ABEKHIT 33
33
Sinai chingnü Atsopü Thiyukhüm Jihkhi
1 Atungpuhnü Mosa ki tha, “Nü tüsho nünü Ijip lomi chingnü bekhitkhi mihtsürübo ha dangpung chingnü chamachihang, tüsho inü Abraham, Isak, Jakob tüsho arü tsühsoniusobo jihpü alokhikhi lomi ching yüang. 2Inü yunirü khülang nüsa müngüh yüshihbah tüsho Kananrü, Amorrü, Hitrü, Perizrü, Hivrü tüsho Jebusrü yankhitshihbah. 3Niuhke tüsho mukhuke bukkhi lomi ching wutuang; tüshe I a nüsa bolung matu, jude yungsho inü nüsa limro ching dükheakshihbah tümüde nüsa anihnih mihtsürü ah.”
4Küyimki mihtsürübonü ha lümthsünü yubo sokhea, arünü atüzhopü tankih tüsho shenü she zülu müyih. 5Tümüde Atungpuhnü Mosa ki tha, Israelrü ki thaang, “Nüsa anihnih mihtsürü ah. I nüsa lung anükhüh kheak lang she yükhülaa, inü nüsa shahde adükheakshihbah. Kheakü nüsa zülubo yihkhitang, tüsho nüsa kheak tümü rhimobanü inü apungkhibah.” 6Jumonü Israelrünü Horeb müzüng kheak arü zülu alala khukkhi.
Ashorupung Khimyam
7Kheakü Mosanü khimyam khülang lu tüsho binkheampung aleanglim anükhüh yübah thsü, ju ki “ashorupung khimyam” de ji. Khürünü Atungpuh ki keokhikeorapü lasho binkheampung aleanglim khimyam ching yüde alakheah. 8Tüsho küyimki Mosa khimyam lim wukhiukbanü mihtsürü alala wusurü tüsho khimyam ching Mosa müyüzahyi khiungde arü khimyam ching yüzahpung kheak kheahde zhip. 9Küyimki Mosa khimyam ching yüzahbanü, amo dungto akibah khimyam ripit ki zhip tüsho Atungpuhnü Mosa ki asukachih. 10Küyimki mihtsürübonü amo dungto khimyam ripit ki zhipde angübanü, arü alala nihbuh khimyam ripit ki wusurü tüsho kingaün. 11Mihtsürünü müyamrü ki asukachihkhi nangde Atungpuhnü Mosa ki miro le miro asukachihde alakheah. Jushu Mosanü binkheampung lim alode yü, tüshe api rungbuh Nun tsührü athrününgtsüng Jihusua a khimyam chingnü makhin.
Mosa tüsho Atungpuh Müretahkhi
12Mosanü Atungpuh ki tha, “Harü mihtsürü bepü nünü I ki thade la, tüshe I lung shepü yübanü nünü I ki mümükheahshih. Inü nü mungnü mükheahlah tüsho I miki mihmüthsüm ngüdo de nünü tha. 13Jumonü inü tamkhüntamnüchoh, I nü miki mihmüthsüm lasho, kheakü I ki nü limro huhang, junangde inü nü mükheahbah tüsho nü miki I mihmüthsüm ngübah. Tüsho ha trükshih nü mihtsürü ah de lümang.” 14Tüsho apinü tha, “I nü lung yübah tüsho inü nü sühakhim jihbah.” 15Judüki Mosanü api ki tha, “Nü isa lung müyüsho, ha chingnü isa bede duwutu. 16Nü isa lung müyüsho, nü mihtsürü tüsho I nü miki mihmüthsüm ngüdo de küde thsah amükheahpü? Nü mihtsürü tüsho I, alomi ching lakhi mihtsürü alala kheaknü büthsükhi labah.”
17Judüki Atungpuhnü Mosa ki tha, “Nünü athakhi inü arhimobah; tümüde nü I miki mihmüthsüm ngüdo, tüsho inü nü mungnü mükheahlah.” 18Tüsho apinü tha, “ Muzhobah nü müretahkhi I ki huhang.” 19Tüsho apinü alo, “Inü nüsa müngüh I müretahkhi hoshihbah, tüsho inü nüsa müngüh Atungpuh mung zhiyukbah. Inü sherü kheak mihmüthsüm labanü mihmüthsüm labah, tüsho sherü kheak mihmuzho labanü mihmuzho labah.” 20Tüshe apinü tha, “Nüsanü I miro müngükhuk; tümüde mihtsürü sheshe I ngübah rhangdung lapü yung.” 21Tüsho Atungpuhnü tha, “Ha kheak dangpung khülang I ki lah, tüsho lungto kheak nü zhipbah. 22Küyimki I müretahkhi hobanü, inü nü lungkhün ching yüzahshihbah, tüsho I muhoyi khiungde I khahnü ahümdobah. 23Jushu inü I khah luakhinbah, tüsho nünü I thründuk ngübah; tüshe I miro müngü.”
Currently Selected:
ABEKHIT 33: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
