ABEKHIT 18
18
Jethronü Mosa Rhuakheahkhi
1Mosa akü Jethro, Midia amükeamrü, apinü Mosa tüsho Israelrübo Ijip lomi chingnü Thrünpuhnü küruk bekhitkheanü alala so. 2Jumonü zojihbah ayükhi Mosa niube Zippora api lung bebah Mosa kilim arü, 3tüsho atsührü mahne Gershom tüsho Eliezer. (Mosanü tha, “I khiungkerü lomi ching hanrü khülang lakheah;” jumonü apinü tsührü khülang mung Gershom de ji. 4Kheaküshe apinü tha, “I buh pürü Thrünpuh ju I rungrü lakheah, tüsho Pharao nukshang chingnü I khümkhit;” jumonü apinü tsührü püpü mung Eliezer de ji.) 5Jethro lung Mosa niube tüsho api tsührü mahne bebah sunglo ching api binpung Thrünpuh wung ching Mosa kilim arü. 6Kheakü apinü Mosa ki tha, “I nü kü Jethro, nü niube lung atsührü mahne bebah nü kilim arüchoh.”
7Jumonü Mosa akü shorupü wukhiuk, tüsho api miki mükhümbah müthsüp. Tüsho arünü tsüde alakhi keoachihbah khimyam ching yüzah. 8Tüsho Mosanü Pharao tüsho Ijiprü kheak Israel thsungkheak Atungpuhnü arhimokhi alala, limro ching küpkhuk arübo kheak arükhi alala, tüsho Atungpuhnü arü bekhitkhi akü ki thaa huh. 9Judüki Atungpuhnü Israel thsungkheak atsü rhimode Ijiprü khah chingnü arü bekhitkhi alala dünkheak Jethronü asüh. 10Tüsho Jethronü tha, “Nü tüsho mihtsürübo Ijiprü le Pharao khah chingnü bekhitbuh Atungpuh shiang. 11Kheakü thrünpuhbo alala kheaknü Atungpuh atobe ah de inü mükheahlah; tümütüsho arünü kükheangde arhimochoki arü kumung api lakheah.” 12Judüki Mosa akü Jethronü taka kingaünkhi tüsho laksah-a kingaünkhibo Thrünpuh kilim jih. Tüsho Aron lung Israel azothsürü alala Mosa akü lung yikhap tsühpü Thrünpuh miki arü.
Mahkhaprübo Mokhitkhi
(Yuzüng 1.9-18)
13Ashidopü Mosanü mihtsürübo mahkhappü bin; tüsho mihtsürübonü Mosa miki yapsunü arelim khiungde zhip. 14Jumonü mihtsürübo thsungkheak rhimokhi harü alala ngübah Mosa akünü tha, “Nünü mihtsürübo thsungkheak rhimokhi ha tümü a? Tümüde nü langzü bincho, tüsho mihtsürübo nü miki yapsunü arelim khiungde zhipcho?” 15Mosanü akü ki alo, “Tümütüsho mihtsürübonü Thrünpuh lümkhi keokhikeorapü I ki arüchoh. 16Küyimki arü neamneamruru labanü, arünü I kilim arüchoh, tüsho inü arü khülang le khülang dükeak mahkhapjihchoh; tüsho inü Thrünpuh yuzüngbo tüsho api yakzanbo mükheahshihchoh.” 17Jumonü Mosa akünü api ki tha, “Nünü arhimokhi ha atsü yung. 18Nü le nü lung harü mihtsürübo dükde keakabahbah. Tümüde ha nü thsungkheaknü hodaklah; ha nü langzünü mürhimokhuk. 19Kheakü I yu aniang; inü nü lümthiyan jihanü tüsho Thrünpuh nü lung labah: Mihtsürübo thsungkheak Thrünpuh miki zhipang, junangde neamneamrurubo nünü Thrünpuh ki lude arübah. 20Tüsho nünü arü ki thiyuzüng le yakzanbo thsangyubah tüsho arünü atsahpü limro tüsho rhimopübo huhbah. 21Kheaküshe nünü mihtsürü alala lungnü athsükhuk mihtsürü–Thrünpüh trerü, thiyuro mihtsürü, yihnelune mülarü mokhitang; tüsho arübo ju chithürübo, chibo, thünimbo tüsho thürübo kurungkheak yakzanshuhrübo thsüshang. 22Tüsho arünü kim alala ching mihtsürübo mahkhapshang. Junangde lümkhi ato arünü nü kilim hande arübah, tüshe lümkhi anini a arü küdah thsüde akhapbah. Junangde ha nü thsungkheaknü athülihbe labah, tümüde arünü nü lung hahmülang hanrungbah. 23Nünü ha rhimosho, tüsho Thrünpuhnü nü ki thiyukhüm jihsho, nü mükeaksah, tüsho harü mihtsürü alala lümkhi mülübah thüyam lim yübah.” 24Jumonü Mosanü akü yu ania lu tüsho apinü athakhi alala rhimo. 25Mosanü Israel alala lungnü athsükhuk mihtsürü mokhit tüsho mihtsürü chithürübo, chibo, thünimbo tüsho thürü kurung yakzanshuhrübo thsüshih. 26Junangde arünü kim alala ching mihtsürübo mahkhap; lümkhi achakbo arünü Mosa kilim hande arü, tüshe lümkhi anini a arü küdah thsüde khap. 27Judüki Mosanü akü ju wulungshih, tüsho api nihbuh lomi lim limro ching yü.
Currently Selected:
ABEKHIT 18: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
