YUNIRÜBO RHIMO 20
20
Macedonia tüsho Akaia lim
1Alanaji kheam dunglim, Paulnü akinrübo jimukhung tüsho mulong tuthsukyu thabah arü ki chode thsü. Jushu apinü chamachihbah Macedonia lim yü. 2Küyimki apinü harü alala ching yüde mulong tuthsukyu ahihdo thakhea, apinü Greece ching arü. 3Apinü ju ching khinu mahsam mung, tüsho api Siria lim yüpü lachoki, küyimki Jihudarübonü api azhihde arhimokhea, apinü Macedonia hode ayüpü lümkih. 4Pyrrha tsührü Berearü Sopaternü api atru; tüsho Tesalonikarü Aristarka tüsho Sekunda; Derberü Gaia tüsho Timothi; tüsho Asiarü Tykika tüsho Trophima. 5Harü mihtsürü akhuhde ayürünü Troa ching isa aleangde la, 6tüshe phaüm muyukkhi thünio dunglim isanü Filipi chingnü yü tüsho nimung phüngü dunglim arü kilim Troa ching arübah ju ching nimung thüne mung.
Paulnü Akheam Thsüde Troa Rhuakheahkhi
7Amu-khip akhuhbe nimung, yikhap yihnakpü isa rukhüh mukhungchoki, Paulnü ashidopü chamachihpü lümde arü ki asukachih; tüsho apinü tsüngphulung khiungde asukachih. 8Isa mukhunga lakhi akube khiungshak ching ju tsünpung ahihdo taka lakheah. 9Tüsho athrününgtsüng mihtsürü amung Eutika ju ayinripit ching binde alakheah. Paulnü ruhde athachoki yapshede yü; yapshea lakhi hode rünkih mahsampü kheaknü ayokhi tüsho shea shuhmusu. 10Tüshe Paulnü yükibah api kapkih-a lubah tha, “Darhungangüm, tümüde api arhang ah.” 11Paulnü arünkihkhi lim yükihlobah yikhap yihnak tüsho tsüh. Apinü ayinkhi khiungde asukachihbah chamachih. 12Arünü athrününgtsüngbuh ju arhang kama bebah tso, tüsho khide mulong sühakhim ngü.
Troa chingnü Mileta
13Tüshe isanü Paul beyuka lupü thsüde akhuhlimnü sangkung lim yübah Assos lim yüpü tsahmusu; tümüde api a alo kheaknü yüde alakheah. 14Küyimki apinü Assos ching isa shorukhea, isanü api sangkung kheak bekih-a bebah Mitylen ching arü. 15Tüsho isanü ju chingnü tsahde ashidopü Kios ki arü; ju shidopü isanü Samos khiung; tüsho ju shidopü Mileta ching arü. 16Tümütüsho Paulnü Asia ching kim mübahpü thsüde Efisia tsahhopü pungkhi; tümüde apinü akuk thürün thünimni-thünio nimung Jirusalem khiungpü niokheam.
Efisia Azothsürü ki Paul Achamyu
17Tüsho apinü Mileta chingnü Efisia ching yüshihbah api kilim borü azothsürübo jide arüshih. 18Küyimki arübo api ki arükheanü apinü arü ki tha: “I Asia ching jing düküyukkhi atan nimungnü nüsanü mükheahlah; 19Jihudarünü azhihde rükaki tode lalashe azhihayihde tüsho chike bukde inü Atungpuh tankih; 20nüsa alü thsüpü lakhi thsangyuthsangrapü tümü she inü mudukiuhlo tüshe boto chingnü tüsho thüyam abande nüsa thsangyude, 21mulong müthride Thrünpuh kilim rholopü tüsho isa Atungpuh Jisu kheak akin lashihpü Jihudarü tüsho Greekrü chido ki inü thiyumütsan thsü. 22Tüsho kheakü Menü reangkih-a, I kheak tümü dünjibanü mümükheahde Jirusalem lim yüchoh. 23Kiuto aban rihyam ching lapü tüsho küpkhuk shorupü Amüsüh Menü athakhi lang inü mükheahlah. 24#2 Tim 4.7Tütüshe, inü alihpü bansho tüsho Atungpuh Jisunü I kilim jihkhi rhimo Thrünpuh amüthsüm thiyusheak-atsü lang she bansho, inü I rhangdung tümü thülünde mülüm. 25Tüsho kheakü kheahang, inü nüsa bolung kiulongthsü thsangyuthsangrakhi alalanü I miro müngülo. 26Jumonü nüsa alala thiyih dünkheak I amütsan müla de khihni inü nüsa ki khipkhitchoh, 27tümüde inü nüsa ki Thrünpuh lümkhi alala zhiyukpü müdukiuhlo. 28Nüsa le Amüsüh Menü nüsa aheangrü kamshihkhi namfimihnu boto tüsho api tsührü thiyih hode nihbuh yo kamkhi Thrünpuh borü kümpü kurhangang. 29I chamachihshu namfimihnu boto maningshihpü rimre amütsü nüsa bolung arübah de inü mükheahlah; 30tüsho nüsa bolungnü she akeangyu thaa akinrübo arü dunglim yüshihpü mihtsürü akhiukbah. 31Jumonü kurhangang tüsho chike bukde, animung tüsho are kam mahsam nüsa mihbüm aban thsangyukhi lümkhitang. 32Kheakü inü nüsa zokihshihpü tüsho tsangkhita larü alala bolung yamrüplurüp lupü api amüthsüm kilim shuhmülanga jihchoh. 33Inü she yo shotoyinchi, suna yungsho khimmih mümürühde lado. 34I tüsho I lung larü yihnüpü lakhi thsungkheak I khahnü rhimodo de nüsanü mükheahlah. 35Inü arhimokhi alala ching, hanangde mürangde arhimokhinü reangmüzahrü isanü arungbeah de, ‘Aleangkhikhi kheaknü ajihkhi alü müngühmühi,’ de Jisunü athakhi lümkhitde nüsa ki huhdo.”
36Küyimki apinü ha thakheanü khukning tüsho arü alala lungnü tamkhüntamnü. 37Arü alalanü trip tüsho Paul kapde müthsüp. 38Arünü api miro müngülo de athakhi hode arü khide mulong thsümünim. Tüsho arünü api sangkung ching bedarü.
Currently Selected:
YUNIRÜBO RHIMO 20: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
