YUNIRÜBO RHIMO 19
19
Paul Efisia ching
1Küyimki Apollo Korint ching lakhea, Paulnü akulim lomi hode Efisia ching arü. Ju ching apinü jingyanrü khürü ngü. 2Tüsho apinü arü ki tha, “Nüsanü akinchoki Amüsüh Me leangkhidü shi?” Arünü alo, “Yung, Amüsüh Me lah de isanü küyimkishe muso.” 3Tüsho apinü tha, “Dale tüsho nüsa tümü ching baptikhea?” Arünü alo, “Johannü baptikhi ching ah.” 4#Mt 3.11; Mk 1.4,7,8; Lk 3.4,16; Jhn 1.26,27Tüsho Paulnü tha, “Johannü api dunglim arükhi Jisu kheak kinpü mihtsürübo ki thade, mulong müthride baptijihkhi lakheah.” 5Ha sobah arünü Atungpuh Jisu mung chingnü bapti. 6Tüsho küyimki Paulnü arü kheak akhah nimkihkhea, Amüsüh Me arü kheak arü; arünü püpürü yuthabo chingnü thade müchit. 7Arü mihtsürü 12 bande alakheah.
8Apinü sinagog ching yüzah tüsho Thrünpuh kiulongthsü thsungkheak khinu mahsam mulong tode tüsho kukde atsangachih; 9tüshe küyimki khürünü mulong müküpde tüsho mükinde amukhungrü miki amütsü limro asukkhea, apinü jingyanrü bea lubah akhin tüsho nimung aban Tyranna khiunglün-yam ching atsangachih. 10Ha kam mahne mutuklode yü, junangde Asia ching larü alala, Jihudarü tüsho Greekrü chidonü Atungpuh yu so.
Seva Tsührübo
11Tüsho Thrünpuhnü Paul khah hode khinthiyinbebo kihode rhimo, 12junangde apinü ashuhkhi shokenanbe yungsho khimnunupübo lude tukthsürü kilim yü, tüsho arü kheaknü tukthsübo ngu tüsho amünean mebo wukhiuk. 13Jihudarü khürü amünean mebo yankhitde atsahrünü Atungpuh Jisu mung tampü mürang. Arünü amünean mebo ki tha, “Paulnü thsangyuthsangrabuh Jisu mung chingnü inü nü ki thiyukhüm jihchoh.” 14Jihudarü achangbe amükeamrü Seva tsührü thünenü ha rhimode alakheah. 15Tüshe amünean menü arü ki alo, “Jisu tüsho Paul inü mükheahlah; tüshe nüsa sherü a?” 16Amünean me yüzahkhi mihtsürünü müküpde arü yande müsham tüsho arü alala kukabah. Arübo api yam chingnü yuria bünkeang akhiuk. 17Tüsho Efisia ching larü alala, Jihudarü tüsho Greekrü chidonü ha so; tüsho arü alala trede kam; tüsho Atungpuh Jisu mung wüntrede kam. 18Akinrü ahihkhühnü arünü arhimokhi boto mikinü thakhitde arü. 19Tüsho wurük-huhrübonü arü hümbo hanmukhungde arübah boto mikinü takabah; tüsho jurü adün khekhi ju shotoyinchi nak 50,000 akhiuk. 20Junangde Atungpuh yu ju wu lade akuk ngüde bude yü.
Efisia ching Alanaji
21Harü dünjishu Paulnü Macedonia tüsho Akaia hode Jirusalem lim yüpü lümkihde tha, “I ju ching yüshu, inü Rom she rhuakheahbeah.” 22Tüsho apinü anihbuh rungrü mahne Timothi le Erasta Macedonia lim yüshihbah api a anükhüh kheak Asia ching la.
23Ju kim ching Atungpuh limro dünkheaknü Efisia ching alanaji akhiuk. 24Shotoyinchi-kingrü Demetrianü Artema thsungkheak shotoyinchi arüngyam thsüde rhimorübo kilim alü ato hande arüjih. 25Apinü arü nangde arhimorübo alala rukhüh jihbahle tha, “Mihtsürübo, ha rhimo chingnü isa lakhit lah de nüsanü mükheahlah. 26Tüsho Efisia ching lang yungde Asia alala ching Paulnü, khahbonü athsükhi thrünpuhbo a thrünpuhbo yung de thade mihtsürü ahihkhüh münityukde atsokhi nüsanü ngülah tüsho sochoh. 27Junangde isanü arhimokhi mungchih ngüpü lah. Kheaküshe atrebe lakhi ju Asia tüsho alomiküp alala ching kingaünkhi Artema arüngyam akeangkeang kambah tüsho anihbe thukhi thsümünimbah.”
28Küyimki arünü ha sokheanü bukakhiuk tüsho zhi, “Efisia yo Artema ato ah!” 29Jumonü kiuto ju ayingyingnü mide kam; tüsho arünü khiunglün-yam ching nanachihde yüzahbah Paul lung tsahkhi Macedoniarü Gaia tüsho Aristarka arü lungnü yankhit. 30Paulnü boto ching yüzahpü mulong tüshe akinrübonü api yanlo. 31Api müyamrü lomi torübo khürünü khiunglün-yam ching anihbuh muhuhpü mushude thiyusheak mühah. 32Kheakü khürünü khülang tüsho püpürünü püpü zhi; tümüde amukhung ju ayingying ching lakheah, tüsho arü tümü thsüpü mukhungkheanü ahihbenü mümükheah. 33Boto ching khürünü Alexander kheak kihlah de tha, tümüde Jihudarübonü api mikhuh ching arüshih. Tüsho Alexandernü mihtsürübo zhipdode malanshihpü api khah niuk. 34Tüshe küyimki arünü api ju Jihudarü ah de amütsankhea, kimkhü 2 bande arü alala düsheak rukhühnü zhi, “Efisiarü yo Artema ato ah!” 35Küyimki kiuto mütsanmükühbuhnü boto danlokhea, apinü tha, “Efisia mihtsürübo, Efisia kiuto ching ato Artema lakhi tüsho thüning chingnü akikhi anihbe mejak lakhi shenü mümükheahkhi la? 36Jumonü harü ju müdanlokhukbe a le, nüsanü zhikde laang tüsho makhade daphean. 37Tümüde nüsanü harü mihtsürü isa arüngyambo yungsho isa thrünbe mükhemükim müthsürü bede arüa lah. 38Jumonü Demetria tüsho api lung rhimorü khürü azhihde atsangkhi lasho, mahkhappungbo khimshuh-a lah, tüsho atorübo lah; arünü ju ching atsangpü kuklah. 39Tüshe nüsanü tümükhüh alü yimpü lasho, ju boto mukhungde alakhi ching khikzhakbah. 40Tümüde khihni ha dünjiabahshu, alanajikhi dünkheak isa mudopü lah. Ha alanaji dünkheak atsokhipü müla, tümütüsho ju thsungkheak amütsan tümü müla.” 41Ha thabah apinü amukhungrü müzütshih.
Currently Selected:
YUNIRÜBO RHIMO 19: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
