ABEKHIT 5
5
Mosa tüsho Aron Pharao Miki
1Ju dunglim Mosa tüsho Aron Ijip kiulongthsüpuh kilim yübah tha, “Israel Thrünpuh, Atungpuhnü hade thachoh, ‘I mihtsürübo yüshang, junangde arünü sunglo ching I thsungkheaknü thünio thsübah.’” 2Pharaonü tha, “Inü api düsheak anide Israelrü yüshihpü thsüde Atungpuh ju she a? Inü Atungpuh mümükheah tüsho inü Israelrübo müyüshih.” 3Judüki anenü alo, “Ibrirü Thrünpuh isa miki akhiukdo; Atungpuh isa Thrünpuh ki kingaünpü thsüde sunglo ching nimung mahsam limtsah yüpü isa ki mülüjang, jude yungsho apinü isa tukthsü yungsho nukshangnü alaksahbah.” 4Ijip kiulongthsüpuhnü ane ki tha, “Tümü thsükhi nüsanü mihtsürübo ju arü rhimo chingnü bea lucho? Arü rhimo ching yüloshang! 5Kheahang nüsa mihtsürübo Ijiprü kheaknü ahihbe kamdo, tüsho kheakü nüsanü arü rhimokhi chingnü tukloshihchoh.” 6Ju ninü kiulongthsüpuhnü azhorü limberü tüsho atorübo ki thiyukhüm jih, 7“ Müngühlim ruk lotaklung thsüpü nüsanü müneang düjih, tüshe arü küdah thsüde müneang hanmukhungshang. 8Tüshe müngühlim arünü lotaklung küdükhüh thsükhitkheanü ju dükhüh thsükhitshihpü nüsanü arü ki thaang; ju kheaknü anükbe dükamshih, tümüde arü yomuhlah, jumonü ‘Isa Thrünpuh ki kingaünpü yüshang’ de arünü zhichoh. 9Harü mihtsürübo kilim rhimo achakbe jihang, tüsho makeangde rhimoshang, jude thsüsho akeangyu thakhibo ching anipü kim müngüde akambah.”
10Azhorü limberü tüsho atorübonü yübah Israelrübo ki tha, “Kiulongthsüpuhnü hade thachoh, Inü nüsa kilim müneang müjih. 11Nüsanü yübah müneang tümü ching ngübanü nüsa küdah thsüde hande arang, tüshe püpüki kheaknü anükbe mükamshih.” 12Jumonü mihtsürübonü müneang yimdarüpü Ijip lomi alala ching hiumüzüt. 13Tüshe azhorü limberübonü arü ki müküpde tha, “ Müngühlim müneang jih-a nimung aban thsükhitkhi nangde nüsa rhimo banang.” 14Tüsho azhorü limberübonü mokhitkhi Israelrü torübo kheak lakde keokhi, “Tümü thsükhi nüsanü müngühlim nangde yini tüsho khihni lotaklung müthsükhit le?”
15Judüki Israelrü torübonü kiulongthsüpuh ki arübah tha, “Tümüde nünü nü yamlarübo kheak hade thsümüchicho?” 16Nü yamlarübo kilim müneang müjih, tüshe lotaklung thsüang de arünü isa ki thachoh. Nü yamlarübo kheak lakchoh, tüshe ha nü mihtsürübo kheak amülim lah. 17Tüshe apinü tha, “Nüsa yomuhyothsünlah, tüsho mürhimone jumonü nüsanü thachoh, ‘Atungpuh kingaünpü isa yüshang.’ 18Kheakü yüang tüsho rhimoang; tümüde nüsa kilim müneang müjih, tüshe müngühlim thsükhitkhi dükhüh nüsanü lotaklung ju thsükhitang.” 19Müngühlim nimung aban lotaklung thsükhitkhi nangde thsükhitang de athakhinü, atorübonü arü küpkhuk ching lah de lümkhit. 20Arübo kiulongthsüpuh kilimnü akhiukchoki arü aleangde alakhi Mosa tüsho Aron bünenü shoru. 21Tüsho arünü ane ki tha, “Nükenü Pharao tüsho api torübo khah ching nukshang zhimshihbah isa laksahshihpü thsüde arünü isa thraneanshihkhi hode Atungpuhnü nüke kheak kheahshang tüsho mahkhapshang.”
Mosanü Atungpuh ki Atsangkhi
22Judüki Mosanü Atungpuh kilim rholobah tha, “Atungpuh , tümü thsükhi nünü nü mihtsürübo kheak küpkhuk hande arükhea? Tümüde nünü I ha ching arüshihkhea? 23Inü Pharao kilim nü mung chingnü athapü arükinü, apinü ha mihtsürübo kheahmüchihdo. Tüsho nünü nü mihtsürübo bekhitpü tümü mürhimo.”
Currently Selected:
ABEKHIT 5: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
