ABEKHIT 19
19
Sinai Müzüng kheak Israelrü
1Israelrü Ijip chingnü awukhiuk dunglim khinu asampü ching, ju nimung arübo Sinai Müzüng ching arü. 2Tümüde arü Rephidim chingnü tsahmusubah Sinai sunglo ching arü tüsho binkheam. Junangde Israel ju müzüng müngüh binkheam. 3Mosanü Thrünpuh kilim wutu, tüsho Atungpuhnü awung chingnü api ki ji, “Hanangde nünü Jakob yamkhün tüsho Israelrü ki thabah: 4Inü Ijiprü kheak rhimokhi, tüsho müleang ghidükeangbo kheak nüsa I kilim hanbah arükhi nüsanü ngüdo. 5Jumonü kheakü nüsanü atsütsü I yu anisho tüsho I tangzüng zosho, mihtsürü alala kurungkheak nüsa I lakhit atsübe thsübah; tümüde alomi alala I yo ah. 6Tüsho nüsa ju I kilim amükeamrü kiulongthsü tüsho amüsüh trükshih khülang thsübah. Harü yubo ha nünü Israelrü ki thaang.”
7Jumonü Mosanü arübah mihtsürübo kurung azothsürü ji tüsho Atungpuhnü api ki thiyukhüm jihkhi harü yubo alala arü ki tha. 8Judüki mihtsürü alala rukhühnü alo tüsho tha, “Atungpuhnü athakhi yu alala isanü arhimobah.” Jumonü Mosanü mihtsürübo yu Atungpuh kilim lulode arü. 9Tüsho Atungpuhnü Mosa ki tha, “Kheahang, inü nü ki asukkhi mihtsürübonü sobah nü kheak lünnü akin lapü thsüde I nü kilim amo akheah ching arükheah.” Junangde Mosanü mihtsürübo yu Thrünpuh ki tha.
10Judüki Atungpuhnü Mosa ki tha, “ Mihtsürübo kilim yüang tüsho khihni le shido arü tsangkhitang, tüsho arü khimmih müsühshang. 11Tüsho arübo mahsam nipü thsungkheak thsakhamshang. Tümütüsho mahsam nipü Sinai Müzüng kheak mihtsürü alala miki Atungpuh akibah. 12Nünü alala mükamde mihtsürübo thsungkheak kishakde thaang, ‘Nüsanü müzüng kheak muwutupü yungsho ajing kheak müqiupü aniyuka zoang. Sherünü awung qiubanü tsükjide asheshihbah. 13Khah khülangnü she api müqiu, tüshe tsükjide api lungnü arubah yungsho hühzonü akipbah; mihtsürü yungsho shiwüh thsüthsü api rhangdung müla.’ Küyimki hulipungpung ashangkhüh mütbanü, arünü müzüng thüninde arübah.” 14Judüki Mosanü müzüng kheaknü mihtsürübo kilim akibah tsangkhitjih tüsho arünü arü khimmihbo müsüh. 15Tüsho apinü mihtsürübo ki tha, “Asam nipü thsungkheak thsakhamang; niuberü thüninde düyü.”
16Asam nipü yapsu müzüng kumung amo akheah kihde tsüngmuk tüsho chinchobe lakheah, tüsho hulipungpung khide achangnü müt, jumonü binkheampung ching mihtsürü alala ajan. 17Mosanü mihtsürübo ju Thrünpuh shorupü binkheampung chingnü bekhitbah arü, tüsho arünü müzüng jing kheak zhip. 18Kheakü Sinai Müzüng abümnü mokhüh lakheah, tümütüsho ju kheak Atungpuh mo ching aki. Mokhüh ju mokin ching yo mokhüh nangde aki, tüsho müzüng abümnü niuk. 19Tüsho küyimki hulipungpung shangde mütbah achangbe tüsho achangbe kamkhea, Mosanü asuk, tüsho Thrünpuh düsheaknü api ki alo. 20Judüki Sinai Müzüng mujuk kheak Atungpuh aki. Atungpuhnü müzüng mujuk kheak Mosa ji tüsho Mosanü wutu. 21Tüsho Atungpuhnü Mosa ki tha, “Yükiang tüsho mihtsürübo ki müzünde thaang, jude yungsho Atungpuh kheahpü arünü akishak hobah, tüsho arü ahihkhüh shebah. 22Amükeamrübo she ATUNGPUH thüninde arürübo tsangkhitshang, jude yungsho inü arü thsümüchibah.” 23Mosanü Atungpuh ki tha, “ Mihtsürübonü Sinai Müzüng kheak matukhuk; tümüde nünü isa ki müzünde tha, ‘ Müzüng mükamde akishak yukang tüsho ju tsangkhitang.’” 24Judüki Atungpuhnü api ki alo, “Tsoang, yükiang tüsho Aron nüke atuang. Tüshe amükeamrübo le mihtsürübo Atungpuh kilim atupü akishak dühoshih, jude yungsho apinü arü thsümüchibah.” 25Jumonü Mosanü mihtsürübo kilim yüki tüsho arü ki asuk.
Currently Selected:
ABEKHIT 19: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
