THRÜNTAN 24
24
Isak Niube
1Kheakü Abraham zoban a ashinbuhrü lakheah, tüsho Atungpuhnü lüpdükhi ching Abraham müngühjih. 2Jumonü Abrahamnü api lakhi alala kurungkheak yakzanshuhbuh ayamlarü azopü ki tha, “Muzhobah, nü khah I pho dükeak zoang, 3junangde I lakhi bolung Kananberü lungnü nünü I tsührü niube mulushihpü Atungpuh , yinmi tüsho alomi Thrünpuh tamde thiyuchihchimshihbah; 4tüshe nünü I lomi tüsho I keoniorü kilim yüang tüsho I tsührü Isak niube lujang.” 5Tüsho yamlabuhnü api ki tha, “Khükia alibenü ha lomi lim I yande marüde alabah. Nü arüpung lomi lim inü nü tsührü belode ayüpü?” 6Tüshe Abrahamnü api ki tha, “I tsührü ju ching belode müyüpü kümkangang. 7Atungpuh yinmi Thrünpuh, shepünü I keoniorü lomi tüsho I buh yamkhün chingnü I bea lukhea, tüsho I ki thiyuchihchimde tha, ‘Nü tsühsoniusobo kilim inü ha lomi jihbah,’ apinü nü müngüh api yunirü thiyibah tüsho nünü ju chingnü I tsührü niube lujihbah. 8Tüsho alibenü nü yande arüpü mümulongsho, ha thiyuchihchimkhi chingnü nü zuzu labah, judü lang I tsührü ju ching belode düyü.” 9Jumonü yamlabuhnü api khah anihbuh putungrü Abraham pho dükeak zo, tüsho ha dünkheak thiyuchihchim thsü.
10Judüki yamlabuhnü api putungrü yo kemel 10 lu tüsho chamachih, tümüde api putungrü kukrukbo alala anihbuh khah ching lakheah. Tüsho apinü tsahmusubah Mesopotamia lim, Nahor kiuto ching yü. 11Tüsho apinü arelim aliberübo kekhip yüpü kim ching, kemelbo ju kiuto aleanglim kekhip ki khukninga binshih. 12Judüki apinü tha, “O Atungpuh I putungrü Abraham Thrünpuh, muzhobah khihni I akuk ngüshang, tüsho I putungrü Abraham ki amuzho huhang. 13Kheahang, I ha kheak kekhip ki zhiplah, tüsho kiuto mihtsürü tsührübebo ke khippü akhiukchoh. 14Inü aliberü khülang ki, ‘Muzhobah inü ayungpü nü kephüh koyuang,’ de thasho anihbenü thashang, ‘Yungang, tüsho inü nü yo kemelbo she aduhbah’— alibe ju nünü nü yamlarü Isak khilim mokhitkhi lashang. Ha hode nünü I putungrü ki amuzho huhdo de inü amükheahbah.”
15Apinü müthakhamyide, Rebeka adubuh kheak kephüh shuhbah akhiuk. Alibe ju Abraham niurü Nahor le aniube Milka ane tsührü Bethuel tsührübe lakheah. 16Alibe ju khide jak atsü atsangkhitkhi lakheah. Alibenü kekhip ching yükibah kephüh ching mide yuk tüsho atu. 17Tüsho yamlabuhnü alibe shorupü shande yübah tha, “Muzhobah nü kephüh ching yo I yungshang.” 18Alibenü tha, “Yungang, I tungpuh.” Judüki alibenü niokheam tüsho kephüh akhah ching shuhkhi tüsho api yungshih. 19Küyimki api ayungkhamshihkhea, alibenü tha, “Inü nü yo kemelbo thsungkheak she arü muyungkhamyi khiungde ke khipbah.” 20Jumonü alibenü nahnahde kephüh ju sangphuru ching yeahkeang, tüsho ke hihde akhippü kekhip ching shande yü, tüsho api yo kemelbo alala khilim ke suhdahde khip. 21Mihtsürü junü malande lang, Atungpuhnü api hantsahkhi akuk ngüshih-a lashi yungnü amükheahpü alibe kheak kheahmüripde alakheah.
22Küyimki kemelbo ayungkhamkhea, mihtsürü junü suna nupungnüpü düpüt 6 tüsho suna bingkhüm düpüt 115 dün yo lubah yukjih. 23Apinü keokhi, “Nü shepü tsührübe a? Muzhobah I ki thaang, isa azhing ching binkheampü thsüde nü buh yam ching khiungshak lashi?” 24Alibenü alo, “I a Milkanü Nahor kilim zübejihkhi Bethuel tsührübe ah.” 25Tüsho alibenü thalo, “Ayimkippü thsüde sangrung-neang le ajim, tüsho abinkheampü khiungshak isa suhdahde lah.” 26Judüki mihtsürünü aku mükhüm tüsho Atungpuh kingaün. 27Tüsho apinü tha, “I putungrü ki api amüthsüm tüsho thiyuro mübahyukkhi I putungrü Abraham Thrünpuh Atungpuh shiang. I thsungkheaknü, Atungpuhnü I hantsah ching I putungrü keoniorü yam lim bede arüdo.”
28Alibenü alihde yü tüsho harü dünkheak abe ki thaa huh. 29Kheakü Rebeka akhiung amung Laban lakheah, tüsho apinü kekhip ki lakhi mihtsürü kilim niokheamde yü. 30Apinü nupung-nüpü, tüsho aniurü khah ching bingkhüm ngü müleangde, tüsho mihtsürü junü anihbe ki thakhi Rebekanü athakhi soakede, apinü wukhiuk tüsho api ju kekhip phünide kemelbo ki zhipde ngü. 31Apinü tha, “Azahang, nü Atungpuhnü müngühjihbuh! Tümüde nü wungdo zhipla? Inü nü thsungkheak thüyam tüsho kemelbo thsungkheak dangpung khülang thsakhamlah.” 32Judüki mihtsürü ju thüyam ching yüzah. Labannü kemelbo hah shuhkhijihbah sangrungneang tüsho ajim kip, tüsho api le anihbuh lung bekhi mihtsürübo jing müsühpü ke jih. 33Judüki api miki tsühyungpü zojih, tüshe apinü tha, “Inü athapü lakhi nü ki müthayikia inü mütsüh.” Labannü tha, “Thaang.”
34Jumonü apinü tha, “I Abraham yamlarü ah. 35Atungpuhnü I putungrü tode müngühjihdo, tüsho alarü kamdo; tüsho apinü anihbuh kilim mihnu boto le moshibo, shotoyinchi le suna, athrürü tüsho aliberü yamlarübo, tüsho kemelbo le donkibo jihdo. 36Tüsho I putungrü niube Saranü I putungrü kilim anihbe shina lachoki tsührü khülang zübejih; tüsho apinü anihbuh lakhi alala api kilim jihdo. 37Kheakü I putungrünü I ki thiyuchihchimshihde tha, ‘Nünü I lakhi lomi Kananrü tsührübebo lungnü I tsührü niube dülujih; 38tüshe nünü I buh yamkhün tüsho keoniorü kilim yüang tüsho I tsührü niube lujang.’ 39Tüsho inü I putungrü ki tha, ‘Küsa aliberünü I yande marüde alabah.’ 40Tüshe apinü I ki tha, ‘Atungpuh , shepü miki I tsahchonü api yunirü nü lung arüshihbah tüsho nü limro akuk ngüshihbah; tüsho nünü I keoniorü tüsho I buh yamkhün chingnü I tsührü niube lujihbah. 41Nü I keoniorü bolung yünü akhiungchoki ha thiyuchihchim chingnü mütsanmükhibah; tümüde arünü alibe nü kilim müjihsho, ha thiyuchihchim chingnü nü zuzu labah.’
42“Tüsho ha nimung inü kekhip ki arü tüsho tha, ‘O Atungpuh I putungrü Abraham Thrünpuh, nünü kheakü I yüpü limro ching akuk ngüshihsho, 43kheahang, I kekhip ki zhiplah; tüsho küyimki atsangkhitkhi ke khippü arüba, tüsho inü alibe ki thaba, “Muzhobah nü kephüh ching yo ayungpü I kilim ke anükhüh jihang,” 44tüsho alibenü I ki, “Yungang, tüsho inü nü yo kemelbo thsungkheak she akhipbah,” de thasho–alibe ju I putungrü tsührü thsungkheak Atungpuhnü amokhitkhi lashang.’ 45Tüshe inü I mulong ching müthakhamyide, Rebeka adubuh kheak kephüh hanbah akhiukde alakheah; tüsho alibenü kekhip ching yüki tüsho ke ju khip. Tüsho inü alibe ki tha, ‘Muzhobah I yungshang.’ 46Alibenü nahnahde adubuh kheaknü kephüh müngükhi tüsho tha, ‘Yungang, tüsho inü nü yo kemelbo she ayungshihbah.’ Jumonü inü yung, tüsho alibenü kemelbo she yungshih. 47Judüki inü alibe ki keo tüsho tha, ‘Nü shepü tsührübe a?’ Tüsho alibenü alo, ‘Milkanü Nahor kilim zübejihkhi Bethuel tsührübe ah.’ Jumonü inü anupung kheak nüpü yukjih tüsho akhah ching bingkhümbo yukjih. 48Inü I ku mükhüm tüsho Atungpuh kingaün, tüsho I putungrü tsührü thsungkheak aniurü tsührübe lupü I thiyuro limro ching bebuh Atungpuh I putungrü Abraham Thrünpuh shijih. 49Kheakü nünü I putungrü ki amuzho tüsho thiyuro huhba shi yungnü I ki thaang, jude yungsho I tsülim yungsho huzulim anguhanü.”
50Judüki Laban tüsho Bethuel bünenü alo tüsho tha, “Ha Atungpuh kilimnü arüchoh; isanü nü ki amütsü yungsho atsü she müthakhuk. 51Ha ching nü müngüh Rebeka lah; anihbe bebah yüang tüsho Atungpuhnü asukkhi nangde anihbe nü putungrü tsührü niube thsüshang.”
52Küyimki Abraham yamlabuhnü arü yubo sokhea, apinü alo lim mükhümde Atungpuh kingaün. 53Judüki yamlabuhnü suna le shotoyinchi mürezhingzhing tüsho khimmihbo lude akhiukbah Rebeka kilim jih; apinü akhiung le abe büne kilim she amo-achak thsambahbo jih. 54Tüsho api le api lung bekhi mihtsürübonü tsühyung tüsho ju re ju ching binkheam. Küyimki arü yapsu asürükheanü, apinü tha, “I putungrü kilim I yüshang.” 55Tüshe alibe akhiung le abe bünenü tha, “Anünübe isa lung nimung thürü lang she binshang; jushu alibe yüshang.” 56Tüsho apinü arü ki tha, “I düzhipdo, tümütüsho Atungpuhnü I limro akuk ngüshihdo; I putungrü kilim yüpü thsüde I yüshang.” 57Jumonü arünü tha, “Isanü anünübe jibah tüsho anihbe ki keobah.” 58Judüki arünü Rebeka ji tüsho tha, “Nü ha buh mihtsürü lung yüba shi?” Tüsho alibenü alo, “I ayübah.” 59Jumonü arünü Rebeka tüsho anihbe kümrü, tüsho Abraham yamlarü le api mihtsürübo thiyia yüshih. 60Tüsho arünü Rebeka müngühjih tüsho tha: “Isa niurü, nü a chithürü thürübo abe thsüang shi; tüsho nü tsührübonü arü riri kiutobo kukkhitshang.”
61Judüki Rebeka tüsho anihbe yamlaberü anenü thsakham tüsho kemelbo kheak binbah mihtsürü ju yande yü. Junangde yamlabuhnü Rebeka bea lu tüsho chamachih. 62Kheakü Beer-lahai-roi chingnü Isak arü, tümüde api Negeb ching lakheah. 63Isaknü lümakheahpü arelim thulu ching yü; tüsho abina kheahshe kemelbo arüde alakheah. 64Judüki Rebekanü zünga kheah, tüsho küyimki anihbenü Isak ngükheanü kemel kheaknü aki; 65tümüde alibenü yamlabuh ki thakheah, “Isa shorupü thulu ching la ju shepü a?” Tüsho yamlabuhnü alo, “Ju I putungrü ah.” Jumonü alibenü kudukiube lu tüsho anihbe muhiudo. 66Tüsho yamlabuhnü anihbuhnü arhimokhi alala Isak ki thaa huh. 67Judüki Isaknü alibe ju abe Sara khimyam ching bede yüzah; apinü Rebeka bea lu tüsho aniube kam, tüsho apinü anihbe muzho. Jumonü abe sheabah dunglim Isak mulong shukheam.
Currently Selected:
THRÜNTAN 24: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
