ABEKHIT 27
27
Kingaün Sadam
(Abe 38.1-7)
1“Akasia sangnü kingaün sadam achanglim khahnap 3nü thsang; ayunglim khahnap 5 tüsho atolim khahnap 5 shahrihkhühnü thsang. 2Amühit phüyi kheak ajuh phüyi thsang; ajuhbo le kingaün sadam ju khülang labah, tüsho müwayinchinü yihdoang. 3Awah wupü keangkihphüh tüsho mokhih müjipbe, müsühmüra-phuru, tsapdüthreang tüsho mophühbo thsang; phühlung alala müwayinchinü thsang. 4Müwayinchinü ayikeang khülang thsang tüsho amükbo kheak müwayinchi phuhpho phüyi thsang. 5Ayikeang ju kingaün sadam aphulung khiungde wutupü thsüde adamkhi khüp yukang. 6Kingaün sadam thsungkheak akasia sangnü akhrihbebo thsang, tüsho jurü kheak müwayinchi yihkihang. 7Akhrihbebo ju phuhphobo ching yukang, tüsho akhrihbebo ju kingaün sadam hanpü thsüde thrip mahne ching yukang. 8Inü nüsa ki müzüng kheak lümkhi huhkhi yande kingaün sadam ju sangbeakbonü akukde thsang.
Arüngkhimyam Limkhuh
(Abe 38.9-20)
9“Nüsanü arüngkhimyam thsükihang. Düjinglim ju ayunglim khahnap 100 tüsho zhindokhim atsüdak khimthünak luang. 10Dungjing muku tüsho athranyukbe muku müwayinchinü thsang. Dungjingbo wuklobe tüsho yinchi-khrihbo shotoyinchi luang. 11Dukulim thrip she ayunglim khahnap 100 tüsho zhindokhimbo dungjing muku tüsho müwayinchi müchinbebo muku, tüsho dungjingbo kheak shotoyinchi wuklobebo le yinchi-khrihbo labah. 12Aniyüzahlim thrip atolim khahnap 50 tüsho zhindokhimbo, dungjing thürü tüsho athranyukbe thürü labah. 13Aniakhiuklim thrip atolim khahnap 50 labah. 14Ripit khülang kheak zhindokhim ayunglim khahnap 15, dungjing mahsam tüsho athranyukbe mahsam labah, 15tüsho püpü thrip zhindokhim ayunglim khahnap 15, dungjing mahsam tüsho athranyukbe mahsam labah. 16Ripit thsungkheak zhindokhim ayunglim khahnap 20, biyi le mürümmuchu tüsho aneakrüm hing khim-keakrünü atsüdak khimthünaknü akeakkhi labah. Ju ching dungjing phüyi tüsho athranyukbe phüyi labah. 17Limkhuh mükamde alala shotoyinchi khrihbebo labah; awuklobe ju shotoyinchi tüsho athranyukbe ju müwayinchi labah. 18Limkhuh ju ayunglim khahnap 100 tüsho atolim khahnap 50, ju lung tsüde akeakkhi zhindokhim achanglim khahnap 5, tüsho müwayinchi thranyukbebo labah. 19Arüngkhimyam ching mukhungmüdan kukrukbo, achingsang alala müwayinchi labah.
Tsünpung Kümpü
(Lev 24.1-4)
20“Tsün thsungkheak oliv chingnü anitkhitkhi atsangkhit moke nü kilim lude arüpü Israelrü ki thiyukhüm jihang, junangde tsünpung ju müdüchingde trude alabah. 21Ashorupung khimyam, zhindokhim wungdo lim tangzüng sangdan miki, Aron tüsho api tsührübonü arenü yapsu khiungde Atungpuh miki tsünpung takanua zobah. Ha Israelrü thsung thsüde arü lünkhe amuyung yakzan thsükhi labah.
Currently Selected:
ABEKHIT 27: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
