ABEKHIT 35
35
Amuni Yukhümbo
1Judüki Mosanü Israel boto alala bemukhungbah arü ki tha, “Nüsanü arhimopü Atungpuhnü thiyukhüm jihkhi harü ah: 2Nimung thuruk rhimo rhimobah, tüshe thüne nipü ju nüsa amüsüh nimung, Atungpuh kilim sühakhim Amuni labah. Shepünü ha nimung rhimo rhimobanü asheshihbah. 3Amuni nüsa lapungbo ching mo she düthsü.”
Arüngkhimyam thsungkheak Kingaünbo
(Abe 25.1-9)
4Mosanü Israel boto alala ki tha, “Atungpuhnü thiyukhüm jihkhi ju ha: 5Atungpuh kilim kingaün khülang thsakhamang. Mulong salade alarünü Atungpuh kilim kingaün khülang hande arüshang: suna, shotoyinchi, tüsho müwayinchi; 6biyi, mürümmuchu tüsho aneakrüm hing, atsüdak khimthünak tüsho mihnu nam; 7namfimihnupung küp rung khiungkihkhi; atsüdak shihküp; akasia sang; 8tsünpung thsungkheak moke; müdangke mujupü thüneathürabe tüsho jinjinlak; 9lungmütribo, tüsho amükeamrü khim le treangkhümbe kheak yihkihpü lungbo.
Arüngkhimyam Kukrukbo
(Abe 39.32-43)
10“Nüsa bolung athsüsorü alala arübah tüsho Atungpuhnü thiyukhüm jihkhi alala thsübah: 11arüngkhimyam, ju muhiudobe, aleanglim muhiudobe, sangbeakbo, akhrihbebo, dungjingbo tüsho athranyukbebo; 12tangzüng sangdan, ju khrihbe, akhidobe, zhindokhim, 13dükhüm, ju khrihbebo, tüsho kukruk alala; Thrünpuh kilim jihkhi yikhap; 14ayinpü thsungkheak tsünpung dubopung tüsho kukrukbo; moke zahkhi tsünpungbo; 15jinjinlak takpung kingaün sadam tüsho akhrihbebo; amujube müdangke; arhümthüneabe; khimyam ching yüzahpung zhindokhim; 16müwayinchi aphidung bede taka kingaünpung sadambo, akhrihbebo tüsho kukruk alala; adubopung bede müwayinchi müsühmüra-phuru; 17khikzakpung zhindokhimbo, dungjingbo, athranyukbebo, khikzhakpung limro zhindokhim; 18arüngkhimyam le khikzhakpung chingsangbo tüsho liubo; 19amüsüh dangpung tankihpü khimmihbo– amükeambuh Aron tüsho api tsührübo amükeamrü thsüde tankihpü amüsüh khimmihbo.”
Mihtsürübonü Kingaünbo Handarükhi
20Judüki Israel boto alala Mosa mikinü müzüt. 21Tüsho mulongde alarünü arüngkhimyam rhimo mukhungmüdan, tüsho amüsüh khimmihbo thsungkheak Atungpuh kilim kingaün handarü. 22Mulongde alarü athrürü tüsho aliberü ahihdonü nüpübo, nupung-nüpübo khahrihbo, lakbo, suna kukrukbo alala, jurü ju mihtsürübonü suna kingaün ATUNGPUH kilim jihkhi lubah arü. 23Mihbüm abannü alathürün biyi tüsho mürümmuchu le aneakrüm hing, khimthünak atsüdak, mihnu nam, namfimihnu küp rung khiungkhi tüsho shihküp atsüdak handarü. 24Shotoyinchi yungsho müwayinchi jihrübonü Atungpuh kilim kingaün handarü tüsho mihbüm abannü rhimo mungji khürü thsungkheak akasia sang handarü. 25Athsüso liberübonü athünak hing, biyi hing, mürümmuchu, alamlam-khim mürüm arünü chiyimkhitkhi ludarü. 26Aliberü amulongrü alalanü mihnu namnü she chiyim. 27Yakzanshuhrübonü amükeamrü khim tüsho treangkhümbe kheak yihkihpü lungmütri le mürelungbo handarü. 28Arünü tsün le amujube müdangke tüsho jinjinlak thsungkheak thüneathürabe tüsho oliv müdangke ludarü. 29Israelrü athrürü tüsho aliberübonü arünü arhimobe Mosa hode thiyukhüm jihkhi thsungkheak amulongrü alalanü mulongkhi kingaün Atungpuh kilim ludarü.
Khimyam Thsüsonungnürü
(Abe 31.1-11)
30Judüki Mosanü Israelrü ki tha, “Kheahang, Juda trük Hur tsührü, Uri tsührü Bezalel Atungpuhnü mokhitdo, 31tüsho api thsüsonungnü keaklah rhimo alala ching athsükhukpü tüsho mükheahmudu bede Atungpuh menü mia lah– 32suna, shotoyinchi tüsho müwayinchi rhimopü ching athsüso, 33mürelungbo lama yihkihpü, sang sümzüsümdopü; tüsho thsüsonungnü rhimo mungji püpü rhimopü lah. 34Tüsho apinü anihbuh le Dan trük Ahisamak tsührü Aholiab kheak püpürü thsangyukhukpü jih. 35Apinü arü kilim kizükidorü aphuaphu keakkhitrü, khimthünakkeakrü, biyi, mürümmuchu, alamlamkhim mürüm, tüsho püpü khimmih rhimobe mungji alala thsüsopü jih. Arünü rhimo mungji alala tüsho yak khozükhodopü kuklah.
Currently Selected:
ABEKHIT 35: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
