THRÜNTAN 49
49
Jakob Akheam Yubo
1Judüki Jakobnü atsührübo ji, tüsho tha, “Nüsa rukhüh mukhungang, junangde arübe nimungbo ching nüsa kheak tümü dünjipü lanü inü nüsa ki thaanü:
2Mukhungang tüsho soang, O Jakob tsührübo, tüsho nüsa abuh Israel ki aniang.
3Reuben, nü I tsührü adüjibuh,
I sühmüh, tüsho I sühmüh akhuh sangaso,
wüntre ching hodaklah, wu ching hodaklah.
4Nü a düchi nangde lah, tüshe khide adungto mükam,
tümüde nünü I hanniube lung müyam tüsho nü buh yapkiu wüntre müjih. @SPACE =
5Simeon tüsho Levi keonione ah;
athsümünimpü thsühnukbo ju ane nukshangbo ah.
6O I me, arü aramyu asukachihkhi ching düyüzah;
O I me, arü bolung dübe;
tümüde arü bukakhiukkhi ching arünü mihtsürü laksahchoh;
tüsho arü künkhi ching moshipungbo jing lipshakchoh.
7Arü bukakhiukkhi muthrumünean thsang,
tümüde ju amüshak ah;
tüsho arü mulong zhipzhip kheak,
tümüde ju bukmüke ah!
Inü arü Israel lomi ching hiumüzütshihbah,
tüsho mihtsürü bolung müzütshihbah. @SPACE =
8Juda, nü keoniorübonü nü shijihbah;
nü khah ju nü riribo hung kheak labah;
nü buh tsührübonü nü miki khukningbah.
9Juda a kekhüzü nunu nangde lah;
I tsah-a, nü shih limnü alode arüdo.
Kekhüzü nangde apinü züngzhichoh tüsho yapchoh, kekhüzü dreto nangde–shepünü api yihmusukhukba?
10Judanü kiulongthsü tso zhimbah,
tüsho api tsühsoniusobonü kamruhroro yakzan shuhbah.
Trükshihbonü api kilim ruk hande arübah tüsho api miki wüntre jihde khukningbah.
11Apinü anihbuh yo donki nunu kurungasolu atsüdakbe kheak chingchoh,
api khimmihbo yukhu chingnü,api shulünkhimbo kurungasoke-mürüm chingnü amüsühbah.
12Api mükjibo yukhunü mürümlah, tüsho niuhkenü ahü müyelah. @SPACE =
13Zebulun a keto yean labah;
ju sangkungbo zopung thsübah tüsho api aredung ju Sidon kheak labah. @SPACE =
14Issakar a sühmüh lakhi donki ah,
hah mahne dükeak yaplah;
15Tüshe apinü sühakhim dangpung ju tsüde tüsho alo ju asühpü thsüde ngü.
Jumonü apinü hah hanpü adüthsün mükhümchoh tüsho azhorü nangde reangkih-a rhimochoh. @SPACE =
16Dannü Israel trükshihbo lung khülang thsüde api mihtsürü mahkhapbah.
17Dan ju limro yean phuruto,
limtsahpung yean müzüm phuruto thsübah,
junangde khora lahzhibo mukiubah ju kheak binrü dunglim ayokhibah. @SPACE =
18Inü nü akhümkhit aleanglah, O Atungpuh . @SPACE =
19Ayanrünü Gad zündobah,
tüshe apinü rholobah arü yande amüshambah. @SPACE =
20Asher ching latsühlayungbah,
apinü kiulongthsürü tsühyungpü thülünkhi jihbah. @SPACE =
21Naphtali a ayangngu shihmüchi nangde,
anunubo akheahakham anujihkhi lah!#Yungsho thiyubo atsü thachoh.
22Josep a kenü ching mütüm donki,
awung yean mütüm khora pung nunu nangde lah.#Yungsho Josep a akhah tsüde chinde ayükhi sangdung nangde lah.
23Api riribonü müzhakde api zündo tüsho arü sanglühbo le hühzobo shuhbah api yande müsham.
24Tüshe Jakob Thrünpuh Wuto wu,
namfimihnu neakrü, Israel kümdorü hode api sanglüh tsüde la,
tüsho api khah düküngde kamshih,
25tümütüsho nü buh Thrünpuhnü nü rungchoh,
tümütüsho Wutonü achanglimnü tsüng tüsho alo alunglimnü kebo,
shiwühbo tüsho tsührübo ahihdo jihde müngühjih.
26Nü buh pürü müngühmühi ju jipü müzüngbo,
adüso wungbo hihdakkhi kheaknü atobe ah;
jurübo Josep ku kheak, api keoniorübo kheaknü achamkhikhi kingkang kheak lashang.
27Benjamin a arhüngrhüng rimre ah, yapsu shih tsühchoh,
tüsho arelim ayankhikhibo chamchoh.
28Harü ha Israel trük 12 ah, tüsho hanangde nihbuh aban ayekhi müngühmühi apinü arü kilim müngühjihchoki arü abuhnü arü ki thakheah.
Jakob Shekhi tüsho Mi Bahkhi
29Judüki apinü arü ki thsangdande tha: “I a I mihtsürü lung yüpü lah; Hitrü Ephron lu ching lakhi lungkhün ching I buh pürü lung I mi bahang, 30Kanan lomi ching, Mamre müngüh Makpela ching ah. Abrahamnü ha lungkhün tüsho thulu ju mibahpung thsüpü Hitrü Ephron ki thulokheah. 31Ju ching arünü Abraham tüsho aniube Sara kiuyukabah; ju ching arünü Isak tüsho aniube Rebeka kiuyukabah, tüsho ju ching inü Lea kiuyukabah. 32Ju ching thulu tüsho lungkhün ju Hitrü ki thulokheah.” 33Küyimki Jakobnü api tsührübo thsangdankhi bankhea, api jingbo yapkiu kheak chunga yüshih tüsho sheak kheamabah, tüsho anihbuh mihtsürü lung yü.
Currently Selected:
THRÜNTAN 49: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
