ABEKHIT 22
22
Ashaklo Yakzan
1“ Mihtsürü khülangnü moshipung yungsho namfimihnu ahühbah laksahsho yungsho yinsho, apinü moshipung 1 dün moshipung 5 tüsho namfimihnu 1 dün namfimihnu 4 jihlobah. 2Ahührü khülang chakashungde azahkhi ngübah kinga sheshihsho, api thiyih bukkhi dünkheak amülim tümü müla. 3Tüshe ha ani akhiuk dunglim dünjisho thiyih bukkhi api mülimkhi labah.
Ahührünü dükde ashaklobah, tüshe api tümü mülasho anihbuhnü ahühkhi dün api azhorü thsüde ayinbeah. 4Ahührü khah ching moshipung yungsho donki yungsho namfimihnu arhangnü ngükhitsho, apinü mahne kinü alü thsüde ajihlobah.
5“ Mihtsürü khülangnü thulu yungsho kurungasolu ching anihbuh akam-shiwüh yimkipsho tüsho dükhea yünü püpürü lu ching yimtsühsho, apinü nihbuh lu yungsho kurungasolu ching yo atsübenü ashaklobah.
6“ Mo takmusubah ayangrung chingnü hode yünü hi rhipa zokhi, azhipkhi hi, yungsho thulu aniuabahsho, atakbuhnü alala shaklobah.
7“ Mihtsürü khülangnü api yamhingrü khah ching sho yungsho kukruk zojihbah ayam chingnü ahühsho, tüsho ahührü ju ngükhitsho apinü mahne kinü alü shaklobah. 8Ahührü ju müngükhitsho, thüyam putungrü ju apinü ayamhingrü kukruk ching akhah chunga la shi yungnü akheahpü mahkhaprü ki bedarübah.
9“ Jangachihara thsungkheak, moshipung, donki, namfimihnu yungsho khimmih, yungsho tümükhüh dükheakkhi khürünü api yo ah de thasho, ane chido mahkhaprü ki bedarübah; tüsho mahkhaprünü amülim jihbuhnü ayamhingrü ki mahne kinü alü shaklobah. 10Mihtsürü khülangnü nihbuh yamhingrü ki donki, moshipung, namfimihnu yungsho shiwüh khürü zojihbah shesho, yurisho yungsho kita bede tsobah, shenü müngüsho, 11judüki yamhingrü kukruk kheak apinü khah muchung de ane dükeak Atungpuh miki thiyuchihchim thsübah; aputungrünü ju leangkhibah, tüsho ashaklopü yihnüpü müla. 12Tüshe shiwüh ju ahüh-a lasho apinü aputungrü ki shaklobah. 13Ju ari-shiwühnü adütre kamde chakthünaka lasho, apinü amütsan thsüde hande arübah, tüsho ashaklopü yihnüpü müla.
14“ Mihtsürü khülangnü api yamhingrü kheaknü shiwüh müshih-a lubah aputungrü mübede yurisho yungsho shesho, apinü ashaklobah. 15Tüshe aputungrü ju shiwüh lung bea lasho amüshihrünü müshaklo. Shiwüh ju muloa lasho, amulokhi dün sho jihkhi junü adükheakkhi khaabahchoh.
Yakli tüsho Kingaün Yakzanbo
16“ Mihtsürü khülangnü anihbuhnü thiyu zoa mülade atsangkhit anünürü thsümünimsho, tüsho alibe lung yapsho apinü alibe kilim aniube thsüpü dünkheak jihbah. 17Alibe abuhnü api kilim jihpü zhikde lang thsunglosho, apinü alibe abuh kilim atsangkhit anünürü rhangchoki dünkheak jihkhi yande sho jihbah.
18“Wurük-huhrü sheshe rhangdung dülashih.
19“Shepünü shiwüh lung müzammürambanü tsükjide asheshihbah.
20“Atungpuh kheak hode shepünü püpü thrünpuh ki laksah-a kingaünbanü shahde adükheakshihbah.
21“Nüsanü hanrü dükheahmüchih yungsho api düjuno, tümüde Ijip lomi ching nüsa hanrü lakheah. 22Nüsanü khimoberü yungsho mürerü dükheahmüchih. 23Nüsanü arü kheahmüchihsho, tüsho arünü I ki zhisho, tsükjide inü arü zhikhi sobah; 24tüsho I bukakhiukkhi takde akambah, tüsho inü nüsa nukshangnü alaksahbah; nüsa niuberü ju khimoberü tüsho nüsa tsührübo mürerü kambah.
25“Nüsanü nüsa lung lakhi zhochihrü I mihtsürü ki sho nipshihsho, nüsanü api ki shonip-jihrü nangde müthsübeah; nüsanü api ki sholü dülu. 26Nünü thiyuchihchimde nü yamhingrü khimmih lusho, ani müyüzahyide api kilim jihloang. 27Tümüde ju lang api lamlambe khimmih ah. Api tümü ching yappü? Tüsho küyimki apinü I ki zhibanü, inü asobah, tümüde I a mihmuzhorü ah.
28“Nünü Thrünpuh düluhmüne, yungsho nüsa mihtsürü yakzanshuhrü dathru.
29“Nünü akhuh yimlukhi tüsho sangaso-kebo kingaün jihpü dashu. Nü tsührü adüjibuh I kilim jihang. 30Nünü nü moshipungbo tüsho namfimihnubo she ju ruk thsang. Abe lung nimung thüne labah; atizheah nipü nünü I kilim jihang.
31“Tüsho nü I mihtsürü amüsüh labah: nünü thulu ching arishiwühnü anguhsahkhi shih tümü dütsüh; nünü ju khihnu kilim jipa bahang.
Currently Selected:
ABEKHIT 22: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
