ABEKHIT 12
12
Phungho-thünio
1Kheakü Atungpuhnü Ijip lomi ching Mosa tüsho Aron ki tha, 2“Ha khinu ha nüsa thsungkheaknü kam yo akhuhbe khinu labah. 3Israel amukhungrü alala ki thaang: Ha khinu thürü nipü mihtsürü abannü nihbuh yambuk thsungkheak bebuhrü yamkhün ayannü namfimihnunu khülang lubah. 4Tüsho namfimihnunu khülang thsungkheaknü yambuk ju khide nunusho, mihtsürü khekhi ayannü nihbuh yamhingrü ki rukhüh chamachihpü kuklah. Mihtsürü khülangnü atsühpü akhude namfimihnunu ju kheang. 5Nüsa namfimihnunu ju kam khülang bankhi lapha mükihkhi pung labeah. Nüsanü namfimihnu yungsho mihnu bolungnü alupü kuklah. 6Nüsanü haju khinu thürükheak phüyi ni khiungde zoang. Jushu Israel amukhungrü alalanü shuhyini lachoki ju laksahbah. 7Tüsho arünü athiyih khürü lubah arünü atsühpung thüyam ripit dungjing le ripit kumungbo kheak yihkihbah. 8Ju re arünü ashihtsü tsühbah; mo chingnü angukhi, phaüm muyukkhi tüsho akhüh sangyü bede arünü ju tsühbah. 9Arhangnü yungsho ke ching khiungbah dütsüh, tüshe aku, ajingbo tüsho bukningbo bede ngubah tsühang. 10Nüsanü ju yapsu khiungde daningshih, tüsho yapsu khiungde aningkhi a takabahang. 11Hanangde nüsanü atsühbah: nüsa chim kheak pangrümpü kihbah, nüsa jingkhümpü khümbah, tüsho nüsa khah ching tso shuhbah. Nüsanü ju niokheamde tsühang. Ha Atungpuh phunghothünio ah. 12Tümütüsho ju tsüngre I Ijip lomi hode ayübah tüsho Ijip lomi ching adüjirü, mihtsürü tüsho shiwüh chido laksahbah; tüsho Ijip thrünpuhbo alala azhihde inü mahkhapbah: I Atungpuh ah. 13Kheakü nüsa lakhi yambo kheak thiyih ju nüsa thsungkheak amütsan khülang thsübah. Küyimki inü thiyih ngübanü inü nüsa phunghode ayübah; tüsho inü Ijip shikchoki nüsa dükheakpü arüm ju nüsa kheak mülade alabah. 14Jumonü ha nüsanü mümihkhi nimung khülang labah; tüsho nüsa lünbo ching nüsanü Atungpuh ki akheam mülakhi yuzüng kamde thüniode alabah.
Phaüm Muyukkhi Yikhap Thünio
15“Nüsanü nimung thüne phaüm muyukkhi yikhap tsühbah. Akhuhbe nimung nüsanü nüsa yambo chingnü phaüm yihkhita bahang. Tümütüsho shepünü akhuhbe nimungnü thüne ni khiungde phaüm yukkhi yikhap tsühbanü, ju mihtsürü Israel chingnü khekhita bahbah. 16Akhuhbe nimung tüsho thüne nimungpü nüsa thsungkheak amüsüh amukhung labah. Ju nimungbo ching rhimo tümü düthsü; tüshe mihbüm abannü nihbuh küdah thsüde mozümodokhi lang atsühbah. 17Jumonü nüsanü phaüm muyukkhi thünio mungbah, tümüde ha nimung ching inü nüsa bonungrü Ijip lomi chingnü abekhitkheah. Jumonü nüsanü ha nimung ju nüsa lünbo alala ching akheam müla yuzüng kamde mungde laang. 18Akhuhbe khinu, thürükheak phüyi nipü arelimnü mukukheak khülang ni arelim khiungde nüsanü phaüm muyukkhi yikhap tsühbah. 19Nimung thüne nüsa yambo ching phaüm müngüshih, tümütüsho shepünü phaüm yukkhi tsühbanü, khiungkerü yungsho ha lo ching asürükhi thsüthsü ju mihtsürü Israel amukhungrü bolungnü khekhita bahbah. 20Nüsanü phaüm yukkhi tümü she mütsüh; nüsa lapung alala ching nüsanü phaüm muyukkhi yikhap tsühbah.”
21Judüki Mosanü Israel azothsürübo alala jibah tha, “Nüsa yamkhünbo ayannü nüsa thsungkheak namfimihnunu mokhitang, tüsho phungho-thünio namfimihnunu laksahang. 22Tüsho nüsanü monam düchi khülang lubah müsühmüraphuru ching lakhi thiyih ching thsamang, tüsho ripit kumung le khimdopü dungjing mahne kheak rhapkihang. Tüsho nüsa sheshe ha yam ripit hode yapsu khiungde duwukhiuk. 23Tümüde Atungpuhnü Ijiprü laksahpü hode ayübah; tüsho apinü ripit kumung le dungjing mahne kheak thiyih ngüsho, Atungpuhnü ripit hode ayübah tüsho athsümünimrü nüsa yambo ching alaksahpü mazahshih. 24Tüsho nüsanü ha nüsa le nüsa tsührübo thsungkheak lünnü thiyuzüng kamde aleangkhibah. 25Küyimki Atungpuhnü nüsa jihpü alokhikhi lo ching arübanü, nüsanü ha mukhung laang. 26Tüsho küyimki nüsa tsührübonü akeoba, ‘Ha mukhungkhi amütsan tümü a?’ 27Nüsanü athabah, ‘Ijip ching apinü Ijiprü laksahchoki Israelrü yambo phunghode yübah isa yambukbo khümkhitkhi Atungpuh kilim phungho-thünio laksah-a kingaünkhi ah.’ ” Jumonü mihtsürübonü khukning tüsho kingaün. 28Judüki Atungpuhnü Mosa tüsho Aron ki thiyukhüm jihkhi nangde Israelrünü yü tüsho jude rhimo.
Adüjirü Shekhi
29Ijip ching adüjirü kiulongthsübinkiu kheak binkhi Pharao tsührünü rhede aramrü amiting ching larü adüjirü tüsho akhuh anukhi shiwüh Atungpuhnü tsüngphulung ching laksah. 30Jumonü Pharao, api yamlarübo tüsho Ijiprü alala azhing ching asürü; tüsho Ijip ching tripachihkhi ato lakheah, tümüde mihmüshekhi yam khülang she mülade alakheah. 31Judüki apinü azhing ching Mosa tüsho Aron büne jibah tha, “Asürang tüsho nü le Israelrü I mihtsürü bolungnü tsoang. Tüsho yüang, nüsanü athakhi nangde Atungpuh tankihang. 32Kheaküshe nüsanü athakhi nangde nüsa mihnu tüsho moshi boto bebah yüang; tüsho I she müngühjang.”
33Ijiprünü mihtsürübo ki arü lomi niokheamde bahbah atsopü tuthsuk. Tümüde arünü tha, “Isa alala ashebah.” 34Jumonü mihtsürübonü phaüm muyukkhi yikhap neamkhi lu, tüsho yikhap neam-phuru khim chingnü hinga arü dubuh kheak han. 35Kheakü Israelrünü Mosa yu yande rhimo, tüsho arünü Ijiprü ki shotoyinchi le suna kukrukbo tüsho khimmihbo kheang. 36Tüsho Atungpuhnü Israel kheak Ijiprünü wüntre jihshihde kam, junangde arünü amushukhi arünü alojih. Hanangde Israelrünü Ijiprü lakhit hanbah tso.
Israelrü Ijip chingnü Atsokhi
37Judüki Israelrünü azürü aliberü mükhede mihtsürü 600,000 bande jingnü Rameses chingnü Sukkoth khiung. 38Püpürü mihtsürü boto ato tüsho namfimihnu le mihnubo tüsho moshibo arü lung yü. 39Tüsho arünü Ijip chingnü hanbah akhiukkhi phaüm muyukkhi yikhap ju nung; ha phaüm muyukyide alakheah, tümütüsho arübo Ijip chingnü ayankhitkhinü maleangkhuk yungsho arü tsühyungbe mütsanglungbit.
40Kheakü Israelrü ju Ijip ching kam 430 lakheah. 41Kam 430 akheam nimung, Atungpuh mihtsürü trükbo alala Ijip chingnü wukhiuk. 42Ha tsüngre ju arü Ijip lomi chingnü bede akhiukkhi thsungkheak arüngako lakheah. Ha Atungpuh tsüngre ju Israelrü alalanü arü lün amuyung arüngakopü lakheah.
Phungho-thünio Yuzüngbo
43Tüsho Atungpuhnü Mosa le Aron ki tha, “Ha phungho-thünio yuzüng labah: Khiungkerü shenü ju mütsüh. 44Tüshe shonü athulokhi yamlarübo küyimki nünü api tsütabahbanü, jushu apinü atsühbah. 45Tsotsahrü tüsho amulokhi yamlarünü ju mütsüh. 46Tsühyungbe alala mozümodopung yam chingnü tsühang; nüsanü shih tümü she wungdo dühankhit, yungsho arobo düyihshak. 47Israel trük alalanü ha arüngbah. 48Tüsho küyimki khiungkerü nüsa lung labah Atungpuh kilim phungho-thünio arüngbanü, athrürü alala tsütabahshang tüsho apinü phünide arübah shihcham lushang; tüsho api lomi ching asürükhi ruk labah. Tsütamübahkhi mihtsürü shenü she ju mütsüh. 49Lomi ching asürükhi tüsho nüsa lung lakhi khiungkerü thsungkheak yakzan khülang labah.” 50Atungpuhnü Mosa tüsho Aron ki thiyukhüm jihkhi nangde Israelrü alalanü rhimo. 51Tüsho ju nimung ching Atungpuhnü Israelrü arü bonungrü ayannü Ijip chingnü bekhit.
Currently Selected:
ABEKHIT 12: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
