ABEKHIT 17
17
Lungto chingnü Ke
(Wüh 20.1-13)
1 Atungpuh yukhüm yande Israel boto alala Zin sunglo chingnü tsahmusude yü tüsho Rephidim ching binkheam; tüshe ju ching mihtsürübo thsungkheak ayungpü ke mülakheah. 2Jumonü mihtsürübonü Mosa bede müneah tüsho tha, “Isa yungpü ke jihang.” Tüsho Mosanü arü ki alo, “Tümüde nüsanü I müneahcho? Tümüde nüsanü Atungpuh rükakicho?” 3Ju ching mihtsürübo kethüri tüsho Mosa azhihde dapdapneangneangde tha, “Tümüde isa le isa tsührübo tüsho akam-shiwühbo kethürinü asheshihpü Ijip chingnü abekhitkhea?” 4Jumonü Mosanü Atungpuh ki zhide tha, “Inü ha mihtsürü kheak küde athsüba? Arünü I lungnü arupü thsüchoh!” 5Tüsho Atungpuhnü Mosa ki alo, “Nü lung Israel azothsürü khürü bebah mihtsürü müngüh yüang; tüsho nünü Nile rhapkhi tso nü khah ching luang tüsho yüang. 6Kheahang, I nü müngüh Horeb kheak zhipbah; nünü lungto kheak rhapbah tüsho ke akhiukbah, junangde mihtsürübonü ayungbah.” Tüsho Israel azothsürübo mikinü Mosanü jude rhimo. 7Jumonü apinü ju dangpung ki Massa tüsho Meriba de ji, tümütüsho Israelrünü rukachih tüsho Atungpuh rükakide tha, “Atungpuh isa lung la shi müla?”
Amalekrü kheak Thirithsü
8Kheakü Amalekrü arü tüsho Rephidim ching Israel bede keochih. 9Tüsho Mosanü Jihusua ki tha, “ Mihtsürü khürü mokhitang tüsho wukhiukbah Amalekrü bede keochihang. Shido Thrünpuh tso I khah ching shuhbah awung mujuk kheak zhipbah.” 10Jumonü Mosanü athakhi nangde Jihusuanü rhimo. Mosa le Aron tüsho Hur arünü awung mujuk kheak yükih. 11Junangde Mosanü akhah chungkih-a lachoki Israelrünü kuk; tüsho akhah keamkhichoki Amalekrünü kuk. 12Tüshe Mosa khahbo keahkhiabah; jumonü arünü lung khülang lubah api ju kheak binshih. Aron le Hur bünenü khülangnü thripkhüh khah tüsho khülangnü püpü thrip de thsungkihjih; tüsho ani yüzah khiungde api khahbo düküngde alakheah. 13Jumonü Jihusuanü Amalekrü nukshangnü kuk.
14 Atungpuhnü Mosa ki tha, “Ha mümihpü thsüde hüm ching thrütang tüsho Jihusuanü sode kheang, junangde Amalekrü lümkhitpü yinmi bukkhüpnü shahde nankhita bahbah.” 15Tüsho Mosanü kingaün sadam khülang thsübah amung ji, Atungpuh ju I yo riphin. 16Apinü tha, “Tümütüsho khahbo ju Atungpuh kiulongthsü-binkiu lim shuhkih. Atungpuhnü Amalekrü azhihde lünnü lün thirithsübah.”
Currently Selected:
ABEKHIT 17: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
