ABEKHIT 1
1
Ijip ching Israelrü Thsümüchikhi
1Jakob tsührübo api lung nihbuh yamkhün bede ayükhi harü lakheah: 2Reuben, Simeon, Levi, Juda, 3Issakar, Zebulun, Benjamin, 4Dan, Naphtali, Gad tüsho Asher. 5Jakob tsührübo alalanü arü 70 lakheah; Josep a Ijip ching lajunga lakheah. 6Kheakü Josep tüsho api keoniorübo le ju lün alala sheabah. 7Tüshe Israelrü wüh bude hihdakde khide sühmüh lade arünü alomi mide kam.
8Ju kim ching Ijip lomi ching Josep mümükheahrü kiulongthsürü khülang asürü. 9Apinü nihbuh mihtsürü Ijiprübo ki tha, “Kheahang, Israelrübo isa kheaknü ahihbe tüsho sühmüh zahbe kamdo. 10Thirithsü akhiuksho arünü isa riri lung bebah isa kheak thirithsübah tüsho isa lomi bahjihbah atsobah. Jumonü arü wüh bukhi zhipdopü isanü limro khürü yimbeah.” 11Jumonü Ijiprübonü Israelrü kurungkheak aputungrü zojihbah thsümüchide rhimo rhimoshih. Tüsho Israelrübonü kiulongthsüpuh yo ahiuharapung kiutobo Pithom tüsho Rameses thsüjih. 12Tüshe arü küdükhüh thsümüchikhea judükhüh alü wüh bude kam, jumonü Ijiprübonü Israelrübo ju trede kam. 13Tüsho Ijiprübonü Israelrübo kheak amuzho mülade thsümüchipü tankih. 14Arünü dujunglo le lotaklung tüsho thulu ching rhimo mungji alala müküpde rhimoshihkhinü arü rhangdung thsünüshih. Arünü rhimo alala ching arü thsümüchide rhimoshih.
15Judüki Ijip kiulongthsüpuhnü Ibrirü zübe-mütrürü Shipra tüsho Pua ane ki tha, 16“Küyimki nükenü Ibrirü khungarü zübechoki mütrübanü khungarü ju athrürü a sho laksahang tüshe aliberü a sho arhang lashang.” 17Tüshe anenü Thrünpuh trekhinü kiulongthsüpuhnü athakhi ju manide khungarü athrürü zübekhibo ju rhangdung lashih. 18Jumonü kiulongthsüpuhnü zübe-mütrürübo ju jibah tha, “Tümüde nükenü tsührü athrürübo rhangdung lashihcho?” 19Zübe-mütrürübonü alo, “Ibri liberübo ju Ijiprü liberübo ruk yung; arünü khide thülihde zübechoh, tüsho zübe-mütrürü khiungchokia zübea lala düchoh.” 20Junangde Thrünpuhnü zübe-mütrürü kheak rhimo tüsho mihtsürübo ju alü wüh bude tüsho khide sühmüh lade kam. 21Zübe-mütrürübonü Thrünpuh trekhinü, apinü arü kilim nihbe yamkhünrübo jih. 22Jumonü kiulongthsüpuhnü api mihtsürübo alala ki thiyukhüm jihde tha, “Ibrirü tsührü aso zübekhi athrürü alala Nile ayung ching shuhyuka bahang, tüshe aliberübo a arhang lashang.”
Currently Selected:
ABEKHIT 1: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
