YUNIRÜBO RHIMO 27
27
Paulnü Rom lim Yükhi
1Tüsho küyimki isanü Itali ching yüpü pungkhikhea, arünü Paul le aramrü püpürü khürü Augusta Bonungrü atorü Julio kilim jih. 2Jumonü Adramittium sangkung ching yüzahbah isanü Asia keyeannü bede ayüpü keto ching yüzah. Tesalonika ching lakhi Macedoniarü Aristarka isa lung bekheah. 3Tüsho ashidopü isa Sidon khiung. Julionü Paul ki muzhode rhimo, tüsho api yihnüpü lakhi arünü ajihshihpü thsüde api müyamrübo kilim yüpü mülüjih. 4Isanü ju chingnü Saipra alamme khüp yü, tümütüsho apungnü isa kheak yünlode alakheah. 5Tüsho küyimki isanü Kilikia le Pamphylia phüni keto hode ayükheanü Lysia ching lakhi Myra ching arü. 6Ju ching atorünü Alexandria sangkung khülang Itali lim yükhi ngü, tüsho isa ju ching yüzahshih. 7Isanü nimung ahihdo arünnü yü, tüsho küpkhukde Nida phüni khiung, tüsho apungnü isa yünlokhinü Salmone phüni Krete alamme lim yü. 8Küpkhukde keyean arübah isanü Lasea kiuto phüni binkheampung atsü dangpung ching arü.
9Kim shangde yü tüsho hantsahpü atrebe kam tümütüsho dünthsükhi nimung hoabah. Jumonü Paulnü arü ki tha, 10“Atorübo, isa hantsahkhi thsümütsü labah tüsho sangkung, kukrukbo tüsho isa rhangdungbo kukshah thsüpü lakhi inü ngüchoh.” 11Tüshe atobuhnü Paulnü athakhi anipü müthri aphülapbuh le sangkung putungrünü athsunganahkhi lu. 12Tümütüsho binkheampung ju tsüngkam ching thsungkheak mütsüde alakhinü ahihbenü ju chingnü akhinde Phoenix ching yübah ju ching mungpü tha. Binkheampung ju Krete ching düjing-aniyüzahlim tüsho tuku-aniyüzahlim lakheah.
Keto ching Chinthrüm
13Apung ju thünakde ayünpü tankih, tüsho arü lümkhi kukbah de mihtsürübonü lüm, jumonü arünü sangkung tholobe thokih-a lu tüsho Krete keyean thüninde bede yü. 14Tüshe nahdü lang duku-aniakhiuklim chinthrüm pungnü alo kheaknü yün; 15tüsho küyimki sangkung ju tholobah apung kilim manguhkhukkhea, isanü ju lim rholo tüsho bede yü. 16Tüsho Kauda de ajikhi kekunglo anikhüh alamme khüp tsahde isanü küpkhukde sangkung ju tsüde bekhiung; 17Küyimki mihtsürübonü ju thokihkheanü liubonü sangkung ju rhüklo; arübo Sarti keyean loyi kheak alihde ayüpü trede arünü sangkung-tholobe yüzahshih tüsho sangkung ju bede yüshih. 18Tüsho chinthrüm amütsü lakhi hode ashidopü arünü sangkung chingnü kukruk akükhita bahpü tankih. 19Asam nipü arünü sangkungkukrukbo arü khahnü yihkhita bah. 20Tüsho küyimki nimung ashang ani yungsho chiningbo makhiukkhea, tüsho chinthrüm, mutuklode akamkhea, akheam ching a isa khümkhitpü mulonglam müladebah.
21Mihtsürübo jim müngüde aruhkhüh lashu, Paulnü arü bolung mikhuh arübah tha, “Mihtsürübo, nüsanü I yu anide Krete chingnü mütsahmusupü lado; junangde isanü ha athsümünim tüsho kukshah tsokhipü lakheah. 22Kheakü inü nüsa mulong topü thachoh, tümüde nüsa bolung rhangdung a yung tüshe sangkung lang adükheakbah. 23Tümütüsho shepü yo I la tüsho inü tankihkhi Thrünpuh yunirü yishih I ki zhip, 24tüsho tha, ‘Dütre, Paul; nü Kaesar miki zhippü lah; tüsho Thrünpuhnü nü lung bekhi rhangdungbo alala nü kilim jihdo.’ 25Jumonü mulong toang, mihtsürübo, tümüde inü athakhi nangde adünjipü Thrünpuh kheak I akin lah. 26Tüshe isanü kekung-lo khürü ching rholobeah.”
27Küyimki tsüngre thürükheak phüyipü arükhea, tsüngphulung muro isa Adria behode alachoki isabo alo thüninchoh de sangkung berübonü lüm. 28Jumonü arünü liu kheak mülangde chingkihbah yüzahshih tüsho ke asüklim limthrip 40 lakheah; anükhüh kheak dunglim arünü ju ruk thsü tüsho limthrip 30 sükde alakheah. 29Lungto kheak yünü ashangpü trede arünü adunglim sangkung tholobe phüyi yüzahshih tüsho ayinkhishihpü tamkhüntamnü. 30Sangkung berübonü atsokhitpü yimde mikhuhlim atholobe yihkhitpü nangde rük thsüde sangkung ju keto ching keamyukshihchoki, 31Paulnü atobuh tüsho bonungrübo ki tha, “Mihtsürü harü sangkung ching mülasho nüsa mükhümkhitkhuk.” 32Jumonü bonungrübonü sangkung liubo lipshak tüsho jude yüshih.
33Ayinkhipü lachoki Paulnü arü alala ki tsühyungbe khürü tsühpü mushude tha, “Nüsanü tsühyungbe tümü mütsühde arükhi khihni nimung thürükheak phüyi ni thsüchoh. 34Jumonü tsühyungbe khürü tsühpü inü nüsa ki mushuchoh; hanü nüsa sühmüh jihbah, tümütüsho nüsa shepü ku kheaknü she kuyü bümkhüh she müdükheak.” 35Tüsho küyimki apinü ha thakheanü yikhap lu tüsho alala mikinü Thrünpuh ki makshe jihbah ju yihnak tüsho atsühpü tankih. 36Jushu arü alala mulong tode kam, tüsho arünü tsühyungbe ju tsüh. 37Tüsho sangkung kheak mihtsürü alalanü isa 276 lakheah. 38Junangde küyimki arünü suhdahde atsühkhea, wheat ju keto ching jipa bahde sangkung hiphipde kamshih.
Sangkung Angakkhi
39Küyimki ayinkhikhea, arünü alo mükheahmütsan, tüshe jinyean lakhi kenap arünü ngü, junangde kuksho arünü sangkung ju keyean bedarüpü lümkhi thsü. 40Jumonü arünü sangkung tholobe yihshakbah keto ching yüzahshih, tüsho sangkung-bebe kheak chingkhi liubo trün. Jushu arünü apung lim aku lahkihbah keyean lim yüshih. 41Tüshe sangkungnü loyi mujung kheak dükheahbah juhramde yü; amüngüh lim ju dükheahrambah maphapkhuk, tüsho ke müküpde abükkhinü adunglim ju adütre kamde yihthünak. 42Bonungrü lümkhi ju mutsokhishihpü thsüde aramrübo laksahpü lakheah; 43tüshe atobuhnü Paul khümkhitpü lümde arü lümkhi rhimopü tukloshih. Sherünü phungkhuklanü sangkung kheaknü jukkhibah keyean phungde ayüpü apinü alala ki thiyukhüm jih. 44Aningkhibo ju sangbeak le sangkung yihthünakkhibo kheak lakheah. Tüsho junangde alala tsokhitde alo kheak yü.
Currently Selected:
YUNIRÜBO RHIMO 27: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
