ABEKHIT 32
32
Suna Moshipung-nunu
(Yuzüng 9.6-29)
1Küyimki Mosa müzüng kheaknü akipü zhomakhi mihtsürübonü angükhea, arünü Aron mükamde mukhung tüsho tha, “Arang, isa müngüh yüpü thrünpuhbo thsüjang; tümüde isa Ijip lomi chingnü bekhitbuh Mosa kheak tümü dünjia lanü isanü mümükheah.” 2Aronnü arü ki alo, “Nüsa niuberü, nüsa tsührü athrürü tüsho aliberübonü anükhi suna nüpübo yihkhita lude I kilim arang.” 3Jumonü mihtsürü alalanü arü nüpübo yihkhita Aron kilim lubah arü. 4Apinü arü khah chingnü suna leangkhi tüsho akheanbenü thsüde moshipung-nunu khülang zünkhitjih. Judüki arünü tha, “O Israel, ha nüsa Ijip lomi chingnü abekhitkhi nüsa thrünpuh ah!” 5Küyimki Aronnü ju ngükhea, apinü ju miki kingaün sadam khülang thsü Tüsho Aronnü zhiyukde tha, “Shido Atungpuh ki thünio khülang labah.” 6Ashidopü arünü mükikde asürübah taka kingaünbo, mungtsü kingaünbo jih; mihtsürübonü atsühpü tüsho ayungpü bin tüsho milimyulimnü apheande wusu.
7Tüsho Atungpuhnü Mosa ki tha, “Yükiang, tümütüsho nünü Ijip lomi chingnü bekhitkhi nü mihtsürü müneana lah. 8Inü arü ki thiyukhüm jihkhi chingnü nahde rholode tsodo tüsho arü thsungkheak moshipungnunu mejak khülang thsüa lah. Arünü ju miki mükhümde laksah-a kingaün tüsho tha, ‘O Israel, harü ha nüsa Ijip lomi chingnü bekhitkhi nüsa thrünpuhbo ah.’” 9Tüsho Atungpuhnü Mosa ki tha, “Inü ha mihtsürübo ngüdo, tüsho arübo anihnih mihtsürü ah. 10Kheakü jumonü, arü azhihde I bukakhiukde arü dükheakshihpü I langzü zojang. Tüsho inü nü trükshih ato khülang kamshihbah.”
11Judüki Mosanü Atungpuh api Thrünpuh ki mushude tha, “ATUNGPUH , tümü thsükhi nünü nü wu ato tüsho wuto khahnü Ijip lomi chingnü bekhitkhi nü mihtsürü kheak bukakhiukcho? 12Tümüde Ijiprünü, ‘Apinü arübo thsümünimpü, müzüngbo chingnü alaksahpü, tüsho alomi kheaknü dükheakshihpü bekhita lah’ de athashihpü? Nü bukakhiukkhi chingnü rholoang, tüsho nü mihtsürü thsümünimpü chingnü lümaloang. 13Nü yamlarübo Abraham, Isak, tüsho Jakob lümkhitang, sherü ki nünü thiyuchihchimde tha, ‘Inü nüsa tsühsoniusobo thüning ching chiningbo nangde abushihbah; inü alokhikhi alala nüsa tsühsoniuso kilim jihbah, tüsho arünü ju lünnü yamrüplurüp lubah.’” 14Jumonü Atungpuhnü api mihtsürü thsümünimpü chingnü lümalo.
15Mosanü rholobah müzüng chingnü aki, tüsho thiyuzüng lungbeak mahne api khah ching lakheah. Lungbeakbo ju thrip aban thrütkih-a lakheah. 16Lungbeakbo ju Thrünpuh rhimo lakheah, tüsho lungbeakbo kheak Thrünpuh khahthrüt thrütkih-a lakheah. 17Küyimki Jihusuanü mihtsürü alanajikhi sokhea, apinü Mosa ki tha, “Binkheampung ching thirithsü düsheak lah.” 18Tüshe apinü alo, “Ha akukkhi yungsho amukukkhi düsheak yung tüshe khün thsükhi düsheak inü sochoh.”
19Küyimki Mosa binkheampung thüninde arübah moshipung-nunu tüsho atsünkhi ngükhea, apinü müzüng jing kheak lungbeak mahne akhah chingnü jipa bahbah adütre kamde adanthünak. 20Tüsho arünü athsükhi moshipung-nunu apinü lubah mo ching takabah; jushu apinü asungthulung kamde dungthünakbah ke ching hiumüzütabah, tüsho Israelrünü ju yungshih. 21Mosanü Aron ki tha, “Ha mihtsürübonü nü ki tümü thsükhi nünü arü kheak neak ato hande arükhea?” 22Aronnü alo, “I tungpuh, bukdakhiuk; harü mihtsürü amütsü rhimopü lümkihkhi nünü mükheahlah. 23Tümüde arünü I ki tha, ‘Isa müngüh yüpü thrünpuhbo thsüjang; tümütüsho isa Ijip lomi chingnü bekhitbuh Mosa kheak tümü dünjia lanü isanü mümükheah.’ 24Tüsho inü arü ki tha, ‘Sherü suna lanü arünü yihkhitshang.’ Jumonü arünü I kilim jih, tüsho inü ju mo ching jipyuk tüsho ha moshipungnunu akhiuk.”
25Harü mihtsürübo Aronnü müdanyukkhukde arü riri miki münedung kamkhi Mosanü ngü. 26Jumonü apinü binkheampung yüzahpung ripit kheak zhipbah tha, “Sherü Atungpuh kilim lanü I ki arang.” Tüsho Levirü alala api ki mukhungde arü. 27Tüsho apinü arü ki tha, “Atungpuh Israel Thrünpuhnü ha thachoh: ‘ Mihbüm abannü nihbuh nukshang noa lubah binkheampung ripit khülang chingnü püpü ching yüang tüsho nihbuh keoniorü, müyamrü, tüsho nihbuh yamhingrü laksahang.’” 28Mosanü thiyukhüm jihkhi nangde Levirübonü rhimo, tüsho ju nimung mihtsürü 3000 bande laksah. 29Tüsho Mosanü tha, “Khihni nüsanü nüsa tsührübo tüsho keoniorübo laksahkhinü Atungpuh tankihpü ching amükeamrü thsüpü müsühkhit, jumonü Atungpuhnü api müngühmühi nüsa kilim jihdo.”
30Ashidopü Mosanü mihtsürübo ki tha, “Nüsanü tode neak yihbeakdo. Tüshe kheakü I Atungpuh kilim wutubah; khükijua inü nüsa neak dünthsükhijihbah.” 31Jumonü Mosanü Atungpuh kilim alode yü tüsho tha, “O, harü mihtsürünü tode neak yihbeakdo, tüsho arü thsungkheak suna thrünpuh thsüa lah! 32Kheakü muzhobah arü neak bahjang; jude yungsho, nünü athrütkhi hüm chingnü I nankhita bahang.” 33Atungpuhnü Mosa ki alo, “Sherübo I azhihde neak yihbeakdünü inü I hüm chingnü nankhita bahbah. 34Kheakü inü athakhi dangpung ching mihtsürübo bede yüang, tüsho I yunirü nü müngüh yübah. Judüalalashe, küyimki thsümüchipü kim arübanü, inü arü neak dünkheak arübo thsümüchibah.”
35Jumonü Atungpuhnü mihtsürübo kheak arüm khülang arüshih, tümütüsho arünü Aron athsunga suna moshipung-nunu thsüshih.
Currently Selected:
ABEKHIT 32: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
