ABEKHIT 7
7
1Jumonü Atungpuhnü Mosa ki tha, “Kheahang, inü nü Pharao ki Thrünpuh nangde kamshihdo; tüsho nü khiung Aron nü yo wukihrü thsübah. 2Inü nü ki thiyukhüm jihkhi alala nünü athabah; tüsho nü khiung Aronnü Israel mihtsürü api lo chingnü awukhiukshihpü Pharao ki thabah. 3Tüshe inü Pharao mulong müküpde akamshihbah, tüsho inü Ijip lo ching amütsanbo tüsho khinthiyinbebo alü kamshihshih she, 4Pharaonü nü ki manide alabah; judüki inü Ijip kheak I khah jipkihbah tüsho I yo bonungrü I mihtsürü Israelrü mahkhapkhi atonü Ijip lomi chingnü abekhitbah. 5Tüsho Ijip kheak I khah chungkihbah Israelrü arü bolungnü abekhitchoki Ijiprünü I Atungpuh de amükheahbah.” 6Tüsho Mosa le Aron bünenü Atungpuhnü thiyukhüm jihkhi nangde rhimo. 7Anenü Pharao ki asukchoki Mosa kam 80 tüsho Aron kam 83 azorü lakheah.
Aron Tso
8Tüsho Atungpuhnü Mosa le Aron ki tha, 9“Pharaonü nüke ki, ‘Nükenü amütsan khülang huhang,’ de thasho, nünü Aron ki thabah, ‘Nü tso ju luang tüsho Pharao miki ayoshang, tüsho ju phuruto khülang kambah.’” 10Junangde Mosa le Aronnü Atungpuhnü thiyukhüm jihkhi nangde Pharao ki yü tüsho rhimo; Aronnü api tso Pharao tüsho ayamlarübo miki ayoshih tüsho ju phuruto khülang kam. 11Tüshe Pharaonü she lümlung larü mihtsürü tüsho wurük-huhrü jide arü; junangde Ijip wurük-huhrübonü she arü wurüknü ju ruk thsü. 12Tümütüsho mihtsürü abannü nihbuh tso ayoshih tüsho jurübo phurutobo kam. Tüshe Aron tsonü arü tsobo muyuabah. 13Tütüshe Atungpuhnü athakhi nangde Pharao mulong müküpde kam tüsho apinü ane ki mani.
Ijip Thsümüchikhi: Thiyih
14Jumonü Atungpuhnü Mosa ki tha: “Pharao mulong müküplah; apinü mihtsürübo müyüshih. 15Pharao kilim yapsu yüang tümüde api ke lim yüchoh; nünü api shorupü keyean zhipang tüsho phuruto kamkhi tso nü khah ching shuhang. 16Tüsho nünü api ki thabah, Atungpuh Ibrirü Thrünpuhnü I nü kilim thiyia arüshih, I mihtsürü yüshang, junangde arünü sunglo ching I tankihbah; tüshe kheakü khiungde nünü mani.” 17Atungpuhnü ha thachoh, “Ha hode I Atungpuh ah de nünü amükheahbah: Kheahang, I khah ching shuhkhi tsonü inü Nile ke rhapbah, tüsho ju thiyih kambah, 18Nile ching thüngühbo shebah, tüsho Nile ju shuhrhüm münimde kambah Ijiprünü Nile ke muyungkhukde alabah.” 19Judüki Atungpuhnü Mosa ki tha, “Aron ki thaang, Nü tso luang tüsho Ijip ching ayungbo, kerubo, kedükim tüsho kekhip kumung nü khah chungkihang, junangde jurü thiyih kambah; tüsho Ijip lomi alala ching, sang le lung pangjiphüh chido ching thiyih labah.”
20 Atungpuhnü thiyukhüm jihkhi nangde Mosa tüsho Aronnü rhimo; Pharao le ayamlarübo mikinü apinü tso shuhkihbah Nile ke rhap, tüsho Nile ching lakhi ke alala thiyih kamabah. 21Nile ching thüngühbo sheabah; tüsho Nile ju shuhrhüm münimde kambah Ijiprünü Nile chingnü ke muyungkhuk; tüsho Ijip lomi alala ching thiyih lakheah. 22Tüshe Ijip wurük-huhrübonü arü wurüknü ju ruk thsü; jumonü Pharao mulong müküpde kamlo, tüsho Atungpuhnü athakhi nangde apinü ane ki mani. 23Pharaonü rholobah ayam ching yü, tüsho ha she api mulong ching mühan. 24Jumonü Ijiprü alalanü ke yungpü thsungkheaknü ayung mükamde kiu, tümütüsho arünü ayung ke ju muyungkhukde alakheah. 25Tüshe Atungpuhnü Nile rhapbah nimung thüne bankhit.
Currently Selected:
ABEKHIT 7: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
