ABEKHIT 11
11
Adüjirü Shepü Zhiyukkhi
1Tüsho Atungpuhnü Mosa ki tha, “Kheaküshe inü Pharao tüsho Ijip kheak arüm khülang hande arübah. Jushu apinü nüsa ha chingnü atsoshihbah. Küyimki apinü nüsa tsoshihbanü, tsükjide apinü nüsa athrünkhi yankhitbah. 2Kheakü mihtsürübonü sode asukang, tüsho shotoyinchi le suna kukrukbo thsungkheak athrürü tüsho aliberü abannü nihbuh yamhingrü ki keokhishang.” 3Atungpuhnü Israelrü kheak Ijiprünü wüntre jihshihde kam. Kheaküshe Mosa ju Ijip lomi ching Pharao yamlarübo tüsho mihtsürübo miki khide wüntre ato lakheah.
4Judüki Mosanü tha, “Atungpuhnü ha thachoh: Tsüngphulung ching I Ijip alala ching yübah. 5Pharao tsührü adüjibuh api kiulongthsübinkiu kheak binkhinü rhebah, yamlaberü tsührü adüjirü hi chupung lakhi, tüsho akhuh anukhi shiwüh alala Ijip lomi ching shebah. 6Judüki Ijip lomi alala ching tripachih ato labah, ha nangde müngühlim müla yungsho küyimkishe mülalo. 7Tüshe Israel mihtsürü yungsho shiwüh azhihde khihnunü she müchi, junangde Ijiprü tüsho Israel dükeak Atungpuhnü büthsülah de nüsanü amükheahbah. 8Tüsho nü yamlarübo alalanü I ki arübah athabah, ‘Nü tüsho nü lung yürü alala wukhiukang!’ Jushu I wukhiukbah.” Tüsho Pharao mikinü apinü khide bukakhiukde wukhiuk.
9Tüshe Atungpuhnü Mosa ki tha, “Pharaonü nü ki mani, junangde I yo khinthiyinbebo Ijip lomi ching alü kamshihbah.” 10Jumonü Mosa le Aron bünenü harü khinthiyinbebo alala Pharao miki rhimo; tüshe Atungpuhnü Pharao mulong müküpde kamshih, tüsho Israelrü api lomi chingnü mütsoshih.
Currently Selected:
ABEKHIT 11: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
