ABEKHIT 8
8
Kheangbo
1Tüsho Atungpuhnü Mosa ki tha, “Pharao ki yübah thaang, ‘Atungpuhnü ha thachoh: I mihtsürü yüshang, junangde arünü I tankihbah. 2Tüshe nünü arü müyüshihsho, kheahang, inü nü lomi alala kheangbonü athsümüchibah. 3Junangde kheangbonü Nile mithülambah, ju wukhiukbah tüsho nü yam ching, nü yo akhiungshakbo ching, nü yapkiu kheak, nü yamlarübo le nü mihtsürübo yam ching, tüsho phuru le phühbo ching arübah. 4Tüsho kheangbonü nü, nü mihtsürübo, tüsho nü yamlarübo kheak yükihbah.’” 5Judüki Atungpuhnü Mosa ki asuk, “Aron ki thaang, ‘Tso shuhbah nü khah ju yungzübo, ayungbo, kekungbo kumung chungkihang, tüsho Ijip lomi kheak kheangbo yükihshang.’” 6Jumonü Aronnü Ijip kebo kurungkheak akhah shuhkih; tüsho kheangbo atubah Ijip lomi lüpchimabah. 7Tüshe wurükhuhrübonü arü wurük hode ju ruk thsü, tüsho Ijip lomi kheak kheangbo hande arü.
8Judüki Pharaonü Mosa le Aron jibah tha, “I tüsho I mihtsürübo kheaknü kheangbo lude atsopü Atungpuh ki tamkhüntamnüang; tüsho inü mihtsürübo Atungpuh ki laksah-a kingaünpü yüshihbah.” 9Mosanü Pharao ki tha, “Nü tüsho nü yamlarübo le nü mihtsürübo thsungkheak tamkhüntamnüpü I ki asühde thiyukhüm jihang, junangde kheangbo ju nü kheak le nü yambo chingnü adükheakbah tüsho Nile ching lang aninga labah.” 10Tüsho Pharaonü tha, “Shido.” Mosanü tha, “Nünü athakhi ruk thsang, junangde Atungpuh isa Thrünpuh nangde she müla de nünü amükheahbah. 11Kheangbonü nü le nü yambo tüsho nü yamlarübo le nü mihtsürübo kheaknü chamachihbah; arübo Nile ching lang aninga alabah.” 12Jumonü Mosa le Aronnü Pharao kinü wukhiuk; tüsho Mosanü Atungpuh ki apinü Pharao azhihde kheangbo handarükhi dünkheak zhi. 13Junangde Mosa yu yande Atungpuhnü rhimo; tüsho thüyambo le thüyam dükeakbo tüsho thulubo chingnü kheangbo ju sheabah. 14Arünü jurübo wumujung tüsho alo ju shuhrhüm münim. 15Tüshe küyimki Pharaonü keamramkhi ngükhea, apinü amulong müküplo tüsho Atungpuhnü athakhi nangde, apinü ane ki mani.
Kurheakbo
16Judüki Atungpuhnü Mosa ki tha, “Aron ki thaang, ‘Nü tso shuhkihang, tüsho alo rhapang, junangde Ijip lomi alala ching asungthulung ju kurheakbo kambah.’” 17Tüsho arünü jude thsü; tümüde Aronnü api tso shuhkihbah alo rhap tüsho asungthulungnü kurheakbo kambah mihtsürü le shiwüh kheak yükih. Ijip lomi alala ching asungthulung ju kurheakbo kamabah. 18Kheakü wurük-huhrübonü arü wurük hode kurheakbo ludarüpü thsü, tüshe arünü mukuk. Jumonü kurheakbo ju mihtsürü tüsho shiwühbo kheak lakheah. 19Judüki wurük-huhrübonü Pharao ki tha, “Ha Thrünpuhnü rhimoa lah.” Tüshe Atungpuhnü athakhi nangde Pharao mulong müküplode kam tüsho ane ki mani.
Somünakbo
20 Atungpuhnü Mosa ki tha, “Yapsu mükikde asürang tüsho api ke lim yüchoki Pharao miki zhipang, tüsho api ki thaang, ‘Atungpuhnü ha thachoh, “I mihtsürü yüshang, junangde arünü I tankihbah. 21Nünü I mihtsürü müyüshihsho, inü nü le nü yamlarübo, nü mihtsürübo kheak tüsho nü yambo ching somünak boto arüshihbah. Ijiprü yambo tüsho arü zhipkhi alo alala somünakbonü amibah. 22Tüsho ju nimung ching inü I mihtsürü lapung Goshen lomi somünak boto mülapü thsüde aningshihbah, junangde ha lo ching I Atungpuh de nüsanü amükheahbah. 23Inü I mihtsürü le nü mihtsürü dükeak büthsübah. Ha amütsan shido labah.”’” 24Tüsho Atungpuhnü jude rhimo. Pharao yam ching, ayamlarübo yam ching tüsho Ijip lomi alala ching somünaknü thsümünimjih.
25Judüki Pharaonü Mosa tüsho Aron jibah tha, “Yüang, ha lomi ching nüsa Thrünpuh ki laksah-a kingaünang.” 26Tüsho Mosanü tha, “Ha rhimopü alungki yung, tümüde isanü Atungpuh isa Thrünpuh kilim laksah-a kingaünkhi ju Ijiprü ki athraneanbe ah. Tüsho arü miki athraneanbe lakhi isanü laksah-a kingaün jihsho, arünü isa murusahba de? 27Isanü nimung mahsam limtsahde sunglo ching yüanü tüsho apinü isa ki thiyukhüm jihkhi yande Atungpuh isa Thrünpuh kilim laksah-a kingaünanü.” 28Tüsho Pharaonü tha, “Inü nüsa yüshihanü, junangde nüsanü sunglo ching Atungpuh nüsa Thrünpuh kilim laksah-a kingaünbah; nüsanü limshudü lang düyü. I thsungkheak tamkhüntamnüjang.” 29Judüki Mosanü tha, “Kheahang, I nü kinü wukhiukchoh, tüsho inü Atungpuh ki tamkhüntamnübah, junangde Pharao, ayamlarübo, tüsho api mihtsürübo kheaknü shido somünak boto tsoabahbah. Tüshe kheaküa Pharaonü akeangyu thade mihtsürübo Atungpuh kilim laksah-a kingaünpü müyüshihde düthsü.” 30Jumonü Mosanü Pharao kinü wukhiuk tüsho Atungpuh ki tamkhüntamnü. 31Tüsho Atungpuhnü Mosa yu yande rhimo; apinü somünak boto Pharao, ayamlarübo, tüsho api mihtsürübo kheaknü tsoshih. Khülang she maning. 32Tüshe ha kim ching she Pharaonü amulong müküplode kam tüsho mihtsürübo müyüshih.
Currently Selected:
ABEKHIT 8: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
