ABEKHIT 24
24
Tangzüng Dükünglokhi
1 Atungpuhnü Mosa ki tha, “Nü le Aron, Nadab le Abihu, tüsho Israel azothsürü 70 I kilim atuang tüsho limshu chingnü kingaünang. 2Tüsho Mosa lang Atungpuh thüninde arübah, tüshe arübo a thüninde marü; yungsho api lung mihtsürübo muwutu.”
3Jumonü Mosanü akibah mihtsürübo ki Atungpuh yubo tüsho yakzanbo alala tha. Mihtsürü alalanü düsheak khülangnü alo tüsho tha, “Atungpuhnü athakhi yubo alala isanü arhimobah.” 4Mosanü ATUNGPUH yu alala thrüt. Tüsho apinü yapsu mükikde asürübah müzüng jing kheak kingaün sadam khülang thsü, tüsho Israel trük thürükheak mahne ayannü dungjing thürükheak mahne khim. 5Judüki apinü Israel athunu mihtsürü yüshih, tüsho arünü taka kingaünkhi tüsho moshipungbo laksah-a Atungpuh kilim mungtsü kingaün jih. 6Mosanü athiyih chamkhüh lubah müsühmüra-phuru ching yuk, tüsho chamkhüh lubah kingaün sadam kheak rhaka bah. 7Judüki apinü tangzüng hüm lu tüsho mihtsürübonü sode khe. Tüsho arünü tha, “Atungpuhnü athakhi alala isanü arhimobah tüsho anibah.” 8Tüsho Mosanü athiyih lubah mihtsürübo kheak rhakkih tüsho tha, “Ha Atungpuhnü nüsa kheak harü yubo alala yande tangzüngkhi thiyih ah.”
9Judüki Mosa, Aron, Nadab, Abihu, tüsho Israel azothsürü 70 wutu, 10tüsho arünü Israel Thrünpuh ngü. Tüsho api jing khüp ju shotolung-bluknü athsükhi limro thüning nangde müsühkhabündo alakheah. 11Tüshe Israel limberübo kheak apinü akhah müjipkih. Junangde arünü Thrünpuh ngü, tüsho arünü tsühyung.
Sinai Müzüng kheak Mosa
12 Atungpuhnü Mosa ki tha, “I kilim müzüng kheak atuang tüsho ju ching aleangang; tüsho inü nü kilim inü athrütkhi lungbeakbo, yakzan tüsho thiyukhümbo nünü arü ki thsangyushihpü jihbah.” 13Jumonü Mosanü api rungbuh Jihusua bebah tsahmusu tüsho Atungpuh müzüng kheak wutu. 14Tüsho apinü azothsürübo ki tha, “Ike nüsa kilim alode marüyi khiungde ha ching aleangang. Aron tüsho Hur nüsa lung lah. Mihtsürü khürü küpkhuk ngüsho ane kilim yüshang.” 15Judüki Mosanü müzüng ching wutu, tüsho amonü müzüng ju liudo. 16Kheakü Atungpuh müretahkhi Sinai Müzüng kheak aki, tüsho amonü ju nimung thuruk liudo, tüsho athüne nipü apinü amo phulungnü Mosa ji. 17Israelrü mük ki müzüng müjuk kheak Atungpuh müretahkhi ju aniuabahbe motru nangde alakheah. 18Jumonü Mosanü amo phulung ju yüzah tüsho müzüng kheak wutu. Tüsho Mosa ju nimung yirü tüsho tsüngre yirü müzüng kheak lakheah.
Currently Selected:
ABEKHIT 24: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
