ABEKHIT 28
28
Amükeamrü Khimmih
(Abe 39.1-7)
1“Kheakü nü khiung Aron tüsho api tsührübo Nadab, Abihu, Eleazar tüsho Ithamar I ki amükeamrü thsüde tankihpü Israelrü bolungnü bede arang. 2Nü khiung Aron thsungkheak api müretahpü tüsho akheahakhampü amükeamrü khimmihbo thsüjang. 3Inü lümlung jihkhi athsüso mihtsürübo ki api tsangkhitde Aron khimmihbo thsüjihpü thaang, junangde apinü I ki amükeamrü thsüde tankihbah. 4Arünü athsüpü khimmihbo ju harü labah: treangkhümbe, amükeamrü khim, shulünkhim, tsüde akeakkhi pangkhümpü, kuhingbe, tüsho chimrümbe. Junangde arünü nü khiung Aron tüsho api tsührübo thsungkheak amüsüh khimmihbo thsübah, junangde apinü amükeamrü thsüde I tankihbah.
5“Arünü suna, biyi, mürümmuchu, aneakrüm hing, tüsho khimthünak atsüdak lubah, 6tüsho arünü suna amükeamrü khim ju biyi, mürümmuchu, aneakrüm hing tüsho khimthünak atsüdak, thsüsonungnürünü akeakkhinü athsübah. 7Dubuhrümbe ju arhüklopü thsüde akheam kheak yihkihbah. 8Junangde chimrümbe ju suna, biyi, mürümmuchu, aneakrüm hing, tüsho tsüdakde akeakkhi khimthünak labah. 9Jushu nünü lungmütri mahne luang tüsho jurü kheak Israel tsührübo mung kheande dokihang: 10lung khülang kheak arü thuruk mung, tüsho püpü lung kheak thuruk mung, arü zübekhi yande alabah. 11Mütsanyüm kheak dokihkhi nangde lung kheak dokihbenü Israel tsührübo mung lung mahne kheak kheande dokihang. Nünü jurübo sunanü züt thsüjang, 12tüsho ju dubuhrümbe kheak Israel tsührübo mümihpü rhükkihang. Aronnü api dubuh kheak Atungpuh miki mümihpü mungbo hanbah. 13Sunanü züt thsang 14tüsho nünü suna müthsün mahne wuhrünliu chitang, tüsho wuhrünliu chitkhi ju züt thsükhi kheak rhükkihang.
Treangkhümbe
(Abe 39.8-21)
15“Adüngakhi mütsanjihpü treangkhümbe rhimosorünü arhimokhi amükeamrü khim nangde thsang: suna, biyi, mürümmuchu, aneakrüm hing, tüsho tsüde yakkhokhi khimthünak. 16Ha shahrihkhühnü mahne thsüde adapbah: ayunglim kipkhüh, atolim kipkhüh. 17Tüsho ju kheak shotolung ru phüyinü yihkihang. Akhuhbe ru ching shoto mürümlung, kelülülung tüsho lungmüzhak yukbah; 18mahnepü ru ching lungphüyak, shotolung bluk, tüsho shotolungmüküp; 19asampü ru ching athüyinlung, mürelung-müküp tüsho mürelung-bluk; 20tüsho aphüyipü ru ching phüyakmuchu lung, lungmütri, tüsho asherühü. Jurübo sunanü amükhipkihbah. 21Tüsho lung thürükheak mahne kheak ju Israel trük abande Jakob tsührübo mung kheande dokihang. 22Treangkhümbe ju suna müthsünnü liu nangde wuhrünliu chitde thsang. 23Suna phuhpho mahne thsang tüsho treangkhümbe akulim akheam mahne kheak rhükkihang. 24Tüsho suna liu mahne ju treangkhümbe münkheam kheak phuhpho mahne ching rhükkihang; 25tüsho wuhrünliu mahne chitkhi ju züt thsükhi mahne kheak rhükkihang, tüsho dubuhrümbe amükeamrü khim mikhuhlim yihkihang. 26Suna phuhpho mahne thsang tüsho amükeamrü khim alunglim treangkhümbe mahne akheam kheak yihkihang. 27Suna phuhpho püpü mahne thsang tüsho dubuhrümbe mahne kheak amükeamrü khim mikhuh, yak khode akeakkhi chimrümbe kumung athüredung kheak yihkihang. 28Treangkhümbe phuhpho mahne ju chimrümbe kheak chingkihde biyi liunü amükeamrü khim kheak rhükkihang, junangde trangkhümbe ju khim kheaknü müheankhit. 29Junangde Aronnü Atungpuh miki amüsüh dangpung ching yüchoki mutuklode mümihpü atreang kheak mahkhap treangkhümbe Jakob tsührübo mung hanbah. 30Tüsho mahkhap treangkhümbe kheak ju Urim tüsho Thummim yihkihang, tüsho Aron Atungpuh miki yüchoki jurü akhüh kheak labah. Junangde Israelrü mahkhappü Aron khüh kheak Atungpuh miki mutuklode ahanbah.
Amükeamrü Khimmih Püpü
(Abe 39.22-31)
31“Amükeamrü shulünkhim alala biyinü thsang. 32Aku chungkhitshihpü aphulung ching yeahshungang; mürukrüpshihpü amung yeande kümloang. 33Amung yean alala mükamde biyi, mürümmuchu tüsho aneakrüm hingnü tsarümkiu thsang, tüsho alala mükamde arü dükeak suna trüngtrüngpü thsang: 34Suna trüngtrüngpü tüsho tsarümkiubo shulünkhim mung yeande lakkhimuloachihde yukang. 35Aronnü tankihchoki ha khümbah. Api Atungpuh miki amüsüh dangpung ching yüzahchoki tüsho akhiukchoki trüngtrüngpü düsheak sobah, junangde api müshe.
36“Suna müthsünnü kutsünpü khülang thsang tüsho mütsanyüm kheak nangde ju kheak ha thrütkihang: ATUNGPUH KILI M A MÜSÜH . 37Kuhingbe kheak yihkihpü thsüde ju kheak biyi liu rhükkihang; ju kuhingbe mikhuhlim labah. 38Ha Aron kingkang kheak labah, tüsho Israelrünü müsühkhitde ajihkhi amüsüh thsambahbo ching mülimkhi apinü ahanbah. Ju Aron kingkang kheak mutuklode alabah, junangde arübo ju Atungpuh ki aleangkhikhukbe labah.
39“Khimthünak atsübonü Aron pangkhümpü le kuhingbe tüsho yak khode chimrümbe keakang.
40“Aron tsührübo mung thupü tüsho akhamshihpü pangkhümpübo, chimrümbebo tüsho kuthranbo thsüjang. 41Junangde harü nünü nü khiung Aron tüsho atsührübo kheak khümjang. I ki amükeamrübo thsüde I tankihpü nünü arü mujude tsangkhitang. 42Chim kheaknü pho khiungde phü yihdopü alunglim yihbe khimthünak thsüjang. 43Aron le api tsührübonü arü ashorupung khimyam ching yüzahchoki yungsho amüsüh dangpung ching tankihpü kingaün sadam ki yüchoki jurü yihbah, junangde arünü amülim müthsü tüsho müshe. Ha lünnü Aron tüsho api tsühsoniuso thsungkheak thiyuzüng labah.
Currently Selected:
ABEKHIT 28: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
