ABEKHIT 6
6
1 Atungpuhnü Mosa ki tha, “Kheakü inü Pharao kheak tümü rhimobanü nünü angübah. I mihtsürübo tsoshihpü inü api kheak ningkihbah. Atsütsü, api lomi chingnü apinü arübo yankhita bahshihpü inü api kheak ningkihbah.”
Thrünpuhnü Mosa Jikhi
2Thrünpuhnü Mosa ki tha, “I Atungpuh ah.” 3Inü Abraham, Isak tüsho Jakob ki Wuto Thrünpuh ah de akhiuka huh, tüshe inü arü ki I mung Atungpuh de mümükheahshihde alakheah. 4Arü hanrü thsüde alakhi Kanan lomi ju inü arü kilim jihpü tangzüng thsü. 5Kheaküshe Ijiprünü azhorü kuhi ching zojihkhi Israelrü ashekhi inü so, tüsho inü tangzüngkhi lümkhit. 6Jumonü Israelrü ki thaang: “I Atungpuh ah; inü nüsa Ijiprü thsümüchi tüsho azhorü kuhi chingnü bekhitbah, tüsho inü khah chungkihde tüsho mahkhap atonü nüsa khümkhitbah, 7tüsho inü I mihtsürü thsüpü nüsa lubah, tüsho I ju nüsa Thrünpuh thsübah; I ju Ijip azhorü kuhi chingnü nüsa bekhitbuh Atungpuh nüsa Thrünpuh ah de nüsanü amükheahbah. 8Tüsho inü Abraham, Isak tüsho Jakob kilim jihpü thiyuchihchimkhi lo ching inü nüsa bede yüzahbah; inü ju nüsa yamrüplurüp thsüde ajihbah: I Atungpuh ah.” 9Jumonü Mosanü Israelrü ki ha tha; tüshe arü mulong masühkhi tüsho thsümüchi azhorü kuhi lakhinü arünü Mosa ki mani.
10 Atungpuhnü Mosa ki tha, 11“Yüzahang, Israel mihtsürü api lomi chingnü awukhiukshihpü Pharao kiulongthsüpuh ki thaang.” 12Tüshe Mosanü Atungpuh ki tha, “Kheahang, Israel mihtsürünü I ki mani; dale I thiyu müthasorü mihtsürü khülang ki Pharaonü küde anipü?” 13Tüshe Atungpuhnü Mosa tüsho Aron ki asuk, tüsho Israel limbepü tüsho Ijip kiulongthsüpuh Pharaonü Ijip lomi chingnü Israel mihtsürü bekhitshihpü thiyukhüm jih.
Mosa tüsho Aron Yamkhün
14Harü ha arü bebuhrü yamkhün ching akubo: Jakob tsührü adüjibuh Reuben tsührübo ju Hanok, Pallu, Hezron, tüsho Karmi; harü ha Reuben buhtsührü ah. 15Simeon tsührübo: Jemuel, Jamin, Ohad, Jakin, Zohar, tüsho Kananberü tsührü Shaul; harü ha Simeon buhtsührü ah. 16Harü ha arü tsühkhin yande Levi tsührübo: Gershon, Kohath, tüsho Merari. Levi ju kam 137 lakheah. 17Gershon tsührübo: Arü yamkhün ayannü Libni tüsho Shimei lakheah. 18Tüsho Kohath tsührübo: Amram, Izhar, Hebron, tüsho Uzziel. Kohath kam 133 lakheah. 19Merari tsührübo: Mahli tüsho Mushi. Ha arü tsühkhinbo yande Levirü buhtsührü lakheah. 20Amramnü abuh niurü Jokebed aniube thsüpü lu; tüsho alibenü api kilim Aron le Mosa zübejih. Amram kutsüp kam 137 lakheah. 21Izhar tsührübo: Kora, Nepheg, tüsho Zikri. 22Tüsho Uzziel tsührübo: Mishael, Elzaphan, tüsho Sithri. 23Aronnü Amminadab tsührü tüsho Nashon niurü Elisheba aniube thsüpü lu; tüsho alibenü api kilim Nadab, Abihu, Eleazar tüsho Ithmar zübejih. 24Kora tsührübo: Assir, Elkana, tüsho Abiasaph; harü ha Kora buhtsührübo lakheah. 25Aron tsührü Eleazarnü Putiel tsührü bolungnü khülang lu; tüsho alibenü api kilim Phinehas zübejih. Harü ha Levi trük gukbo tüsho buhtsühbo ching akubo lakheah. 26Atungpuhnü Aron tüsho Mosa ki tha: “Israel mihtsürü arü chamnak ayannü Ijip chingnü bekhitang.” 27Mosa tüsho Aron anenü Israel mihtsürü Ijip chingnü bekhitpü dünkheak Ijip kiulongthsüpuh Pharao ki thakheah.
Atungpuhnü Mosa le Aron ki Thiyukhüm Jihkhi
28Ijip lo ching Atungpuhnü Mosa ki asuk nimung, 29Atungpuhnü Mosa ki tha, “I Atungpuh ah; inü nü ki thakhi alala Ijip kiulongthsüpuh Pharao ki thaang.” 30Tüshe Mosanü Atungpuh ki tha, “Kheahang, inü thiyu müthaso, küde thsah Pharaonü I ki anipü?”
Currently Selected:
ABEKHIT 6: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
