ABEKHIT 23
23
Thiyuro tüsho Mihmüthsüm Yakzanbo
1“Nünü akeangyu thiyusheak mahiuhbeah. Thiyuro mülakhi thiyumütsan thsüpü mihbukmuyukrü dürung. 2Amütsü rhimopü nünü boto düyan; yungsho thiyumütsan jihchoki thiyuro bephülappü thsüde boto kilim dütsang. 3Mahkhapkhi ching nünü zhochihrü mihtsürü ki jakdükheah.
4“Nünü nü riri moshipung yungsho donki tsode ngüsho api kilim belode arüjang. 5Nü mükheahnerü donki ahah khüp ajapa yapa ngüsho nünü ju düjitmusujang.
6“Nünü zhochihrü mahkhapkhi ching thiyuro dübephülapjih. 7Arükchihbo chingnü nü limshuang; amülim mülarü tüsho thiyuro larü dülaksah. Tümüde inü mihbukmuyuk alim müjih. 8Tüsho nünü buknim dülu, tümüde buknimnü mütsankhitpü mük tukshihchoh tüsho thiyuro yubo bephülapchoh. 9Nünü hanrü düjuno, tümüde nünü hanrü mulong mükheahlah, tümütüsho nüsa Ijip lomi ching hanrü lakheah.
Amuni Yakzan
10“Nünü kam thuruk nü lubo ching mükheanang tüsho hibo yimluang, 11tüshe kam thünepü ching nünü thulu ju müthsü tüsho ju ching mukhuhkhi düyimlu, junangde nüsa mihtsürü zhochihrünü atsühbah; tüsho tümü arünü aningshihbanü thulu ching lakhi shiwühbonü atsühbah. Nünü kurungasolu tüsho oliv dungbo kheak junangde thsang. 12Nünü nimung thuruk nü rhimo thsübah tüsho thüne nipü sühakhimbah, junangde nü moshipung le donki sühakhimbah, tüsho nü yamkhün ching azhorü tsührü tüsho khiungkerübo süh shilobah. 13I Atungpuhnü nü ki thakhi lüpdükhi aniang. Püpürü thrünpuhbo ki dütamkhüntamnü; arü mungbo she dütha.
Thünio Ato Mahsam
(Abe 34.18-26; Yuzüng 16.1-17)
14“Nüsanü kam khülang ching I kilim mahsam ki thünio mungang. 15Nüsanü phaüm muyukkhi yikhap thünio mungang; inü nüsa ki thiyukhüm jihkhi nangde Abib khinu akhukhitkhi nimungbo ching nüsanü nimung thüne phaüm muyukkhi yikhap tsühbah, tümüde ha khinu ching nüsa Ijip chingnü akhiukkheah. Sheshe I miki khahkeang darü. 16Nüsanü thulu ching mükheankhi akhuh asokhi hibo Yimlukhi Thünio laang; tüsho nüsanü thulu chingnü hibo Hanmukhungkhi Thünio laang. 17Kam khülang ching mahsam ki athrürübo Atungpuh nüsa Thrünpuh miki arang. 18Nüsanü I kilim laksah-a kingaünkhi thiyih ju phaüm yukkhi yikhap bede dükingaün; yungsho I kingaünkhi amüdang yapsu khiungde düzo. 19Nüsa lo chingnü akhuh asokhi sangaso Atungpuh nüsa Thrünpuh yam ching hande arang. Mihnu nunu abe niuhke ching dükhiung.
Yunirü tüsho Alokhikhi
20“Kheahang, nüsa limro ching kümshihpü tüsho inü tsanglungkhi dangpung ching nüsa bede yüzahshihpü nüsa müngüh yunirü khülang thiyichoh. 21Api ki kurhangang tüsho api düsheak aniang; api dazhih, tümütüsho nüsanü alakmihkhi apinü mübahjih, tümüde api kheak I mung lah. 22Tüshe nüsanü api düsheak anisho tüsho inü asukkhi alala rhimosho, nüsa riri ki I thiriri thsübah tüsho nüsa azhihrü ki azhihrü thsübah. 23Tümütüsho I yunirü nüsa müngüh yübah tüsho nüsa Amorrü, Hitrü, Perizrü, Kananrü, Hivrü tüsho Jebusrü lomi ching bede yüzahbah; tüsho inü arübo dükheakshihbah. 24Nüsanü arü thrünpuhbo ki mukhukning, yungsho mütankih, yungsho arü yande mürhimo; tüshe nüsanü arü shahde lahyuka bahang tüsho amüsüh dungjingbo abümnü yihkheamjang. 25Junangde nüsanü Atungpuh nüsa Thrünpuh tankihbah, tüsho apinü nüsa yikhap tüsho ke müngühjihbah. Tüsho inü nüsa bolungnü tukthsüdukram lude atsobah. 26Nüsa lo ching sheshe mühanmüchih yungsho bünkeangberü müla; inü nüsa kutsüp lashihbah.
27“Inü nüsa müngüh I trepü yüshihbah, nüsa yüpung mihtsürü alala bolung yingyingshihbah, tüsho nüsa riri alala rholode atsobah. 28Tüsho inü nüsa müngüh Hivrü, Kananrü, tüsho Hitrü yankhitshihpü leyü yüshihbah. 29Inü arübo nüsa müngühnü kam khülang chingnü müyankhit, jude yungsho alo ju zhikrangkhündo akambah tüsho mükeak ching shiwühbo nüsa thsungkheak khide hihde akambah. 30Nüsa hihde mükamyi khiungde tüsho lomi yamrüplurüp muluyi khiungde inü arü anini anininü nüsa müngühnü ayankhitbah. 31Inü nüsa aredung ju Amürüm Keto kheaknü Filistia Keto, tüsho loshelo chingnü Euphra Ayung khiungde athsüjihbah. Tümüde inü lomi ching larü nüsa khah ching jihbah, tüsho nüsa müngühnü ayankhitbah. 32Nüsanü arü ki yungsho arü thrünpuhbo ki tangzüng düthsü. 33Arübo nüsa lo ching dülashih, jude yungsho arünü I azhihde nüsa neak yihbeakshihbah. Tümüde nüsanü arü thrünpuhbo tankihsho, tsükjide ju nüsa ki qimürip labah.”
Currently Selected:
ABEKHIT 23: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
