ABEKHIT 25
25
Arüngkhimyam thsungkheak Jihchungkhibo
(Abe 35.4-9)
1Judüki Atungpuhnü Mosa ki tha: 2“I kilim kingaün hande arüpü Israelrü ki thaang. Mihbüm abannü mulongsahde ajihkhi I thsungkheaknü leangkhiang. 3Tüsho nünü arü kheaknü kingaün harübo luang: suna, shotoyinchi, müwayinchi; 4biyi le mürümmuchu tüsho aneakrüm hing, atsüdak khimthünak, tüsho mihnu nam; 5namfimihnupung küp amürüm; atsüdak shihküp; akasia sang; 6tsünpungbo thsungkheak moke; amujube müdangke tüsho rhümthüneabe thsungkheak thüneathürabebo; 7lungmütribo, amükeamrü khim tüsho treangkhümbe ching yukpü lungbo. 8Tüsho arünü I khilim arüngakopung khülang thsüshang, junangde I arü bolung labah. 9Inü nü ki huhpü lakhi jakjak ha arüngkhimyam tüsho binkiulungkiubo thsang.
Tangzüng Sangdan
(Abe 37.1-9)
10“Tüsho arünü akasia sangnü sangdan thsübah; ayunglim khahnap 2 kheak damshakkhüh, atolim khahnap I kheak damshakkhüh, tüsho achanglim khahnap I kheak damshakkhüh. 11Aleanglim tüsho alunglim suna müthsün lüpkihang tüsho amünküp alala yande suna yihkihang. 12Nüsanü ju thsungkheak suna phuhpho phüyi thsang, tüsho amühit phüyi ching yukang; phuhpho mahne thripkhüh kheak, tüsho püpü mahne thripkhüh kheak labah. 13Nüsanü akasia sangnü akhrihbe sangbo thsang tüsho sunanü mujudoang. 14Nüsanü akhrihbebo ju sangdan rheangbo kheak phuhphobo ching yukang, junangde jurünü sangdan shuhbah. 15Akhrihbebo ju sangdan phuhphobo ching labah; jurübo ju chingnü müyihkhit. 16Tüsho sangdan ching ju inü nüsa kilim jihkhi thiyukhümbo thrütkihkhi lungbeak mahne yukang. 17Nüsanü mihmüthsüm binkiu suna müthsünnü thsang; ayunglim khahnap 2 kheak damshakkhüh tüsho atolim khahnap I kheak damshakkhüh labah. 18Tüsho nüsanü sunanü kingde cherubim mahne thsübah; mihmüthsüm binkiu mahne akheam kheak thsang. 19Akheam khülang kheak cherub khülang thsang, tüsho cherub khülang püpü akheam kheak thsang; nüsanü mihmüthsüm binkiu khülang akheam mahne kheak cherubim thsang. 20Tüsho cherubimnü arü ghidükeangbo mihmüthsüm binkiu lüpdode akulim chungkihbah, tüsho ane miro kheahachihbah; cherubim mirobo ju mihmüthsüm binkiu lim abinbah. 21Nüsanü sangdan mikheak mihmüthsüm binkiu yihkihbah, tüsho inü ajihpü lakhi lungbeak mahne sangdan ching yukang. 22Tangzüng sangdan kumung lakhi cherubim mahne dükeaknü inü nü shorubah tüsho Israelrü thsungkheak I yukhümbo alala jihbah.
Yikhap Dükhüm
(Abe 37.10-16)
23“Nüsanü akasia sangnü dükhüm thsang; ayunglim khahnap 2, atolim khahnap I, tüsho achanglim khahnap 1 kheak damshakkhüh. 24Nüsanü ju kheak suna müthsün lüpkihang tüsho alala mükamde suna yihkihang. 25Nüsanü mükamde akümlopü müyikhühnü thsang, tüsho akümlopü alala mükamde suna yihkihang. 26Tüsho nüsanü ju thsungkheak suna phuhpho phüyi thsang, tüsho amühitbo ching ajing phüyi abande yukang. 27Phuhphobo ju dükhüm shuhpü khrihbebo wuklode akümlopü thüninde yukang. 28Nüsanü akhrihbebo ju akasia sangnü thsang, tüsho ju kheak suna lüpkihang tüsho jurünü dükhüm shuhang. 29Nüsanü phurubo, pungbo, phühbo, tüsho phurusükbo yukhu kingaünpü suna müthsünnü thsang. 30Tüsho nüsanü kamruhroro I miki dükhüm kheak amüsüh yikhap zoang.
Tsünpung Dubopung
(Abe 37.17-24)
31“Nüsanü suna müthsünnü kingde tsünpung dubopung thsang. Adung, adüthrün, pungbo, züt thsükhibo tüsho sangbünbo bümkhüh lang thsang. 32Tüsho arheanglimnü adüthrün thuruk akhiukshang: adubopung düthrün mahsam thripkhüh tüsho mahsam püpü thrip labah. 33Almond sangbün duduhde tüsho apungkhi nangde pung mahsam adüthrün khülang kheak kihbah, mahsam ju püpü düthrün kheak kihbah, tüsho alala rukhühnü adüthrün thuruk tsünpung dubopung kheaknü akhiukshang. 34Tsünpung dubopung kheak pung phüyi aban almond pungkhi nangde sangbün züt thsükhibo labah. 35Akhuhbe dudu düthrün khüp aduduh khülang, mahnepü dudu düthrün khüp aduduh khülang, mahsampü dudu düthrün khüp aduduh khülang–alalanü adüthrün thuruk tsünpung dubopung chingnü akhiukshang. 36Aduduhbo le adüthrünbo ju pangkhüh lang akingkhi suna müthsünnü athsübah. 37Jushu tsünpung thüne thsübah ju kheak zhipshang, junangde ju miki yinshihbah. 38Tüsho mokhih müjipbe le phurubeakbo ju suna müthsünnü thsang. 39Tsünpung dubopung tüsho kukrukbo alala suna müthsün khahngak 35nü thsang. 40Jurübo inü nüsa ki müzüng kheak huhkhi yande thsang.
Currently Selected:
ABEKHIT 25: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
