ABEKHIT 26
26
Arüngkhimyam
(Abe 36.8-38)
1“Nüsanü zhindokhim ching khimthünak atsüdak, biyi, mürümmuchu tüsho aneakrüm hing keakyukde athsükhi thürü yukde arüngkhimyam thsang; thsüsonungnürünü athsükhi cherubim yukde keakang. 2Zhindokhim ayunglim khahnap 28, tüsho atolim khahnap 4 labah. Tüsho zhindokhim aban akeara rukhüh labah. 3Zhindokhim phüngü ju rukhüh thüreruang, tüsho püpü phüngü rukhüh thüreruang. 4Nüsanü athürerukhi zhindokhim khülang münkheam kheak aleanglim biyi hingnü rhedoang tüsho mahnepü zhindokhim kheak she jude thsang. 5Zhindokhim thürerukhi khülang akheambe kheak arhedokhi thünim yihkihang tüsho mahnepü akheam kheak thünim yihkihang. 6Tüsho nüsanü zhindokhimbo wuhrupü sunanü awuklobe thünim thsang, junangde ju arüngkhimyam khülang labah.
7“Nüsanü arüngkhimyam kumung phudopü mihnu namnü zhindokhim thürükheak khülang thsang. 8Zhindokhim aban ayunglim khahnap 30, atolim khahnap 4nü thsang; tüsho zhindokhim thürükheak khülang alala akeara rukhühnü thsang. 9Arü phüngü khülang ching tüsho thuruk püpü de thüreruang. Thuruk ju arüngkhimyam mikhuh ki mahne thsüde naploang. 10Zhindokhim mahne chamshakde athürerukhi akheam aban kheak aleanglim arhedokhi thünim yukang.
11“Tüsho nüsanü müwayinchinü awuklobe thünim thsübah arhedokhibo ching yukang, tüsho khim ju wukrubah khülang kamshang. 12Zhindokhim aningkhi junü arüngkhimyam dunglim zhinang. 13Khimyam thrip abande aningkhi zhindokhim ayunglim khahnap 1nü zhindoang. 14Namfimihnupung küp rung khiungkhi tüsho mihnu küpbonü khimyam muhiudobe thsang.
15“Tüsho nüsanü arüngkhimyam thsungkheak akasia sangnü sangbeakbo thrüna zhipshang. 16Sangbeak aban ayunglim khahnap 10 tüsho atolim khahnap 1 kheak damshakkhüh labah. 17Sangbeak abande arhükarünpü mahne mujukkhitshang. Arüngkhimyam sangbeak alala jude thsang. 18Arüngkhimyam düjinglim sangbeak muku thsang, 19Sangbeak muku khüp shotoyinchi thranyukbebo yirü sangbeak mujukkhitkhi aban athranyukbe mahnene thsang. 20Arüngkhimyam dukulim sangbeak muku thsang, 21tüsho shotoyinchi thranyukbebo yirü, sangbeak aban mahnene thsang. 22Arüngkhimyam aniyüzahlim akheam lim sangbeak thuruk thsang, 23Tüsho arüngkhimyam dunglim amühit mahne thsungkheak sangbeak mahne thsang. 24Harü amühit sangbeakbo ju ajing limnü aku lim khiungde thoruang. Amühit mahne kamshihkhi sangbeakbo junangde thsang. 25Junangde sangbeak tizheah tüsho shotoyinchi thranyukbebo thürükheak thuruk, sangbeak aban mahnene labah.
26“Tüsho nüsanü akasia sangnü akhrihbe thsang; arüngkhimyam thripkhüh sangbeakbo thsungkheak phüngü, 27arüngkhimyam püpü thrip sangbeakbo thsungkheak akhrihbe phüngü, tüsho limshu aniyüzahlim arüngkhimyam sangbeakbo thsungkheak phüngü. 28Aphulung khrihbe junü sangbeakbo akheamnü akheam khiungde akimhobah. 29Sangbeakbo kheak suna yihkihang, akhrihbebo tholopü phuhphobo sunanü thsang tüsho akhrihbebo kheak suna yihkihang. 30Nüsa ki müzüng kheak akearaa huhkhi yande arüngkhimyam ju thsang.
31“Nüsanü zhindokhim ju biyi, mürümmuchu, aneakrüm hing tüsho khimthünak atsüdak keakkhinü thsang. Ju athsüsorünü athsükhi cherubim keakyukde thsang. 32Ju suna yihkihkhi akasia sang dungjing phüyi kheak wuhkih-a zhinang, tüsho shotoyinchi dubopung phüyi kheak zhipshang. 33Zhindokhim ju awuklobe kheaknü zhinang tüsho ju dunglim tangzüng sangdan zoang. Zhindokhim junü Khide Amüsüh Dangpung kheaknü Amüsüh Dangpung büthsüjihbah. 34Khide Amüsüh Dangpung ching lakhi tangzüng sangdan kheak mihmüthsüm binkiu yihkihang. 35Arüngkhimyam dukulim zhindokhim wungdo dükhüm zoang tüsho düjinglim ju mikhuh tsünpung dubopung zoang.
36“Nüsanü arüngkhimyam ripit zhindokhim ju biyi, mürümmuchu, aneakrüm hing tüsho khimthünaknü yak khode thsang. 37Tüsho zhindokhim thsungkheak akasia sangnü dungjing phüngü thsang, tüsho ju kheak suna yihkihang; awuklobebo ju suna tüsho dungjingbo thsungkheak müwayinchinü adubopungbo phüngü thsang.
Currently Selected:
ABEKHIT 26: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
