ABEKHIT 16
16
Manna tüsho Wuhkhi
1Arübo Elim chingnü tsahmusu tüsho Ijip chingnü chamachih dunglim khinu mahne, nimung thürükheak phüngü nipü Israel boto alala Elim le Sinai dükeak Sin sunglo ching arü. 2Judüki Israel boto alalanü sunglo ching Mosa tüsho Aron azhihde dapdapneangneang. 3Tüsho Israelrünü arü ki tha, “O, isa Ijip lomi ching shih phüh ki binchoki tüsho bukthsüde yikhap tsühchoki Atungpuh khah hode isa müshede! Tümütüsho nünü isa ha boto alala sunglo ching akhümnü asheshihpü bekhitdo.”
4Judüki Atungpuhnü Mosa ki tha, “Kheahang, inü nüsa thsungkheak yinmi chingnü yikhap akishihbah; tüsho mihtsürübonü wukhiukbah nimung shihcham thsükhi lubah, junangde arünü I yakzan ching tsahba shi yungnü inü amütsanbah. 5Athuruk nipü arünü lude azahkhi mozümodobah, tüsho ju püpü nimungbo ching hanmukhungkhi kheaknü mahne kinü atobe labah.” 6Jumonü Mosa tüsho Aronnü Israelrü alala ki tha, “Ijip chingnü nüsa bekhitkhi ju Atungpuh ah de arelim nüsanü amükheahbah, 7tüsho yapsu nüsanü Atungpuh müretahkhi ngübah, tümütüsho Atungpuh azhihde nüsanü dapdapneangneangkhi apinü sodo. Ike tümü ah de nüsanü ike azhihde dapdapneangneangcho?” 8Tüsho Mosanü tha, “Nüsa kilim nüsanü akünkhi alala arelim shih tüsho yapsu yikhap jihchoki ha Atungpuh thsüa lah de nüsanü amükheahbah, tümütüsho nüsanü api azhihde dapdapneangneangkhi apinü sodo. Ike she a? Nüsanü ike azhihde dapdapneangneangkhi yung tüshe Atungpuh azhihkhi ah.”
9Judüki Mosanü Aron ki tha, “Israel boto alala ki thaang, ‘Atungpuh thüninde arang, tümüde nüsa dapdapneangneangkhi apinü sodo.’ ” 10Kheakü Aronnü Israel boto alala ki asukchoki, arünü sunglo limpeang kheah, tüsho Atungpuh müretahkhi amo ching akhiuk. 11Tüsho Atungpuhnü Mosa ki tha, 12“Israelrünü dapdapneangneangkhi inü sodo. Arü ki asukang, ‘Shuhyini ching nüsanü shih tsühbah, tüsho yapsu yikhapnü nüsa bukthsübah. Tüsho I Atungpuh nüsa Thrünpuh ah de nüsanü amükheahbah.’ ”
13Arelim wuhkhibo arü tüsho binkheampung müjimdo; tüsho yapsu binkheampung mükamde ayinke lakheah. 14Tüsho küyimki ayinke ju kungabahkhea, sunglo kheak ju yikhap apü atsüdak thüwün nangde alakheah. 15Jumonü küyimki Israelrünü ju ngükhea, arü khülangnü khülang ki thaachih, “Ha tümü a?” Tümütüsho ju tümüanü arünü mümükheah. Tüsho Mosanü arü ki tha, “Ha Atungpuhnü nüsa tsühshihpü yikhap jihkheah. 16Ha Atungpuhnü thiyukhüm jihkhi ah: ‘ Mihtsürü abannü nihbuh yihnüpü thülün betsührü aban thsungkheak pungdüchi 2 momukhungshang.’” 17Tüsho Israelrünü jude thsü; arünü khürü hihde, khürü nükde lu. 18Tüshe küyimki arünü pungdüchinü adünkheanü ahihkhüh lubuh she müzhiho tüsho anükhüh lubuh she mukhiukde müthsü; mihbüm abannü nihbuhnü atsühpü thülün momukhunga lakheah. 19Tüsho Mosanü arü ki tha, “ Mihtsürü shenü she ju yapsu khiungde daningshih.” 20Tüshe arünü Mosa ki mani; arü khürünü atsühaning yapsu khiungde zo, tüsho muso yüzahbah shuhrhüm münimde kam; tüsho Mosanü arü ki bukakhiuk. 21Yapsu aban arünü nihbuh tsüh khiukde lu; tüshe ani lamde yüsho ju niuabah.
22Athuruk nipü arünü mahne kinü ahihbe thsüde mihtsürü aban pungdüchi 4 lu tüsho boto limberübonü ha Mosa ki arübah thiyusheak jih. 23Apinü arü ki tha, “Atungpuhnü ha thiyukhüm jih: ‘Shido a sühakhim nimung, Atungpuh kilim amüsüh amuni labah. Jumonü nüsanü tümü khapa taknelanü khapa takang tüsho tümü ngüpnelanü ngüpang. Aningkhi ju yapsu khiungde tsüde zoang.’ ” 24Jumonü arünü Mosanü thiyukhüm jihkhi nangde yapsu khiungde zo, tüsho ju shuhrhüm mümünim yungsho muso müyüzah. 25Judüki Mosanü tha, “ Ju khihni tsühang, tümüde khihni ha Atungpuh kilim amuni ah; khihni ju nüsanü alo ching müngü. 26Nimung thuruk nüsanü ju momukhungbah, tüshe athüne ni amuni a tümü müla.” 27Kheakü mihtsürü khürünü athüne nipü momukhungpü wukhiuk tüshe tümü müngü. 28Tüsho Atungpuhnü Mosa ki tha, “Nüsanü külokhüh I yukhümbo tüsho I yakzanbo zopü thsungloba? 29Kheahang! Atungpuhnü nüsa kilim amuni jihdo; jumonü apinü nüsa kilim athuruk nipü nimung mahne thsungkheak yikhap jihchoh; mihtsürü sheshe nihbuh lapung chingnü athüne nipü duwukhiukshih.” 30Jumonü mihtsürübonü athüne nipü sühakhim.
31Tüsho Israel mihtsürübonü ju mung Manna de ji. Tüsho ju rhümthünea woninji amüye nangde, tüsho akekhi ju mukhuke bede anungkhi yikhap nangde alakheah. 32Mosanü tha, “Atungpuhnü thiyukhüm jihkhi ju ha: ‘ Manna ju pungdüchi 1 luang tüsho arübe lünbo thsungkheak zoang, junangde inü nüsa Ijip chingnü bekhitchoki nüsa tsühshihpü sunglo ching yikhap jihkhi arünü angübah.’” 33Tüsho Mosanü Aron ki tha, “Phüh khülang luang tüsho nüsa tsühsoniusobo thsungkheak zopü manna pungdüchi 2 yukang.” 34Atungpuhnü Mosa ki thiyukhüm jihkhi nangde, azokhukpü thsüde manna ju tangzüng sangdan miki yuka zo. 35Arü lapü lomi ching arükhi khiungde Israelrünü manna ju kam yirü tsüh; arünü Kanan aredungyean khiungde manna tsüh. 36(Omer 1 ju epha shihcham 10 ching 1 ah.)
Currently Selected:
ABEKHIT 16: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
