ABEKHIT 37
37
Tangzüng Sangdan Thsükhi
(Abe 25.10-22)
1Judüki Bezalelnü akasia sangnü sangdan thsü; ayunglim khahnap 2 kheak damshakkhüh, atolim khahnap I kheak damshakkhüh, tüsho achanglim khahnap I kheak damshakkhüh. 2Apinü aleanglim tüsho alunglim suna müthsün lüpkih tüsho amünküp alala yeande suna yihkih. 3Apinü ju thsungkheak suna phuhpho phüyi thsü, tüsho amühit phüyi ching yuk; phuhpho mahne thripkhüh kheak, tüsho püpü mahne thripkhüh kheak lakheah. 4Apinü akasia sangnü akhrihbe sangbo thsü tüsho sunanü mujudo. 5Tüsho apinü sangdan shuhpü thsüde akhrihbebo ju sangdan rheangbo kheak phuhphobo ching yuk. 6Apinü mihmüthsüm binkiu suna müthsünnü thsü; ayunglim khahnap 2 kheak damshakkhüh tüsho atolim khahnap 1 kheak damshakkhüh lakheah. 7Apinü suna kingkhinü cherubim mahne thsü; apinü mihmüthsüm binkiu mahne akheam kheak thsü. 8Akheam khülang kheak cherub khülang tüsho cherub khülang püpü akheam kheak thsü; apinü mihmüthsüm binkiu khülang akheam mahne kheak cherubim thsü. 9Cherubimnü arü ghidükeangbo mihmüthsüm binkiu lüpdode akulim chungkih, tüsho ane miro kheahachih; cherubim mirobo ju mihmüthsüm binkiu lim abin.
Yikhap Dükhüm Thsükhi
(Abe 25.23-30)
10Apinü akasia sangnü dükhüm thsü; ayunglim khahnap 2, atolim khahnap 1, tüsho achanglim khahnap 1 kheak damshakkhüh lakheah. 11Apinü ju kheak suna müthsün lüpkih tüsho alala mükamde suna yihkih. 12Apinü mükamde akümlopü müyikhühnü thsü, tüsho akümlopü alala mükamde suna yihkih. 13Tüsho apinü ju thsungkheak suna phuhpho phüyi thsü, tüsho amühitbo ching ajing phüyi abande yuk. 14Phuhphobo ju dükhüm shuhpü akhrihbebo wuklode akümlopü thüninde yuk. 15Apinü dükhüm shuhpü akhrihbebo ju akasia sangnü thsü, tüsho ju kheak suna lüpkih. 16Apinü phurubo, pungbo, phühbo, tüsho phurusükbo yukhu kingaünpü suna müthsünnü thsü.
Tsünpung Dubopung Thsükhi
(Abe 25.31-40)
17Apinü suna müthsünnü kingde tsünpung dubopung thsü. Adung, adüthrün, sangbün-ruk pungbo, tüsho züt thsükhibo bümkhüh lang thsü. 18Tüsho arheanglimnü adüthrün thuruk akhiukshih: adubopung düthrün mahsam thripkhüh tüsho mahsam püpü thrip lakheah. 19Almond sangbün duduhde tüsho apungkhi nangde pung mahsam adüthrün khülang kheak kih, mahsam ju püpü düthrün kheak kih, tüsho alala rukhühnü adüthrün thuruk tsünpung dubopung kheaknü akhiukshih. 20Tsünpung dubopung kheak pung phüyi aban almond pungkhi nangde sangbün züt thsükhibo lakheah. 21Akhuhbe dudu düthrün khüp aduduh khülang, mahnepü dudu düthrün khüp aduduh khülang, mahsampü dudu düthrün khüp aduduh khülang–alalanü adüthrün thuruk tsünpung dubopung chingnü akhiukshih. 22Khah zhimpung, adüthrün tüsho tsünpung dubopung ju pangkhüh lang akingkhi suna müthsünnü thsü. 23Tüsho apinü tsünpung thüne, mokhih-müjipbe tüsho phurubeakbo suna müthsünnü thsü. 24Tsünpung dubopung tüsho kukrukbo alala suna müthsün khahngak 35nü thsü.
Jinjinlak Kingaün Sadam Thsükhi
(Abe 30.1-5)
25Apinü jinjinlak kingaün sadam akasia sangnü thsü. Ayunglim khahnap 1, atolim khahnap 1, tüsho achanglim khahnap 2nü arihkhühnü thsü. Apang kheak ju ajuhbo kihshih. 26Aku le athrip alala tüsho ajuhbo suna müthsünnü lüpdo, tüsho amung yeande suna yuk. 27Ju hanbe suna phuhpho mahne thsü tüsho amung yean khüp ahanbe sangkhrih tholopü thrip mahne kheak yihkih. 28Tüsho apinü sangkhrihbo akasia sangnü thsübah suna müthsünnü lüpdo.
Amujube Müdangke tüsho Rhümthüneabe
(Abe 30.22-30)
29Apinü thüneabe nangde düsahde mujude-müsühkhitbe müdangke amüsüh tüsho thüneabebonü jinjinlak müthsün thsü.
Currently Selected:
ABEKHIT 37: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
