ABEKHIT 13
13
Adüjirü Müsühkhitkhi
1Judüki Atungpuhnü Mosa ki tha, 2“Israelrü lung akhuhde azübekhi athrürü tüsho akhuhde anukhi shiwüh I kilim müsühkhitang; ju I yo ah.”
Phaüm Muyukkhi Yikhap Thünio
3Mosanü mihtsürübo ki tha: “Nüsa Ijip azhorü yamkhün chingnü awukhiukkhi ha nimung lümkhitang; tümüde Atungpuh khah sühmühnü ha dangpung chingnü nüsa bekhit. Phaüm yukkhi yikhap mütsüh. 4Abib khinu, ha nimung nüsa wukhiukchoh. 5Küyimki Atungpuhnü nüsa jihpü nüsa jipürü ki alokhikhi Kananrü, Hitrü, Amorrü, Hivrü tüsho Jebusrü niuhke tüsho mukhuke bukkhi lo ching bede yüzahbanü nüsanü ha khinu ching amukhung laang. 6Nimung thüne nüsanü phaüm muyukkhi yikhap tsühbah, tüsho athüne nipü Atungpuh kilim thünio labah. 7Phaüm Muyukkhi yikhap ju nimung thüne tsühbah. Tüsho nüsa lomi alala ching phaüm yukkhi yikhap yungsho phaüm müngüshihbeah. 8Tüsho ju nimung nünü nü tsührü ki thabah, ‘I Ijip chingnü akhiukchoki Atungpuhnü I thsungkheak rhimokhi dünkheak ha rhimochoh.’ 9Ha nü kilim nü khah kheak amütsan khülang tüsho nü kingkang kheak amümihbe nangde alabah, junangde Atungpuh yakzan nü mün ching labah; tümüde Atungpuh khah adüküngnü nüsa Ijip chingnü bekhit. 10Jumonü nüsanü ha arüngako kam aban akheahmünchi ching laang.
Adüjirü Yakzan
11“Küyimki Atungpuhnü nüsa le nüsa jipürü ki alokhikhi Kananrü lo ching nüsa bede yüzahbanü tüsho nüsa jihbanü, 12akhuhde anukhi pung Atungpuh kilim jihang. Nüsa shiwüh akhuh anukhi pung Atungpuh yo ah. 13Tüshe donki akhuh anukhi aban namfimihnunu khülangnü nünü rhokhitang; nünü ju mürhokhitsho, nünü ahung yihshakbah. Tüsho nü tsührü bolung adüjirü athrürü nünü arhokhitbah. 14Jumonü nü tsührünü arübe kim ching nü ki, ‘Ha tümü a?’ de keokhisho, nünü api ki thabah, ‘Atungpuh khah adüküngnü isa Ijip azhorü yamkhün chingnü bekhitkheah. 15Küyimki Pharaonü isa tsoshihpü nihnihkheanü, Atungpuhnü Ijip lomi ching akhuh zübekhi mihtsürü tüsho shiwüh laksah. Jumonü shiwüh akhuh anukhi pungbo Atungpuh kilim jihchoh, tüshe akhuh zübekhi I tsührübo a inü rhokhitchoh.’ 16Ha nü khah kheak amütsan khülang tüsho nü kingkang kheak amümihbe khülang labah, tümüde Atungpuh khah adüküngnü isa Ijip chingnü bekhit.”
Amo Dungto tüsho Mo Dungto
17Küyimki Pharaonü mihtsürübo tsoshihkheanü, Thrünpuhnü aphünibe thsüa lalashe arübo Filistia lomi limronü mübe, tümüde Thrünpuhnü tha, “Arünü thirithsü ngüsho mihtsürübonü lümkhi müthribah tüsho Ijip lim rholode ayübah.” 18Jumonü Thrünpuhnü Amürüm Keto sunglo mükamde mihtsürübo be. Israelrünü thirithsüpü züt thsübah Ijip chingnü wukhiuk. 19Tüsho Mosanü Josep robo api lung lubah yü, tümüde apinü Israelrü ki thiyuchihchimde thaa zo, “Tsükjide Thrünpuhnü nüsa rhua kheahbah, tüsho nüsanü I robo ha chingnü nüsa lung hande awutubah.” 20Jumonü arünü Sukkoth chingnü tsahmusu tüsho sunglo yean Etham ching binkheam. 21Tüsho Atungpuhnü arü müngüh animung amo dungtonü limro bepü tüsho azhing ching mo dungtonü arü kilim ayin jihpü yü, junangde animung tüsho are tsahpü lakheah. 22Apinü mihtsürü müngühnü animung amo dungto yungsho azhih ching mo dungto lude mutso.
Currently Selected:
ABEKHIT 13: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
