ABEKHIT 21
21
Azhorübo Yakzan
(Yuzüng 15.12-18)
1“Kheakü nünü arübo miki zojihpü yuzüngbo ju harü labah: 2Nünü Ibrirü azhorü thulosho, apinü kam thuruk nü tankihbah; tüsho athünepü ching tümü müjihde zuzu thsüde api awukhiukbah. 3Api alangzü azah-a lasho, api langzü wukhiukbah; api yamkhün thsüa lasho, alibe ju api lung wukhiukbah. 4Api putungrünü aniube lujih-a lasho, tüsho api kilim tsührübo le tsührübebo zübejih-a lasho, aniube le atsührübo ju alibe putungrü yo thsübah, tüsho api langzü wukhiukbah. 5Tüshe azhobuhnü, ‘Inü I putungrü, I niube, tüsho I tsührübo muzholah; I zuzu kamde muwukhiuk’ de thasho, 6judüki api putungrünü mahkhaprübo ki anihbuh bedarübah. Apinü anihbuh ju khimdopü yungsho khimdopü dungjingbo ki bede ayübah, tüsho anihbuh putungrünü hühzonü api nuku phitjihbah; tüsho apinü anihbuh lünnü atankihbah.
7“Tüsho mihtsürü khülangnü api tsührübe azhoberü thsüde yinsho, alibe ju athrürü azhorü nangde muwukhiuk. 8Api niube thsüpü keoa lakhi alibenü nihbe putungrü mümürühsho, alibe ju arhokhitshihbah; apinü alibe khiungkerü ki yinpü alim müla, tümütüsho apinü anihbe ki mulungkide rhimodo. 9Apinü nihbuh tsührü thsungkheak alibe keojihsho, apinü anihbe ki nihbuh tsührübe nangde akheahbah. 10Apinü aniube püpü lusho, apinü anihbe ki tsühyungbe, khimmih yungsho yamkhün thsükhi alim mükeamkhi. 11Apinü alibe thsungkheak harü mahsam mürhimosho, sho tümü mulujihde alibe wukhiukshihbah.
Thiyih Bukkhi Yakzan
12“Shepünü mihtsürü khülang kinga sheshihbanü api asheshihbah. 13Tüshe apinü anihbuh aleangde mübinde Thrünpuhnü api khah ching keamshihsho, inü amokhitpü lakhi dangpung ching api tsode ayübah. 14Tüshe mihtsürü khülangnü lümkhi thsübah akhekhungnü khürü laksahsho, I kingaün sadam kheaknü bede tsoang tüsho laksahang.
15“Shepünü abuh yungsho abe shikbanü asheshihbah.
16“Shepünü mihtsürü ahüh-a lubah ayinba, yungsho api khah ching yimkhitsho api asheshihbah.
17“Shepünü abuh yungsho abe athrubanü asheshihbah.
18“ Mihtsürü rukachihbah khülang kheak lungnü kingsho yungsho khah zhimpungbah shangsho tüsho mihtsürü ju müshe tüshe yapkiu kheak yapsho, 19mihtsürü ju tso shuhbah asürü wungdo tsahsho, api lakbuh ju hahmülang müla; tütüshe api kim bahkhi dün jihlobah tüsho tsüde athsüngujihbeah.
20“ Mihtsürü khülangnü anihbuh athrürü yungsho aliberü azhorü shitsonü laka ju kheak sheshihsho api athsümüchibah. 21Tüshe azhorü ju nimung khülang yungsho mahne rhangdung lasho, api müthsümüchi; tümüde azhorü ju api kukruk ah.
22“ Mihtsürü shochihbah mihlaberü lakrhaka khungarü yurisho, tüshe alibe müyurisho, ayamkhünbuhnü akheangkhi yande api kheak mah thsübah; tüsho mahkhaprübonü zanzhakkhi nangde apinü ajihbah. 23Tüshe khitode yurisho, nünü rhangdung müthri rhangdung jihbah, 24mük müthri mük, hü müthri hü, khah müthri khah, jing müthri jing, 25atakkhi müthri atakkhi, yurikhi müthri yurikhi, alakkhi müthri alakkhi.
26“ Mihtsürü khülangnü anihbuh athrürü yungsho aliberü azhorü mük kheak laka thsümünimshihsho apinü mük dünkheak azhorü ju zuzu thsüde adükhebah. 27Apinü ahü lakkhijihsho apinü azhorü ju hü dün zuzu thsüde adükhebah.
Atungrü Hahmülang
28“ Moshipungnü mihtsürü khürü khusahsho, moshipung ju lungnü akingsahbah, tüsho ashih mütsüh; tüshe moshipung putungrü müthsümüchi. 29Tüshe moshipung junü müngühlim khude labah aputungrü ki mükheahshihbah mürihdode khürü khusahsho, ju lungnü akingsahbah, tüsho aputungrü she asheshihbah. 30Tütüshe api ki adün kheangsho, tümüpürü kheangbanü apinü jihbah anihbuh rhangdung rhokhitpü kuklah. 31Tsührü athrürü yungsho aliberü thsüthsü khusahsho, ha mahkhapkhi yande api ki rhimobah. 32Moshipungnü athrürü yungsho aliberü azhorü khusahsho, ju putungrünü azhorü putungrü kilim shotoyinchi 30 jihbah, tüsho moshipung ju lungnü akingsahbah.
33“ Mihtsürü khülangnü alokhün müyihdode zosho yungsho alo kiubah mülüpdode moshipung yungsho donki keamyuksho, 34alokhün putungrünü kukshahkhi dün jihbah; apinü aputungrü kilim sho jihbah tüsho ashekhi shiwüh ju api yo thsübah.
35“ Mihtsürü khürü moshipungnü püpürü yo yuria sheshihsho, arünü arhang lakhi moshipung yinbah adün ju achambah; tüsho ashekhi shiwüh she arü chambah. 36Tüshe moshipung junü müngühlim khuchoh de mükheahbah mürihdoa lasho, apinü moshipung müthri moshipung jihbah, tüsho ashekhi shiwüh ju api yo thsübah.
Currently Selected:
ABEKHIT 21: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
