THRÜNTAN 45
45
Josepnü Akeoniorübo ki Api Mükheahshihkhi
1Judüki Josepnü api ki zhiprü alala miki marümkhukde kam, tüsho apinü zhikhit, “Alala I kinü wukhiukshang!” Jumonü Josepnü api keoniorübo ki anihbuh mükheahshihchoki api lung she müzhip. 2Apinü achangnü trip, tüsho Ijiprü le Pharao yamkhünnü ju so. 3Judüki Josepnü api keoniorübo ki tha, “I Josep ah; I buh kheakü khiungde la shi?” Tüshe api keoniorübonü api ki malokhuk, tümüde Josep miki arübo müyinnim. 4Tüsho Josepnü api keoniorübo ki tha, “Muzhobah I phünide arang.” Tüsho arünü phünide arü. Tüsho apinü tha: “I nüsanü Ijip ching yinkhi nüsa niurü Josep ah. 5Tüshe kheakü, nüsanü I ha ching yinkhi dünkheaknü nüsa mulong dütukthsü yungsho nüsa nihbuh kheak bukdakhiuk; tümüde Thrünpuhnü rhangdung küma lashihpü nüsa müngühnü I thiyido. 6Tümüde ha kam mahne lomi ching khümzung lado, tüsho kheaküshe kam phüngü wochakpü yungsho yimlupü mülade alabah. 7Tüshe Thrünpuhnü nüsa alomi ching aninga lashihpü tüsho abekhitkhi atonü nüsa rhangdungbo khümkhitpü I nüsa müngühnü yüshihdo. 8Jumonü I ha ching arüshihkhi ju nüsanü yung, tüshe Thrünpuhnü ah; tüsho apinü I Pharao yo achangbe atorü, api yam alala putungrü, tüsho Ijip lomi alala yakzanshuhrü kamshih. 9Niokheamde I buh kilim wutuang, tüsho api ki thaang, ‘Nü tsührü Josepnü ha thachoh: “Thrünpuhnü I Ijip lomi alala atungrü kamshihdo; dülakmade I kilim akiang. 10Nü Goshen lomi ching labah, tüsho nü le nü tsührübo, nü mihnubo le nü moshibo, tüsho nü lakhi alala I phünide alabah. 11Ju ching inü nüsa thsungkheak jihbah, jude yungsho nü le nü yamkhün tüsho nü lakhi alala mükheakmürakde akambah; tümüde kheaküshe kam phüngü khümzung labah.”’ 12Tüsho kheahang, I münnü nüsa ki thachoh de nüsa le nüsa niurü Benjamin mükbonü ngülah. 13Junangde nüsanü Ijip ching I müretahde alakhi alala I buh ki thaang; tüsho nüsanü niokheamde I buh ha ching bede akiang.” 14Jushu apinü aniurü Benjamin kheak kap tüsho trip, tüsho Benjaminnü tripde api kap. 15Tüsho apinü akeoniorü alala müthsüp tüsho trip, tüsho ju dunglim akeoniorübonü api ki asukachih.
16Kheakü ha yusheak Pharao yam chingnü so, “Josep keoniorübo arüa lah,” junangde hanü Pharao tüsho api yamlarübo tsüde asühshih. 17Tüsho Pharaonü Josep ki tha, “Nü keoniorübo ki thaang, ‘Ha rhimoang: nüsa shiwühbo hah thsüa luang tüsho Kanan lomi lim yüloang, 18tüsho nüsa abuh le nüsa yamkhün bebah arang; inü nüsa kilim Ijip lomi yo atsübe jihbah, tüsho nüsanü lomi müdang tsühbah. 19Kheakü ha rhimopü arü ki thiyukhüm jihang: Nüsa tsührübo tüsho nüsa niuberübo thsungkheak Ijip lomi chingnü khora-lolungbebo luang; nüsa abuh bebah arang. 20Nüsa kukrukbo thsungkheak mulong ashide düla, tümüde Ijip lomi yo atsüdakbe alala nüsa yo ah.’ ”
21Judüki Israel tsührübonü jude thsü; tüsho Pharao yukhüm yande Josepnü arü kilim khora-lolungbebo jih, tüsho apinü arü kilim hantsah thsungkheak tsühyungbebo jih. 22Apinü arü alala kilim abande amüthribe khimmihbo jih; tüshe apinü Benjamin kilim shotoyinchi nak 300 tüsho amüthribe khimmih mihbüm 5 jih. 23Tüsho apinü abuh kilim kukruk harü mühah: Ijip kukruknü hah thsükhi donki 10, tüsho hi, yikhap, tüsho hantsah ching abuh khilim tsühyungbenü hah thsükhi donki dre 10. 24Jumonü apinü akeoniorübo thiyia yüshih, tüsho arünü chamachih; tüsho apinü arü ki tha, “Limro ching dürukachih.”
25Judüki arünü Ijip chingnü wukhiuk tüsho Kanan lomi ching arü abuh kilim arü. 26Tüsho arünü api ki tha, “Josep kheakü khiungde lah, tüsho api Ijip lomi alala kurungkheak kovünor ah.” Tüsho Jakob lümshangmang, tümütüsho apinü arü kheak akin müla. 27Tüshe küyimki arünü Josepnü arü ki thakhi yubo alala api ki thakhea, küyimki apinü anihbuh hanpü Josepnü khora-lolungbebo mühahkhi ngükhea, arü abuh Jakob me reangzahlode arü. 28Judüki Israelnü tha, “Ha suhdo. I tsührü Josep kheakü khiungde lah. I ayübah tüsho I müsheyichokinü inü api kheahbah.”
Currently Selected:
THRÜNTAN 45: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
