THRÜNTAN 44
44
Pung Dükheakkhi
1Tüsho apinü anihbuh yam kimthsübuh ki thiyukhüm jihde tha, “Mihtsürübo shungliuqiuqiubo ching arünü ahankhukkhi thülün tsühyungbe yukjang, tüsho nihbuh shungliu-qiuqiu mün ching mihtsürübo aban nihbuh sho yukjang. 2I yo shotoyinchi pung she, tüsho hi thulobe sho akheambuh shungliu-qiuqiu mün ching yukjang.” Junangde Josepnü athakhi yu yande apinü rhimo. 3Ayinkhi akede, mihtsürübo tüsho arü donkibo thiyia yüshih. 4Tüsho küyimki arübo kiuto chingnü wukhiukbah limshu müyüyide alakhea, Josepnü api kimthsübuh ki tha, “Asürübah mihtsürübo müshamang; tüsho küyimki nünü arü yanphuhbanü arü ki thaang, ‘Tümüde nüsanü atsü müthri amütsü jihlokhea? 5Ha chingnü I tungpuhnü yungchoh yung de, tüsho hanü apinü arüngako rhimochoh yung de? Ha hode nüsanü amütsü rhimodo.’ ”
6Jumonü apinü arü yanphuh, tüsho apinü harü yubo tha. 7Tüsho arünü api ki alo, “Tümüde isa tungpuhnü hadürü yubo thacho? Nü yamlarübonü hadürü rhimopü isa kheaknü limshuabahang. 8Kheahang, isa shungliu-qiuqiubo mün ching yo isanü angükhi sho Kanan lomi chingnü nü kilim hanlode arüdo. Dale küde thsah isanü nü tungpuh yam chingnü shotoyinchi yungsho suna ahühpü? 9Nü yamlarübo shepü lung ju ngübanü api sheshang, tüsho isa she isa tungpuh azhorü thsübah.” 10Tüsho apinü tha, “Nüsanü athakhi nangde thsang: shepü lung ju ngübanü I yo azhorü kambah, tüsho nüsa aningkhi a amudopü mülade alabah.” 11Judüki mihtsürü abannü nihbuh shungliu-qiuqiu alo kheak shuhkhi, tüsho khimshuh. 12Jumonü apinü azopü kheaknü yimmusubah akheambuh kheaknü kheam; tüsho pung ju Benjamin shungliu-qiuqiu chingnü ngü. 13Judüki arünü arü khim thorüp, tüsho mihtsürü abannü nihbuh donki hah thsüloa mühahbah kiuto lim yülo.
14Jumonü Juda tüsho api keoniorübo Josep yam ching arü, tüsho api ju ching lakheah; tüsho arünü api miki alo kheak khukning. 15Tüsho Josepnü arü ki tha, “Nüsanü arhimokhi ha tümü a? I hadürü mihtsürünü arüngako rhimo hode ayimkhitbah de nüsanü mümükheahkhea de?” 16Judüki Judanü tha, “Isa tungpuh ki isanü tümü thakhukba? Isanü tümü asukba? Yungsho isa amülim mülakhi küde thsah amütsanba? Thrünpuhnü nü yamlarübo mülimkhi yimkhitdo; isa le shepü lung pung ngükheanü isa chido, isa tungpuh yo azhorübo ha kheak lah.” 17Tüshe apinü tha, “Inü jude athsüpü I kheaknü limshuang; tüshe shepü mihtsürü khah ching pung ngükheanü I yo azhorü thsübah. Tüsho nüsa a mungtsü chingnü nüsa abuh kilim yüang.”
Judanü Benjamin thsungkheak Mushukhi
18Judüki Judanü api thüninde yü tüsho tha: “O I tungpuh, muzhobah nü yamlarünü I tungpuhnü sode thiyu khülang thashang; tümüde nü a Pharao ruk ah. 19I tungpuhnü api yamlarübo ki keokhi, ‘Nüsa abuh yungsho nüsa niurü la shi?’ 20Tüsho isanü isa tungpuh ki alo, ‘Isa abuh ashinbuhrü lah, tüsho api ashinshu tsührü, azürü lah; akhiung a sheabahdo, tüsho abe tsührü bolung api lang aninga lah, tüsho abuhnü api muzhochoh.’ 21Judüki nünü nü yamlarübo ki tha, ‘Api I kilim bede akiang, junangde inü api kheahanü.’ 22Tüsho isanü isa tungpuh ki alo, ‘Azübuhnü abuh müchamkhikhuk, tümüde apinü abuh chamkhisho, abuh ashebah.’ 23Tüshe nünü nü yamlarübo ki tha, ‘Nüsa lung nüsa niurü makisho, nüsanü I miro müngülo.’ 24Junangde küyimki isa nü yamlarübo isa abuh kilim wutukhea, isanü isa tungpuh yubo api ki tha. 25Tüsho isa abuhnü tha, ‘Yüloang tüsho isa thsungkheak tsühyungbe anükhüh thuloang.’ 26Tüshe isanü alo, ‘Isa müyükikhuk; isa niurü akheambuh isa lung besho isa ayükibah; tümüde isa niurü akheambuh isa lung mübesho isanü mihtsürübuh miro müngüde alabah.’ 27Judüki nü yamlarü I buhnü isa ki tha, ‘I niubenü I kilim tsührü 2 zübejihdo de nüsanü mükheahlah; 28tüsho khülang I kinü wukhiukabahdo, tüsho tsükjide api a adütre kamde thonakdo de inü tha; tüsho judükinü inü api müngü. 29Tüshe nüsanü ha she I mikinü bede tsobah api kheak thsümütsü yükihsho, nüsanü I ku buyiukkhi mulong rozhakde shekhün ching yüzahshihbah.’ 30Jumonü kheakü, I nü yamlarü I buh kilim yübah tüsho azübuh isa lung mübesho, api rhangdung ju azübuh rhangdung kheak dakkihbah lale, 31azübuh isa lung mübekhi ngüsho api ashebah. Junangde nü yamlarübonü isa abuh nü yamlarü api ku buyiukkhi mulong rozhakde shekhün ching yüzahshihbah. 32Tümüde nü yamlarünü azübuh thsungkheak I buh ki hahmülang lude tha, ‘Inü api nü kilim belode marüsho, lünnü I buh miki inü mah hanbah.’ 33Jumonü kheakü, muzhobah azübuh müthri nü yamlarü a I tungpuh azhorü thsüde tukloa lashang, tüsho azübuh a api khiungmungrü lung yüshang. 34Tümüde I lung azübuh mübede inü küde thsah I buh kilim yüpü? I buh kheak thsümütsü arüpü lakhi inü trelah.”
Currently Selected:
THRÜNTAN 44: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
