THRÜNTAN 50
50
1Judüki Josepnü abuh miro kheak hüpkihbah trip tüsho api kheak müthsüp. 2Tüsho Josepnü api yamlarü moli-mükheahrübo ki abuh ju moli mujushihpü thiyukhüm jih. Jumonü moli-mükheahrübonü Israel kheak moli muju; 3moli mujua mushuhshihpü ju nimung yirü lakheah. Tüsho Ijiprübonü api thsungkheak nimung nerü tüzho.
4Küyimki atüzhopü nimung hokhea, Josepnü Pharao yamkhün ki tha, “I nü miki amuzho ngüa lasho, muzhobah Pharaonü sode I ki thaang, 5‘I buhnü I ki thiyuchihchimshihde tha, “Kheahang, I ashepü lah; Kanan lomi ching inü I thsungkheak kiukhi kiuyuk ching nünü I mi bahang.” Jumonü kheakü I wutushang tüsho I buh mi bahanü, tüsho I alode arübah.’” 6Tüsho Pharaonü alo, “Wutuang tüsho apinü nü ki thiyuchihchimshihkhi nangde nü buh mi bahang.” 7Jumonü Josepnü abuh mi bahpü wutu; tüsho api lung Pharao yamlarübo alala, api yam azothsürübo tüsho Ijip lomi azothsürübo alala wutu, 8Josep yamkhün she alala, api keoniorübo, tüsho abuh yamkhün. Arü tsührü aninibo, arü mihnubo tüsho moshibo lang arünü Goshen lo ching zojih. 9Tüsho ju ching api lung khoralolungbebo tüsho khoraberübo wutu, tüsho ju khide hihde mukhunga lakheah. 10Küyimki arübo Jordan hobah Atad rhimopung ching arükhea, arünü khide tode mulong rozhakde tüzho. Josepnü nimung thüne abuh tüzho. 11Küyimki lomi ching larü, Kananrübonü Atad rhimopung ching tüzhokhi ngükhea, arünü tha, “Ha Ijiprü mulong rozhakde tüzhokhi ah.” Jumonü Jordan phüni ju dangpung ki Abel Mizraim#Ijiprünü tüzhokhi. de ji. 12Jumonü apinü arü ki thiyukhüm jihkhi nangde atsührübonü rhimo. 13Tümüde atsührübonü api Kanan lomi ching hande yü, tüsho Abrahamnü mibahpung thsüpü Hitrü Ephron ki thulu bede athulokhi, Mamre müngüh Makpela ching thulu lungkhün ching kiuyukabah. 14Tüsho apinü abuh mi bahshu, Josep tüsho api keoniorübo le api lung abuh mi bahpü wuturü alala Ijip lim alode arü.
Josepnü Akeoniorübo ki Adüngakhikhi
15Arü abuh sheabah dunglim Josep keoniorübonü tha, “Khükia Josepnü isa thraneanbah, tüsho isanü api ki amütsü rhimokhi atsütsünü athrihlopü labah.” 16Jumonü arünü Josep kilim yunithsürübo yüshihde tha, “Nü buh müshechoki, apinü thiyukhüm jih: 17‘Nüsanü Josep ki ha thaang: “Inü nü ki mushuchoh, muzhobah nü keoniorübonü alakmihkhi tüsho arü neak bahjang; tümüde arünü nü ki amütsü rhimodo.” ’ Kheakü muzhobah nü buh Thrünpuh yamlarübonü alakmihkhibo neak bahjang.” Küyimki arü yusheak api ki arükheanü, Josepnü trip. 18Judüki api keoniorübonü she yü tüsho api miro ki mükhüm tüsho tha, “Kheahang, isa nü yamlarübo ah.” 19Josepnü arü ki tha, “Dütre, I a Thrünpuh ah düpü? 20Nüsa thsungkheak a, nüsanü I azhihde amütsü thsükhi lah; tüshe Thrünpuhnü a khihni hanangde mihtsürü ahihdo rhangdung khümkhitpü atsü thsungkheak lah. 21Jumonü kheakü, dütre; inü nüsa le nüsa tsührübo thsungkheak jihchungbah.” Apinü arü mulong shukheam tüsho arü ki muzhode asuk.
Josep Shekhi
22Junangde Josep tüsho abuh yamkhün Ijip ching la. Tüsho Josep kam 110 lakheah. 23Josepnü Ephraim tsührübo lün mahsam khiungde ngü. 24Tüsho Josepnü api keoniorübo ki tha, “I shechoh; tüshe Thrünpuhnü tsükjide nüsa rhua kheahbah, tüsho ha lomi chingnü bekhitde apinü Abraham, Isak tüsho Jakob ki thiyuchihchimkhi lomi ching yübah.” 25Judüki Josepnü Israel tsührübo ki thiyuchihchimshihde tha, “Thrünpuhnü tsükjide nüsa rhuakheahbah, tüsho nüsanü I robo ha chingnü lude awutubah.” 26Junangde Josep kam 110 azorü thsübah Ijip chingnü sheabah; tüsho arünü api kheak moli muju, tüsho kung ching yuk.
Currently Selected:
THRÜNTAN 50: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
