YUNIRÜBO RHIMO 26
26
Paulnü Agrippa miki Thakhi
1Agrippanü Paul ki tha, “Nü thsungkheak thapü nü ki mülülah.” Paulnü akhah chungkih tüsho adün chilode tha:
2“Kiulongthsüpuh Agrippa, I nü miki lakhi kuhi atsü ah de inü lümlah, Jihudarünü müdamkhi alala inü khihni thabah, 3tümütüsho Jihudarü yakli tüsho marüpkhibo alala nünü mükheahlah; jumonü I ki arümde anijihpü inü nü ki mushuchoh.
4“I athunuchokinü I rhangdung yakli, I trükshihbo lung tüsho Jirusalem ching lachokinü Jihudarü alalanü mükheahlah. 5#Yunir 23.6; Fil 3.5Arünü mütsanpü mulungsho adüsonü I mükheahlah, junangde adanyukkhi isa kingaün yande I a Pharisirü thsüde lado. 6Tüsho kheakü Thrünpuhnü isa jipürübo ki alokhikhi ching mulonglamde thiyukhap ching I zhiplah. 7Arünü azhihayihde azhing ayin Thrünpuh tankihde alachoki isa trük thürükheak mahnenü angüpü mulonglamkhi ju ha lah, O kiulongthsüpuh ha mulonglam dünkheak Jihudarünü I müdamchoh. 8Tümüde nüsa khürünü Thrünpuhnü asherü asürüshihkhi amukukbe nangde lümcho?
9 #
Yunir 8.3; 22.4,5 “Nazarethrü Jisu mung azhihde ahihdo rhimopü inü she alümkheah. 10Tüsho inü junangde Jirusalem ching rhimo; amükeam putungrübonü mülükhi hode inü amüsührü ahihkhüh rihyam ching zo, tüsho küyimki arü sheshihkheanü arü azhihde inü hehuh thsü. 11Inü ahihkhüh ki sinagogbo alala ching arü thsümüchi; tüsho arü athruajipü mürang. Arü kheak I bukakhiukde inü arübo khiungkerü kiutobo ching she thsümüchi.
Paulnü Mulong Müthrikhi Thakhi
(Yunir 9.1-19; 22.6-16)
12“Hanangde amükeam putungrü thiyukhüm-sühmüh hode inü Damaska lim hantsah yü. 13O kiulongthsüpuh, animuro thüning chingnü ani kheaknü ayinbe ayin khülangnü I tüsho l lung hantsahrü mükamde tah. 14Tüsho küyimki isa alala alo kheak keamkhea, Ibri yutha chingnü I ki thakhi düsheak inü so, ‘Saul, Saul, tümüde nünü I thsümüchicho le? Tso-mulobo kheak mükhepü ju nü yuribah.’ 15Inü tha, ‘Nü she a, Atungpuh?’ Tüsho Atungpuhnü alo, ‘I ju nünü athsümüchikhi Jisu ah. 16Tüshe asürübah nü jingnü zhipang; inü nü tankihrü khülang thsüpü tüsho nünü angükhi le inü nü ki huhpü lakhi thiyumütsan thsüpü mokhitpü nü ki akhiukkheah. 17Inü nü mihtsürübo tüsho khiungkerü kheaknü nü bekhitbah. Inü nü arü kilim yüshihkhi ju 18arü mükbo khimshuhbah amiting chingnü ayin lim tüsho Arimri wu chingnü Thrünpuh kilim rholoshihpü lah, junangde arünü neak bahkhi tüsho I kheak akin hode atsangkhitkhi nüsa bolung lapung leangkhibah.’
Paulnü Api Rhimo Thakhi
19“Jumonü, O kiulongthsüpuh Agrippa, inü yinmi michih ki manide müla, 20#Yunir 9.20,28,29tüshe akhuhde Damaska ching larü ki, jushu Jirusalem le Judea lomi alala ching, tüsho khiungkerü ki arünü mulong müthride Thrünpuh kilim rholobah ju thülünde rhimo rhimopü thsüde thsangyuthsangra. 21Ha dünkheaknü Jihudarünü arüngyam ching I ram tüsho alaksahpü mürang. 22Khihni khiungde Thrünpuh kilimnü arükhi arung lah, junangde püpü thsungkheak müthade wukihrübo tüsho Mosanü athakhi dünjipü lakhi anini tüsho ato chido ki inü thiyumütsan thsüde zhiplah: 23#1 Kor 15.20Khrista ju thsünübah, junangde akhuhbe thsüde asürübah apinü Jihudarü tüsho khiungkerü chido ki ayin zhiyukbah.”
24Tüsho apinü hanangde chiloshu, Festanü düsheak achangnü tha, “Paul, nü abünrü ah; nü mükheah atonü nü abünrü kamshihchoh.” 25Tüshe Paulnü tha, “I abünrü yung, khide mungto Festa, tüshe inü mütsande thiyuro thachoh. 26Tümüde kiulongthsüpuhnü hadürü dünkheak mükheahlah, tüsho inü nü ki zuzu thsüde thachoh; nünü harü aban mükheahdo de inü mütsanlah, tümüde hadürü amühit ching ramde mürhimo. 27Kiulongthsüpuh Agrippa, nünü wukihrübo kincho shi? Nünü kinchoh de inü mükheahlah.” 28Tüsho Agrippanü Paul ki tha, “Nahde nünü I Khristan kamshihpü lümcho de?” 29Tüsho Paulnü alo, “Kim khihang yungsho shangang, harü arhükkhibo kheak hode, nü lang yung tüshe khihni I ki anirü alala I nangde akampü inü Thrünpuh ki tamkhüntamnüchoh.”
30Judüki kiulongthsüpuh tüsho kovünor le Berni tüsho arü lung binrünü wusu; 31tüsho küyimki arübo tsokheanü arü khülangnü khülang ki thaachih, “Ha mihtsürünü ashepü yungsho aramyukpü thülünde tümü mürhimo.” 32Agrippanü Festa ki tha, “Apinü Kaesar khiungde mümushukhülaa ha mihtsürü dükhea labeah.”
Currently Selected:
YUNIRÜBO RHIMO 26: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
