ABEKHIT 31
31
Arüngkhimyam Thsürübo
(Abe 35.30—36.1)
1 Atungpuhnü Mosa ki tha: 2“Kheahang, inü Juda trük Hur tsührü, Uri tsührü Bezalel mokhitdo, 3tüsho inü api lümlung ching, anikhitkhi ching, mükheahmudu ching, tüsho khah-rhimo alala ching Thrünpuh menü mishih, 4thsüsonungnüpü, suna, shotoyinchi, müwayinchi rhimopü, 5mürelung kiurüppü tüsho thsüa zhipshihpü, sang sümzüsümdopü, tüsho thsüsonungnü alala. 6Kheaküshe inü Dan trük Ahisama tsührü Oholiab api rungpü moyukjih; tüsho thsüsonungnürü alala kilim inü nü ki thiyukhüm jihkhi alala rhimoshihpü rükrirükko jih: 7ashorupung khimyam, tangzüng sangdan tüsho mihmüthsüm binkiu, tüsho khimyam ching kukruk alala– 8dükhüm tüsho kukrukbo, suna müthsün tsün dubopung tüsho naknakruru kukrukbo alala, jinjinlak kingaün sadam, 9taka kingaünbe kingaün sadam tüsho pungphuru alala, adubopung kihde müsühmüraphuru– 10tüsho Aron le api tsührübo amükeamrü thsüde tankihchoki thsungkheak akeakkhi amüsüh khimmihbo, 11tüsho amüsüh dangpung thsungkheak mujude-mokhitbe müdangke tüsho jinjinlak. Inü nü ki thiyukhüm jihkhi nangde arünü jurü thsübah.”
Amuni
12 Atungpuhnü Mosa ki tha, 13“Israelrü ki thaang, ‘Nüsanü I yo amunibo mungbeah, tümüde ha I tüsho nüsa dükeak nüsa lünbo amuyung amütsan khülang lah, junangde I nüsa tsangkhitbuh Atungpuh de nüsanü mükheahbah. 14Amuni mungang, tümütüsho ha nüsa thsungkheak amüsüh lah; ha thsümünimrü aban asheshihbah; shepünü ha nimung rhimo rhimobanü api ju nihbuh mihtsürü lungnü khekhita bahbah. 15Nimung thuruk rhimo rhimobah, tüshe athüne nipü ju sühakhim amuni, Atungpuh kilim amüsüh lah. Shepünü amuni rhimo rhimobanü asheshihbah. 16Israel mihtsürünü ha nimung ju tangzüng amütsan khülang thsüde azobeah. 17Ha Israel mihtsürü le I dükeak lünnü amütsan khülang labah, tümütüsho I Atungpuhnü yinmi tüsho alomi nimung thuruk chingnü thsükhi, tüsho athüne nipü inü rhimo chingnü tuklo tüsho sühakhim.’ ”
18Tüsho küyimki apinü Sinai Müzüng kheak Mosa ki asukachihkhamkhea, apinü anihbuh kilim Thrünpuhnü thiyukhüm thrütkihkhi lungbeak mahne jih.
Currently Selected:
ABEKHIT 31: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
