ABEKHIT 29
29
Amükeamrübo Müsühkhitkhi
(Lev 8.1-36)
1“Arünü amükeamrübo thsüde I tankihpü nünü ha ruk arü müsühkhitang: moshipung nunu 1 tüsho namfimihnupung 2 lapha mükihkhi luang. 2Tüsho wheat yo atsüdak ayikangkangnü phaüm muyukde, yikhap le yikhapkheambo müdangke bede thsang. 3Jurübo muluk khülang ching yukbah moshipung le namfimihnupung 2 lungnü jihang. 4Tüsho Aron le atsührübo ashorupung khimyam limro ki bede arang tüsho kemüyihjang. 5Khimmihbo luang tüsho Aron kheak pangkhümpü, shulünkhim, amükeamrü khim, tüsho treangkhümbe khümyukjang. Yak khode akeakkhi chimrümbenü amükeamrü khim ju rümkihjang. 6Aku kheak kuhingbe tüsho kuhingbe kheak amüsüh kuthran yihkihjang. 7Amujube müdangke luang tüsho aku kheak yihkihde mujude-müsühkhitang. 8Api tsührübo bede arang tüsho arü kheak pangkhümpü khümyukjang, 9tüsho arü ku kheak kuthran thranjang. Aron le atsührübo kheak chimrümbe rümjang. Amükeamrü thsüpü ju lünnü arü yo thsüpü thiyuzüng labah.
10“ Moshipung ju ashorupung khimyam mikhuh lude arang, tüsho Aron le atsührübonü arü khah aku kheak nimbah. 11Ashorupung khimyam ching yüzahpung kheak Atungpuh mikinü ju laksahang. 12Moshipung thiyih khürü nü yingkhing kheaknü lubah kingaün sadam juhbo kheak yihkihang, tüsho thiyih alala kingaün sadam jing kheak dunga bahang. 13Alunglim bukning muhiukhi müdang alala, amüsan atsübe, tüsho amügüe mahne amüdang bede luang tüsho I kilim kingaünde kingaün sadam kheak takang. 14Tüshe moshipung shihtsü, aküp, tüsho arhubo alala binpung aleanglimnü takang. Ha neak kingaün labah.
15“Nünü namfimihnupung 1 luang, tüsho Aron le atsührübo khah aku kheak nimkihbah. 16Ju laksahang tüsho athiyih lubah kingaün sadam alala mükamde rhakkihang. 17Namfimihnupung ju adütre kamde khapthünakang tüsho bukningbo le ajingbo müsühbah aku tüsho akhapthünakkhibo lung yukruang. 18Jushu namfimihnupung abümnü kingaün sadam kheak takang. Haju Atungpuh kilim arhümthüneade monü taka kingaünkhi ah.
19“Namfimihnupung püpü luang, tüsho Aron le atsührübonü arü khah aku kheak nimkihbah. 20Ju laksahbah athiyih khürü luang tüsho Aron le atsührübo nuku müzhean kheak, tsülim khahkutopübo kheak, tüsho tsülim jingkutopübo kheak yihkihjang. Tüsho kingaün sadam alala mükamde athiyih rhakkihang. 21Tüsho kingaün sadam kheaknü athiyih khürü tüsho amujube müdangke luang tüsho Aron le atsührübo khimmihbo kheak rhakkihang. Jushu api le atsührübo tüsho arü khimmihbo müsühkhitbah.
22“Ha namfimihnupung kheaknü amüdang, amokungro müdang, atrün, amüsan atsübe, amüdang bede amügüe mahne chido tüsho tsülim pho luang. (Ha amüsühkhitbe namfimihnupung ah.) 23Phaüm muyukkhi yikhap muluk Atungpuh miki lakhi chingnü yikhap takkhi khülang, amüdang bede anungkhi yikhap khülang tüsho yikhapkheam khülang de luang. 24Harü alala Aron le atsührübo khah ching yukjang tüsho Atungpuh miki müleamde kingaünkhi jihang. 25Jushu arü khah chingnü jurübo luang tüsho Atungpuh kilim monü arhümthüneade taka kingaünkhi lung kingaün sadam kheak takang. 26Jushu nünü Aron müsühkhitpü thsungkheak namfimihnupung khüh ju lubah Atungpuh miki müleamde kingaünang, tüsho ju nü shihcham labah. 27Atsangkhitpü-rhimo namfimihnupung Aron tüsho atsührübo yo müsühkhitang: müleamde kingaünkhi akhüh tüsho handarü ajihkhi apho. 28Ha kamruhroro Aron le atsührübo thsungkheak Israelrü kilimnü mutukzhak shihcham labah. Ha Israelrünü arü mungtsü kingaün chingnü Atungpuh kilim arung jihkhi labah.
29“Aron khimmih amüsüh ju api dunglim arü amüsüh tsangkhitchoki yihpü thsüde api tsühsoniusobo yo thsübah. 30Tsührü shepünü api müthri amükeamrü thsüba tüsho amüsüh dangpung ching tankihpü ashorupung khimyam ching arübanü ju nimung thüne yihbah.
31“Amüsüh-tsangkhit thsungkheak namfimihnupung 1 luang tüsho shih ju amüsüh dangpung chingnü khiungang. 32Ashorupung khimyam yüzah limro kheak Aron tüsho api tsührübonü namfimihnupung shih le muluk ching lakhi yikhap tsühbah. 33Arü amüsüh-tsangkhitpü dünthsükhi harü jihchungkhibo arünü atsühbah. Tüshe püpürünü a jurü mütsüh, tümütüsho jurü amüsüh ah. 34Tüsho amüsüh-tsangkhitbe namfimihnupung shih yungsho yikhap khürü yapsu khiungde aninga lasho takabahang. Ju mütsühbeah, tümütüsho ha amüsüh ah.
35“Inü nü ki thiyukhüm jihkhi lüpdükhi ayannü nimung thüne lude Aron tüsho api tsührübo amüsühtsangkhit rhimoang. 36Nimung aban dünthsükhipü moshipung 1 neak kingaün jihang. Dünthsükhide kingaün sadam ju tsangkhitang, tüsho müdangke mujude ju müsühkhitang. 37Kingaün sadam thsungkheak nimung thüne dünthsükhiang tüsho ju müsühkhitang. Jushu kingaün sadam ju khide amüsüh labah, tüsho tümüpürü ju qiubanü amüsüh kambah.
Nimung Aban Kingaün
(Wüh 28.1-8)
38“Nünü nimung aban kam khülang bankhi namfimihnunu 2 kingaün sadam kheak mutukzhakde jihang. 39Khülang yapsu jihang tüsho püpü ju shuhyini ching jihang. 40Namfimihnunu akhuhbe lung wheat yikangkang atsüdak khahngak 1 ching oliv müdangke pungdüchi 1 yukbah jihang. Yukhu pungdüchi 1 kingaünde dunga bahang. 41Mahnepü namfimihnunu ju shuhyini ching laksah-a kingaünang, tüsho yapsu jihkhi ayikangkang, oliv müdangke tüsho yukhu lungnü Atungpuh kilim arhümthüneade taka kingaünang. 42Ha taka kingaünkhi ju lünnü ashorupung khimyam yüzah limro kheak Atungpuh miki mutukzhakde jihde alabah. Ju ching inü nü shorubah tüsho nü ki asukbah; 43ju ching inü Israelrü she ashorubah, tüsho ju dangpung I müretahkhinü atsangkhitbah. 44Jumonü inü ashorupung khimyam le kingaün sadam müsühkhitbah tüsho Aron le api tsührübo I tankihpü amükeamrübo thsüpü müsühkhitbah. 45Judüki I Israelrü lung labah, tüsho arü Thrünpuh thsübah. 46Arünü I ju Ijip chingnü arü bekhitkhi Atungpuh arü Thrünpuh ah de amükheahbah, junangde I arü bolung labah. I Atungpuh arü Thrünpuh ah.
Currently Selected:
ABEKHIT 29: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
