ABEKHIT 30
30
Jinjinlak Kingaün Sadam
(Abe 37.25-28)
1“ Jinjinlak takpü akasia sangnü kingaün sadam khülang thsang. 2Ayunglim khahnap 1, atolim khahnap 1, tüsho achanglim khahnap 2nü arihkhühnü thsang. Ju kheak ajuhbo kihshang. 3Aku le athrip alala tüsho ajuhbo suna müthsünnü lüpdoang, tüsho amung yeande suna yukang. 4Ju hanbe suna phuhpho mahne thsang tüsho amung yean khüp ahanbe sangkhrih tholopü thrip mahne kheak yihkihang. 5Harü sangkhrihbo akasia sangnü thsang tüsho sunanü lüpdoang. 6Ha kingaün sadam ju tangzüng sangdan mikhuh zhinkhi khim aleanglim zoang. Ju dangpung ching inü nü shorubah. 7Aronnü yapsu aban tsünpung kümpü arüchoki kingaün sadam kheak jinjinlak takbeah. 8Apinü shuhyini ching tsünpung takkihchoki jinjinlak taklobeah, junangde jinjinlak ju lün alala thsungkheak mutukzhakde Atungpuh miki takde alabah. 9Ha kingaün sadam kheak püpü jinjinlak, yungsho taka kingaün yungsho hi kingaün, tüsho ayungbe kingaün düjih. 10Aronnü ha juhbo kheak kam ching khülang ki dünthsükhiang. Ha kam ching khülang ki dünthsükhipü ju lünbo thsungkheak neak kingaün thiyih lungnü jihang. Ha Atungpuh kilim khide amüsüh lah.”
Atungpuh Lapung Khimyam Ruk
11 Atungpuhnü Mosa ki tha, 12“Küyimki nünü Israel mihtsürü wühkhe lubanü, mihtsürü abannü nihbuh rhangdung thsungkheak adün jihbeah, junangde wühkhe luchoki api kheak arüm marü. 13Wühkhe ching kheyukrü abannü arüngyam ching yo shekel yande gera 20 adünkhi shekel chamshakkhüh jihbeah. Ha shekel chamshakkhüh ju Atungpuh kilim kingaünkhi ah. 14Wühkhe ching kheyukrü aban kam 20 akumungnü Atungpuh kilim kingaün jihbah. 15Nüsa rhangdung dünthsükhipü thsungkheak Atungpuh kilim kingaün jihchoki alarünü shekel chamshakkhüh kheak hode müjih tüsho zhochihrünü nükde müjih. 16Dünthsükhikhi sho ju Israelrü kilimnü leangkhiang tüsho ashorupung khimyam mukhungmüdan thsungkheak ahoriang. Haju nüsa rhangdungbo thsungkheak dünthsükhide Atungpuh miki Israelrü thsungkheak mümihkhi khülang labah.”
Müwayinchi Müsühmüra-phuru
17 Atungpuhnü Mosa ki tha, 18“ Müsühmürapü thsungkheak müwayinchi dubopung kihde müwayinchi müsühmüra-phuru khülang thsang. Hoju ashorupung khimyam le kingaün sadam dükeak zoang tüsho ju ching ke yukang. 19Aron tüsho api tsührübonü ju chingnü arü khah tüsho jing müsühbah. 20Küyimki arünü ashorupung khimyam ching yüzahbanü, arünü kenü amüsühbah, junangde arü müshe. Kheaküshe, küyimki arünü ATUNGPUH kilim monü taka kingaün jihde I tankihpü kingaün sadam ki yübanü, 21arünü arü khah tüsho jing müsühbah, junangde arü müshe. Ha lünnü Aron tüsho api tsühsoniuso lünbo thsungkheak thiyuzüng labah.”
Mujude-müsühkhitbe Müdangke
22 Atungpuhnü Mosa ki tha, 23“Atsüdak thüneathürabe harü luang: rhümthüneabe azhihzhih khahngak 6, aniung neakrüm-sungsung khahngak 3, thüre athüneabe khahngak 3, 24tüsho kassia moli khahngak 6–alala arüngakopung shekel ayannü–tüsho oliv müdangke pungdüchi 4. 25Thüneabe nangde düsahde mujude-müsühkhitbe müdangke amüsüh thsakhamang. 26Hanü ashorupung khimyam tüsho tangzüng sangdan mujude-müsühkhitang; 27dükhüm tüsho kukrukbo, tsünpung dubopungbo tüsho kukrukbo, tüsho jinjinlak kingaün sadam; 28pungphurubo alala bede taka kingaünpung sadam tüsho adubopung bede müsühmüra-phuru. 29Nünü jurübo müsühkhitang, junangde arübo khide amüsüh labah; tümüpürü jurü qiubanü amüsüh kambah. 30Aron tüsho api tsührübo müsühkhitang, junangde arübo amükeamrü thsüde I tankihbah. 31Israelrü ki thaang, ‘Ha lünbo thsungkheak I ki mujude-müsühkhitbe amüsüh labah. 32Ha mihtsürü phü kheak mubukkih; yungsho hanangde püpü müdangke dürhimokhit. Ha amüsüh ah, tüsho nüsa ki amüsüh labah. 33Shepünü thüneabe ha ruk thsüba tüsho amükeamrü kheak hode shepünü ayukbanü api ju nihbuh mihtsürü bolungnü khekhita bahbah.’ ”
Jinjinlak
34 Atungpuhnü Mosa ki tha, “Thüneathürabe–ano, onika, galbanun tüsho jinjinlak müthsün luang; jurübo adünkhi rukhüh lang alabah. 35Thüneabe dungrukhi nangde jurübonü jinjinlak thsang. Tsangkhitde azopü tüsho amüsüh lapü thsungkheak thimi yukang. 36Ju chingnü anükhüh ayikangkang kamde dungang tüsho inü nü shorupung khimyam ching tangzüng sangdan miki zoang. Ha nü ki khide amüsüh labah. 37Nüsa thsungkheaknü hanangde püpü jinjinlak düthsü; Atungpuh kilim ha amüsüh de lümang. 38Khürünü thüneabe thsüpü ha ruk thsüsho api ju nihbuh mihtsürü bolungnü khekhita bahbah.”
Currently Selected:
ABEKHIT 30: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
