ABEKHIT 14
14
Amürüm Keto Hokhi
1Kheakü Atungpuhnü Mosa ki tha, 2“Israelrü ki Pi-hahiroth müngüh Migdol tüsho Keto dükeak Baal-zephon mikhuh binkheampü thaang. 3Tümüde Pharaonü Israelrü dünkheak thabah, ‘Arü alominü yingyingshihdo; sunglonü arü lüpdodo.’ 4Judüki inü Pharao mulong müküpshihbah apinü nüsa müshambah; Pharao tüsho api bonungrü hode I müretahbah, junangde Ijiprünü I Atungpuh de amükheahbah.” Tüsho Israelrünü jude rhimo.
5Küyimki mihtsürübo tsokhi kiulongthsüpuh ki thakhea, Pharao tüsho api yamlarübo lümkhi mihtsürübo kilim müthri tüsho tha, “Israel isa tankihkhi chingnü atsoshihkhi ha isanü tümü rhimokhea?” 6Jumonü api yo khora-lolungbe tüsho api bonungrü bea lu, 7tüsho amokhitkhi khora-lolungbe 600 tüsho arü alala kurungkheak atorübo bede püpü Ijip khora-lolungbebo alala lu. 8Atungpuhnü Ijip kiulongthsüpuh Pharao mulong müküpshih tüsho mulong tode ayürü Israelrü müsham. 9Ijiprü alala, Pharao khorabo le khora-lolungbe, tüsho khoraberü le api bonungrü alalanü arü Pi-hahiroth ki keto ching, Baalzephon müngüh binkheamchoki müshamde yünü yanphuh.
10Küyimki Pharao phünide ayükhea, Israelrünü zünga kheah, tüsho Ijiprü arü dunglim müshamde alakheah. Jumonü arünü khide tre, tüsho Israelrünü Atungpuh ki zhi. 11Judüki arünü Mosa ki tha, “Ijip ching kiuyuk mülakhinü isa sunglo ching sheshihpü nünü bede arükhea de? Tümüde nünü isa Ijip chingnü bekhitkhea? 12Isanü Ijip ching ha yu nü ki thakhi yung de, ‘Isa zangrü zojang, junangde isanü Ijiprü tankihbah?’ Tümüde isa sunglo ching shepü düna Ijiprü tankihkhi atsübe ah.” 13Tüsho Mosanü mihtsürübo ki tha, “Dütre. Düngde zhipang, tüsho Atungpuhnü nüsa khümkhitpü khihni rhimopü lakhi kheahang. Tümüde nüsanü khihni ngükhi Ijiprübo lünnü müngülo. 14Atungpuhnü nüsa thsungkheak keochihbah, tüsho nüsa zhikde laang.” 15Tüsho Atungpuhnü Mosa ki tha, “Tümüde nüsanü I ki zhicho? Israelrü ki mikhuh yüpü thaang. 16Tüshe nü tso shuhkihang, tüsho keto kumung nü khah chungkihang tüsho ju azüshang, junangde Israelrünü akung lo kheaknü kero phulung hobah. 17Tüsho inü Ijiprü mulong müküpshihbah, junangde arünü arü dunglim yüzahbah, tüsho Pharao le api bonungrü, api khora-lolungbebo, tüsho api khoraberü hode I müretahbah. 18Küyimki inü Pharao, api khora-lolungbebo, tüsho api khoraberü kurungkheak müretah ngübanü Ijiprünü I Atungpuh de amükheahbah.”
19Tüsho Israel bonungrü müngüh yükhi Thrünpuh yunirünü rholobah arü dunglim yü; tüsho amo dungto arü mikhuhnü yübah arü dunglim zhip. 20Junangde Ijip bonungrü le Israel bonungrü dükeak arü. Hanangde amo lakhinü khülang lim amiting la, tüsho püpü lim azhing ching ayin jih, junangde tsüngre amuyung sheshe phüniachihde marü.
21Judüki Mosanü keto kumung akhah chungkih; tüsho Atungpuhnü aniakhiuklim amüküp pungnü tsüngre amuyung yünlode tsoshih, tüsho keto ju alo akung kamshih, tüsho kebo ju azüabah. 22Jumonü Israelrünü kero phulung alo kheak yüzah, tüsho kebo ju arü khah tsülim tüsho huzulim rhü nangde alakheah. 23Ijiprübonü müshamde yü tüsho arü dunglim Pharao khorabo, api khora-lolungbebo, tüsho api khoraberü alala kero phulung yüzahabah. 24Ayinkhipü müngüh Atungpuhnü mo dungto tüsho amo chingnü Ijip bonungrü kheak abinkhia kheah tüsho arübo yingyingde kamshih. 25Tüsho apinü arü khora-lolungbe jingbo wukhiukshih, junangde arünü abepü küpkhukde kam; tüsho Ijiprünü tha, “Israel mikinü isa tsoanü, tümüde Atungpuhnü Ijiprü azhihde arü thsungkheak keochihjihchoh.”
26Judüki Atungpuhnü Mosa ki tha, “Nü khah keto kumung chungkihang, junangde Ijiprü, arü khora-lolungbebo tüsho khoraberübo kheak kebo bukkihlobah.” 27Mosanü keto kumung akhah chungkih, tüsho küyimki ayinkhikhea, keto ju milode kam. Ijiprünü ke chingnü atsokhitpü mürang, tüshe Atungpuhnü arübo keto ching jipyuka bah. 28Judüki kebo alodarübah khora-lolungbebo, khoraberübo, tüsho arü dunglim keto ching arükhi Pharao bonungrü alala zündo. 29Tüshe Israelrü a kero phulung ching alo akung kheaknü tsah, tüsho kebo ju arü khah tsülim tüsho huzulim rhü nangde alakheah.
30Jumonü Atungpuhnü ju nimung Ijiprü khah chingnü Israel khümkhit, tüsho Ijiprübo keyean shea lakhi Israelnü ngü. 31Hanangde Atungpuhnü Ijip ching ato rhimokhi Israelnü ngü; jumonü mihtsürübonü Atungpuh tre tüsho Atungpuh le api yamlarü Mosa kheak kin.
Currently Selected:
ABEKHIT 14: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
