YUNIRÜBO RHIMO 6
6
Arungrü Thüne
1Judüki nimungbo ching akinrübo hihde kamchoki, Greek-yu-tharü Jihudarü le Jihudarü mihkhung dükeak rukachih lakheah, tümütüsho arü khimoberübo nimung aban chamzüchamdo ching bahyukde alakheah. 2Tüsho thürükheak mahnenü akinrü boto jibah tha, “Tsühyungbe adünarapü thsungkheaknü isanü Thrünpuh yu thsangyuthsangra bahyukpü alim yung. 3Jumonü keoniorübo, nüsa bolung mung atsü larü, Amüsüh Me tüsho lümlungnü mide alarü isanü ha rhimo ching zojihpü thsüde nüsa bolungnü mihtsürü thüne mokhitang; 4tüshe isanü tamkhüntamnü tüsho thsangyuthsangrapü khungde arhimobah.” 5Ju thakhinü boto alala asühshih. Tüsho arünü akin tüsho Amüsüh Menü mide alakhi Stephen, Philip, Prokora, Nikamor, Timon, Parmena, tüsho Antiok chingnü khiungkerü Nekola mokhit. 6Arünü harü amüsüh-thsangyurübo miki zhipshih, tüsho arünü arü kheak khah nimde tamkhüntamnüjih.
7Junangde Thrünpuh yu bude yü; Jirusalem ching akinrübo khide hihde kam, tüsho amükeamrü ahihkhühnü akin leangkhi.
Stephen Ramkhi
8Tüsho Stephennü akin tüsho wunü mide mihtsürü bolung khinthiyinbe tüsho amüyinsahbe atobo rhimo. 9Tüshe zuzu ngükhi mihtsürübo sinagog ching kheyukrü Serene le Alexandria tüsho Kilikia le Asia chingnü Jihudarü Stephen kheak atsangde awusupü tankih, 10tüshe apinü Me lümlungnü athakhi azhihde müzhipkhuk. 11Judüki arünü mihtsürü khürü ajuh-a thashih, “Stephennü Mosa tüsho Thrünpuh mükhemükimde athakhi yubo isanü sodo.” 12Jumonü arünü mihtsürübo le azothsürübo tüsho yakzan thsangyurübo thurumusu. Arünü Stephen rambah kiuthsübinkiu miki bedarü. 13Arünü arükchih thiyumütsan jihde tha, “Ha mihtsürünü kamruhroro isa amüsüh arüngyam tüsho Mosa yakzan azhihde athapü mutuklo; 14tümüde Nazarethrü Jisu hanü arüngyam lukbah tüsho Mosa kilimnü arükhi yakli alala müthribah de athakhi isanü sodo.” 15Kiuthsü-binkiu ching binrü alalanü Stephen kheak kheahkihde kheah, tüsho amiro ju yunirü miro nangde ngü.
Currently Selected:
YUNIRÜBO RHIMO 6: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
