki lakheah. 8Sinagog yakzanshuhrü Krispanü api yamkhün alala bede Atungpuh kheak kin; tüsho Korintrü ahihkhühnü Paul ki anibah kin tüsho bapti. 9Tüsho tsüngre khülang Atungpuhnü Paul ki michih chingnü tha, “Dütre, tüshe asukang tüsho zhikde düla; 10tümüde I nü lung lah, tüsho mihtsürü shenü she nü trünthsüpü mukuk; tümüde ha kiuto ching I mihtsürü ahihkhüh lah.” 11Tüsho apinü arü bolung Thrünpuh yu thsangyude kam khülang kheak khinu thuruk la.
12Tüshe küyimki Gallio ju Akaia kovünor lakhea, Jihudarünü arihbah Paul ram tüsho mahkhappung ching bedarü. 13Arünü tha, “Ha mihtsürünü yakzan azhihde Thrünpuh kingaünshihpü mihtsürübo münityukchoh.” 14Tüshe küyimki Paulnü thiyu thapü thsükhea, Gallionü Jihudarü ki tha, “O Jihudarübo, ha amülim yungsho athsümünim dünkheak thsükhülaa inü nüsa ki anipü kuklah; 15tüshe ha a thiyubo le mungbo tüsho nüsa yakzan dünkheak a le nüsa küdah thsüde khikzhakang: inü harü dünkheak a mahmükhap.” 16Jumonü apinü arübo mahkhappung chingnü yankhitabah. 17Tüsho arü alalanü sinagog yakzanshuhrü Sosthena rambah mahkhappung kinü king. Tüshe Gallionü ju rheakashe mükheah.
Antiok lim Yülokhi
18Ju dunglim Paulnü nimung ashang mung, tüsho keoniorübo zojihbah api lung Priscilla tüsho Aquila bebah sangkung chingnü Siria lim yü. Mütsahmusuyide apinü Kenkrea ching ku hüt, tümüde apinü thiyuchihchima lakheah. 19Arüsam Efisia ching arü, tüsho apinü ane ju ching zojih; tüshe api a sinagog ching yüzahbah Jihudarübo ki atsangachih. 20Küyimki arünü api ki aruhkhüh mungpü thakheanü apinü reanglo; 21tüshe arü chamachihde apinü arü ki tha, “Thrünpuhnü mulongsho I nüsa kilim alode arübah,” tüsho apinü Efisia chingnü tsahmusu.
22Küyimki api Kaesarea khiungkhea, apinü wutubah borü ki salüm tha, tüsho Antiok lim yüki. 23Apinü ju ching anükhüh kheak bin tüsho Galatia tüsho Phrygia lomi dangpung khülang chingnü püpü ching yüde akinrü alala düküngshih.
Apollo Efisia tüsho Korint ching
24Kheakü Alexandria chingnü asürükhi Jihudarü amung Apollo ju Efisia ching arü. Api thiyu thasorü tüsho amüsühyu tsüde mükheahde alakheah. 25Api ju Atungpuh limro ching thsangdana lakheah, tüsho apinü Johannü baptikhi lang mükheah-a lalashe me ching düküngde Jisu dünkheak tha tüsho thsangyu. 26Apinü mulong tode sinagog ching thapü tankih; küyimki Priscilla le Aquila bünenü api dünkheak sokhea, anenü thüyam ching bede yübah Thrünpuh limro alü thsüde api ki lungkide thanaka huh. 27Tüsho küyimki apinü Akaia lim hode ayüpü mulongkhea, keoniorübonü api mulong toshih, tüsho api leangkhipü akinrübo kilim thrüt. Küyimki api akhiungkhea, mihmüthsüm hode akinrübo apinü tode rung, 28tümüde apinü amüsühyu huhde Jisu ju Khrista ah de boto chingnü Jihudarübo müzhakde kukabah.
Currently Selected:
YUNIRÜBO RHIMO 18: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
