ABEKHIT 34
34
Lungbeak Aso
(Yuzüng 10.1-5)
1Tüsho Atungpuhnü Mosa ki tha, “Akhuhlim nangde lungbeak mahne phukang, tüsho nünü ayihrüpkhi akhuhlim lungbeakbo kheak kihkhi yubo inü ha lungbeakbo kheak thrütbah. 2Jumonü yapsu thsakhamang tüsho Sinai Müzüng mujuk kheak nü I kilim atung. 3Sheshe nü lung marü yungsho müzüng kheak küching she müngübeah; müzüng mikhuh ki mihnu tüsho moshibo she düyimtsühshih.” 4Jumonü Mosanü akhuhlim nangde lungbeak mahne phuka lu tüsho Atungpuhnü api ki thiyukhüm jihkhi nangde yapsu mükikde akhah ching lungbeak mahne shuhbah Sinai Müzüng ching wutu. 5Judüki amo ching Atungpuh aki tüsho ju ching api ki zhipbah Atungpuh mung mükheahshih. 6Tüsho apinü Mosa miki tsahhode zhiyuk, “Atungpuh , Atungpuh , mihmuzho tüsho mihmüthsüm Thrünpuh, arünnü bukakhiukchoh, amuzho tüsho thiyuro ching suhdahlah, 7chithürü ki amuzho lachoh, tüsho mihbukmuyuk, azhihkhi tüsho neak bahjihchoh. Tütüshe apinü mülimkhi müthsümüchidüa müdükhe; apinü arü bebuhrü neak dünkheak arü tsührü tüsho tsührü-tsührü lün mahsam tüsho phüyi khiungde thsümüchichoh.” 8Mosanü khülang ki alo kheak khukning tüsho kingaün. 9Apinü tha, “O Atungpuh , I nü miki mihmüthsüm ngüa lasho, isa anihnih mihtsürü thsüa lalashe Atungpuh isa lung yüang de inü tamkhüntamnüchoh; isanü alakmihkhi tüsho isa neak bahjang tüsho nü yamrüplurüp nangde isa luang.”
Tangzüng Dükünglokhi
(Abe 23.14-19; Yuzüng 7.1-5; 16.1-17)
10Tüsho Atungpuhnü tha, “Kheahang, inü tangzüng khülang thsüchoh. Alomi alala ching yungsho trükshih bolung mürhimoakheahkhi nüsa mihtsürü alala miki inü mihmüyinsahbebo rhimobah; nüsa rukhüh lakhi mihtsürübonü I Atungpuhnü nüsa thsungkheak atrebe rhimokhi ngübah. 11Khihni inü nüsa ki thiyukhüm jihkhi mihyuaniang. Kheahang, inü nüsa müngühnü Amorrü, Kananrü, Hitrü, Perizrü, Hivrü tüsho Jebusrü yankhita bahchoh. 12Nüsa yüpü lakhi lomi ching larü kheak binthrüm müthsüpü kümkangang, jude yungsho nüsa bolung arübo ju qimürip labah. 13Arü kingaün sadam lukkheamjang, amüsüh dungjing kingkheamang, tüsho sangthsübo kiukheamang. 14Püpürü thrünpuh tümü dükingaün, tümüde Atungpuh shepü mung mükthsü lanü, mükthsü Thrünpuh ah. 15Ju lomi ching larü kheak binthrüm müthsüpü kümkangang; tümüde küyimki arünü arü thrünpuhbo kheak müzammüramde laksah-a kingaünba, arünü nüsa jiyukbah tüsho nüsanü arü kingaünbo tsühbah. 16Tüsho küyimki nüsa tsührü niuberü thsüpü arü tsührübebo lujihbanü arü thrünpuhbo kheak müzammüramkhinü nüsa tsührübo junangde arhimoshihbah.
17“Nüsanü azünkhi thrünpuhbo düthsü.
18“Phaüm muyukkhi yikhap thünio mungang. Inü nüsa ki thiyukhüm jihkhi nangde phaüm muyukkhi yikhap nimung thüne akhukhitkhi kim Abib khinu ching tsühang; tümüde ju kim ching nüsa Ijip lomi chingnü akhiukkheah. 19Athrürü adüjirü tüsho shiwüh pung adüji moshi yungsho mihnu thsüthsü I yo ah. 20Akhuh anukhi donki a nünü namfimihnunu khülangnü rhokhitang, tüshe nünü mürhokhitsho ahung yihshakang. Nü tsührü athrürü adüji alala nünü arhokhitbah. Tüsho sheshe I miki khahkeang darü.
21“Nüsanü nimung thuruk rhimobah, tüshe thüne nipü sühakhimbah; thulu mülappü tüsho yimlu kim ching nüsanü sühakhimbah. 22Nüsanü wheat hi akhuh yimluchoki Yimlu Thünio mungang tüsho mumükin ching Hanmukhungkhi Thünio mungang. 23Kam ching mahsam ki nüsa athrürü alala Atungpuh , Wuto Israel Thrünpuh miki arübah. 24Tümüde inü nüsa müngüh trükshihbo yankhitbah tüsho nüsa lomi mülihshihbah; tüsho kam aban nüsa Atungpuh nüsa Thrünpuh miki wutuchoki shenü she nüsa lo lupü mülüm.
25“I kilim shiwüh laksah-a kingaünkhi thiyih ju phaüm yukkhi yikhap bede düjih, tüsho phunghothünio laksah-a kingaünkhi tümü she yapsu khiungde daningshih. 26Nüsa lo chingnü akhiukkhi akhuh asokhi sangaso atsüdakbe Atungpuh nüsa Thrünpuh yam ching hande arang. Mihnu nunu abe niuhke ching dükhiung.”
27 Atungpuhnü Mosa ki tha, “Harü yubo thrütang, tümüde harü yubo yande inü nü tüsho Israel kheak tangzüng khülang thsüdo.” 28Ju ching Mosa nimung yirü tüsho tsüngre yirü yikhap mütsüh yungsho ke muyungde alakheah. Tüsho apinü lungbeakbo kheak tangzüng yubo, Thiyuzüng Thürü thrüt.
Sinai Müzüng chingnü Mosa Akikhi
29Küyimki Mosa Sinai Müzüng kheaknü khah ching thiyuzüng lungbeak mahne shuhbah akikhea, api miro zhingzhingkhi anihbuhnü mümükheah, tümütüsho apinü Atungpuh lung asukachih. 30Küyimki Aron tüsho Israelrü alalanü Mosa ngükheanü api miro zhingzhingde alakheah, tüsho arünü api thüninde arüpü tre. 31Tüshe Mosanü arü ki ji; jumonü Aron tüsho boto limberü alala api kilim alode arü, tüsho apinü arü ki asukachih. 32Ju dunglim Israelrü alala api thüninde arü, tüsho apinü arü kilim Atungpuhnü Sinai Müzüng kheak api kilim jihkhi thiyuzüngbo jih. 33Küyimki Mosanü arü ki asukachihkhamkhea, apinü kudukiubenü amiro yihdo. 34Tüshe küyimki api Atungpuh ki asukachihpü yüzahbanü, api makhiukyi khiungde kudukiube ju lokhi; tüsho anihbuh ki thiyukhüm jihkhi apinü Israelrü ki thade la. 35Tüsho Israelrünü Mosa kheahchoki api jak zhingzhingde la; tüsho Mosanü api ki asukachihpü müyüzahyi khiungde kudukiube ajak kheak yihkihlo.
Currently Selected:
ABEKHIT 34: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
