YUNIRÜBO RHIMO 7
7
Stephennü Athakhi
1Judüki achangbe amükeambuhnü keokhi, “Harü atsütsü a de?”
2Tüsho Stephennü tha: “Keoniorü tüsho buhrübo, I ki aniang. Api Haran ching mülayide, Mesopotamia ching lachoki, müretahkhi Thrünpuhnü isa abuh Abraham ki akhiuk, 3tüsho api ki tha, ‘Nü lomi tüsho nü keoniorü kheaknü chamachihbah inü nü ki huhpü lakhi lomi ching yüang.’ 4Jumonü apinü Kaldearü lomi bahjihbah Haran ching la. Tüsho api abuh she dunglim, Thrünpuhnü ju chingnü kheakü nüsa lakhi lomi ching api bekhit; 5tüsho apinü ju ching anihbuh kilim amüphü dubopü lang she yamrüplurüp müjih. Tüshe Abraham tsührü mülaa lalashe, apinü anihbuh le adunglim api tsühsoniusobo kilim yamalo jihpü alokhi. 6Thrünpuhnü api ki hanangde tha: Nü tsühsoniusobo khiungkerü lomi ching hanrü thsüde alabah, tüsho arübo kam chi phüyi azhorü thsübah. 7Tüsho arü junokhi trükshih inü mahkhapbah, Thrünpuhnü tha, ‘tüsho ju dunglim arü akhiukbah ha dangpung ching I tankihbah.’ 8Judüki apinü anihbuh kilim tsütabahpü tangzüng jih; junangde Abrahamnü Isak ngü tüsho nimung tizheahpü ching api tsütabah; tüsho Isak kheaknü Jakob trükkhit tüsho Jakob kheaknü jipürü 12 trükkhit.
9“Jakob tsührübonü Josep mükthsüde kambah api Ijip ching yin; tüshe api lung Thrünpuh lakheah, 10api thsümütsü alala chingnü api bekhit tüsho Ijip kiulongthsüpuh Pharao miki amuzho tüsho lümlung jihbah apinü anihbuh Ijip tüsho api yamkhün alala kurungkheak kovünor kamshih. 11Kheakü Ijip tüsho Kanan alala ching khümzung tüsho küpkhuk ato arüchoki isa jipürübo tsühyungbe müngüde alakheah. 12Tüshe küyimki Ijip ching hi lakhi Jakobnü asokhea, apinü isa jipürübo akhuhbe thsüde thiyia yüshih. 13Tüsho mahne kipü Josep ju akeoniorübo ki mükheahshih, tüsho Pharaonü Josep yamkhün mükheahde kam. 14Judüki Josepnü yüshihbah abuh le keoniorübo alala mihtsürü 75 api ki jia lu. 15Junangde Jakobnü Ijip ching yüki; tüsho api le isa jipürübo sheabah. 16Tüsho arübo Shekem lim hanlode arü tüsho Abrahamnü Shekem abuh Hamor ki shonü athulokhi kiuyuk ching bah.
17“Tüshe Thrünpuhnü Abraham ki mülüjihkhi kim thüninchoki, mihtsürübo Ijip ching wüh bu. 18Ashulim Josep mümükheahkhi kiulongthsürünü Ijip ching yakzan shuhpü tankih. 19Apinü isa mihtsürü le isa jipürübo, arü khungarübo asheshihpü thüyam chingnü yihkhita bahpü nimkih tüsho junode rhimo. 20Ju kim ching Mosa zübe, tüsho Thrünpuh miki akhamde alakheah. Tüsho api ju abuh yam ching khinu mahsam mütrü; 21küyimki api yihkhita bahkhea, Pharao tsührübenü bea lubah anihbe tsührü nangde mütrüzo. 22Mosa ki Ijip lümlung alala thsangyu tüsho api ju thiyu tüsho rhimobo ching mungkhung mihtsürü kam.
23“Küyimki api kam 40 azorü lakhea, akeoniorü Israel tsührübo rhuakheahpü mulong ching arü. 24Apinü arü bolung khülang Ijipbuhnü thsümüchide ngübah api rungpü yü tüsho royimjihde Ijipbuh ju laksah. 25Thrünpuhnü api mihtsürü bekhitpü api ahorichoh de anihbuh mihtsürübonü anikhitbah de Mosanü lüm, tüshe arünü manikhit. 26Ashidopü Israelrü mahne rukachihde Mosanü ngübah ane dükeak mungtsü thsüde tha, ‘Mihtsürübo, nüke keoniorü ah; tümüde nükenü yuriachihcho le?’ 27Tüshe shepünü api yamhingbuh müneahde alakheanü Mosa nima bahde tha, ‘Shepünü nü isa kurungkheak yakzanshuhrü tüsho mahkhaprü kamshihkhea? 28Nünü yini Ijipbuh kheak rhimokhi nangde I she alaksahpü künla de?’ 29Ha thakhi sobah Mosanü Midia lomi ching yünü tsotsahrü thsüde la. Ju ching api tsührü 2 lakheah.
30“Küyimki kam yirü hokhea, Sinai Müzüng sunglo, sangrung ching yunirü api ki akhiuk. 31Mosanü ju kheahbah müyinsah; apinü akheahpü thüninde ayülichoki Atungpuh düsheak arü, 32‘I a nü pü pürü Abraham, Isak tüsho Jakob Thrünpuh ah.’ Tüsho Mosanü ajan tüsho akheahpü mümürang. 33Tüsho Atungpuhnü api ki tha, ‘Nü jing chingnü jingkhümpü yihkhitang, tümüde nü zhipkhi dangpung ju amüsüh lo ah. 34Tsükjide Ijip ching arü thsümüchikhi tüsho arü ashekhi inü sodo, tüsho arü bekhitpü I akikheah. Kheakü arang, inü nü Ijip lim yüshihanü.’
35“Ha buh Mosa, shepü arünü, ‘Shepünü nü isa kurungkheak yakzanshuhrü tüsho mahkhaprü kamshihkhea?’ de reanglode athabuh thsü Thrünpuhnü api ki sangrung ching yunirü akhiukbuh khah hode yakzanshuhrü tüsho abekhitrü chido kamde thiyi. 36Apinü Ijip ching, Amürüm keto, tüsho sunglo ching kam yirü khinthiyinbe tüsho amüyinsahbebo rhimode bekhit. 37Mosa hanü Israelrü ki tha, ‘Apinü I bemusukhi nangde Thrünpuhnü nüsa thsungkheak wukihrü khülang nüsa keoniorü bolungnü akhiukshihbah.’ 38Api ju Sinai Müzüng ching api le isa jipürü ki asukbuh yunirü bede sunglo ching amukhungrü lung lakheah; tüsho apinü isa kilim jihpü rhangdung yubo leangkhi. 39Isa jipürünü api ki mihyumanide bahyuk, tüsho arü mulong ching Ijip lim yülode, 40Aron ki tha, ‘Isa müngüh yüpü isa thsungkheak thrünpuhbo thsüjang; tümüde isa Ijip lo chingnü bekhhitbuh Mosa kheak tümü dünjia lanü isanü mümükheah.’ 41Arünü jurü nimungbo ching moshinunu khülang thsü, tüsho sangthsü kilim laksah-a kingaün jihde arü khahnü athsükhi ching asühachih. 42Tüshe Thrünpuhnü rholode tso tüsho wukihrübo hüm ching thrüta lakhi nangde arünü chiningbo kingaünshih:
‘O Israel yamkhün, nüsanü sunglo ching kam yirü shiwühbo laksah-a I kilim jihdü de?
43Nüsanü kingaünpü thsükhi Molek khimyam tüsho Rephan thrünpuh chining han;
tüsho inü nüsa Babilon hode atsoshihbah.’
44“Isa jipürübo sunglo ching ashorupung khimyam lakheah. Ha Thrünpuhnü Mosa ki khuhlangahuhkhi yande thsü. 45Isa jipürünü arüngkhimyam leangkhia lubah Thrünpuhnü arü müngüh yankhita bahkhi trükshih lomi luchoki Jihusua lungnü hanbah yü. Tüsho ju ching David kim khiungde la. 46Apinü Thrünpuh amuzho ngü tüsho Jakob Thrünpuh lapung yimkhitpü keo. 47Tüshe Solomonnü api thsungkheak thüyam thsükheah. 48Tütüshe khide Achangbuhnü mihtsürü khahnü athsükhi yambo ching mülachoh; wukihrünü athakhi nangde, @SPACE =
49‘Yinmi I binkiu,
tüsho alomi I jing-dubopung.
Nüsanü I khilim tümü yam thsüjihkhea,
Atungpuhnü thachoh,
yungsho I sühakhimpü dangpung tümü a?
50I khahnü harü alala thsükhi yung de?’
51“Nüsa achungthülang mihtsürübo, mulong tüsho nükhün ching tsütamübahrü, nüsanü kamruhroro Amüsüh Me reanglochoh. Nüsa jipürübonü arhimokhi nangde nüsanü rhimochoh. 52Nüsa jipürübonü müthsümüchikhi wukihrübo sherü a? Arünü thiyuro-lungki Khülang arüpü zhiyukbuh she laksah. Tüsho kheakü nüsanü api mülapyukde laksah– 53yunirübonü ajihkhi yakzan nüsanü leangkhi tüshe ju mihyumani.”
Stephen Rusahkhi
54Küyimki arünü harü sokheanü arü bukakhiuk tüsho api azhihde arü hü mütrüt. 55Tüshe Amüsüh Menü mide apinü yinmi lim kheah tüsho Thrünpuh müretah tüsho akhah tsülim Jisu zhipde ngü; 56tüsho apinü tha, “Kheahang, yinmi khimshuhkhi, tüsho Thrünpuh khah tsülim Mihtsürü Tsührü zhipkhi inü ngüchoh.” 57Tüshe arünü düsheak achangnü zhi tüsho arü nükhünbo yihdode api kilim nanachihde yü. 58Jushu arünü api kiuto ching bekhit tüsho arupü tankih. Tüsho thiyumütsan thsürübonü arü khimmihbo athrününgtsüngbuh Saul jing ki zojih. 59Arünü Stephen rude alachoki, apinü tamkhüntamnü, “Atungpuh Jisu, I me leangkhiang.” 60Tüsho apinü khukningbah düsheak achangnü zhi, “Atungpuh, arü azhihde ha neak dülümkhitjih.” Küyimki apinü ha thakhea, api sheabah.
Currently Selected:
YUNIRÜBO RHIMO 7: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
