ABEKHIT 36
36
1“Bezalel le Aholiab, tüsho Atungpuhnü arüngako alala rhimopü lümlung tüsho mükheahmudu jihrü abannü Atungpuhnü thiyukhüm jihkhi alala yande arhimobah.”
Thsambahbo Hihde Handarükhi
2Judüki Mosanü Bezalel le Aholiab, tüsho arübah rhimoshihpü Atungpuhnü lümlung jihrü tüsho mulong qiurü thsüsonungnürü alala ji. 3Arünü arüngkhimyam rhimode ayüpü Israelrünü kingaün hande arükhi alala Mosa kheaknü leangkhi. Tüsho mihtsürübonü yapsu aban mutukzhakde arung kingaün handarü. 4Jumonü thsüsonungnürü alalanü arü arüngakopung rhimo zokheambah arü, 5tüsho Mosa ki tha, “Atungpuhnü thiyukhüm jihkhi rhimopü mihtsürübonü yihnüpü kheak kihode hande arüdo.” 6Jumonü Mosanü thiyukhüm jih tüsho arünü binkheampung alala ching ha yu yüshih: “Athrürü yungsho aliberü shenü she arüngakopung arung thsungkheak dürhimo.” Jumonü mihtsürübonü jushu a hande marü, 7tümütüsho arü lakhi ju rhimo alala thsungkheak yihnüpü kheaknü alü lakheah.
Arüngkhimyam Thsükhi
(Abe 26.1-37)
8Judüki arü bolung arüngkhimyam thsürü thsüsonungnürübonü khimthünak, biyi, tüsho mürümmuchu le aneakrüm hingnü zhindokhim thürü thsü; cherubim yak khode thsü. 9Zhindokhim aban ayunglim khahnap 28, tüsho atolim khahnap 4; zhindokhim ju akeara rukhüh lakheah.
10Tüsho arünü zhindokhim phüngü ju rukhüh thüreru, tüsho püpü phüngü rukhüh thüreru. 11Apinü athüreru aban zhindokhim münkheam kheak biyi hingnü rhedo; apinü mahnepü thüreru kheak aleanglim junangde thsü. 12Arünü zhindokhim thürerukhi khülang akheambe kheak arhedokhi thünim yihkih tüsho mahnepü akheam kheak thünim yihkih; arhedokhibonü zhindokhim khülangnü khülang kheak wuhru. 13Arünü zhindokhimbo wuhrupü sunanü awuklobe thünim thsü, junangde arüngkhimyam ju khülang lapü thsü.
14Arünü arüngkhimyam kumung phudopü mihnu namnü zhindokhim thürükheak khülang thsü. 15Arünü zhindokhim aban ayunglim khahnap 30, atolim khahnap 4nü thsü; tüsho zhindokhim thürükheak khülang alala akeara rukhüh lakheah. 16Arünü phüngü khülang ching, tüsho thuruk püpü de thüreru. 17Arünü zhindokhim mahne chamshakde athürerukhi akheam aban kheak aleanglim arhedokhi thünim yuk. 18Tüsho arünü müwayinchinü awuklobe thünim thsübah arhedobebo ching yuk, tüsho khim ju wukrubah khülang kampü thsü. 19Arünü namfimihnupung küp rung khiungkhi tüsho mihnu küpbonü khimyam muhiudobe thsü.
20Arünü arüngkhimyam thsungkheak akasia sangnü sangbeakbo thsüa zhipshih. 21Sangbeak aban ayunglim khahnap 10 tüsho atolim khahnap 1 kheak damshakkhüh lakheah. 22Sangbeak abande arhükarünpü mahne mujukkhitshih. Arüngkhimyam sangbeak alala jude thsü. 23Arünü arüngkhimyam düjinglim sangbeak muku thsü. 24Sangbeak muku ching yüzahshihpü shotoyinchi thranyukbebo yirü sangbeak mujukkhitkhi aban athranyukbe mahnene thsü. 25Arüngkhimyam dukulim sangbeak muku thsü, 26tüsho shotoyinchi thranyukbebo yirü, sangbeak aban mahnene thsü. 27Arünü arüngkhimyam aniyüzahlim akheam lim sangbeak thuruk thsü. 28Arünü arüngkhimyam dunglim amühit mahne thsungkheak sangbeak mahne thsü. 29Harü amühit sangbeakbo ju ajing limnü aku lim khiungde thoru. Amühit mahne kamshihkhi sangbeakbo junangde thsü. 30Junangde sangbeak tizheah tüsho shotoyinchi thranyukbebo thürükheak thuruk, sangbeak aban mahnene lakheah.
31Tüsho arünü akasia sangnü akhrihbe thsü; arüngkhimyam thripkhüh sangbeakbo thsungkheak phüngü, 32arüngkhimyam püpü thrip sangbeakbo thsungkheak akhrihbe phüngü, tüsho limshu aniyüzahlim arüngkhimyam sangbeakbo thsungkheak phüngü. 33Arünü aphulung khrihbe junü sangbeakbo akheamnü akheam khiungde kimhoshih. 34Arünü sangbeakbo kheak suna yihkih, akhrihbebo tholopü phuhphobo sunanü thsü tüsho akhrihbebo kheak suna yihkih.
35Arünü zhindokhim ju biyi, mürümmuchu, aneakrüm hing tüsho khimthünak atsüdak keakkhinü thsü. Ju athsüsorünü athsükhi cherubim keakyukde thsü. 36Arünü ju thsungkheak akasia sangnü dungjing phüyi thsübah suna yihkih. Arünü awuklobe sunanü thsü tüsho shotoyinchinü adubopungbo phüyi thsü. 37Arünü arüngkhimyam ripit zhindokhim ju biyi, mürümmuchu, aneakrüm hing tüsho khimthünaknü thsü, 38tüsho awuklobe bede dungjing phüngü thsü. Arünü dungjingbo ku le phuhpho kheak suna yihkih tüsho müwayinchinü athranyukbe phüngü thsü.
Currently Selected:
ABEKHIT 36: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
