HABAKKUK 2
2
Atungpuhnü Habakkuk ki Alokhi
1Inü aheangsadam kheak zhipbah, tüsho ju kheak aleangbah; apinü I ki tümü thaba tüsho inü atsangkhi dünkheak apinü tümü alobanü inü kheahde alabah.
2Judüki Atungpuhnü I ki alo tüsho tha: Michih ju lungbeakbo kheak müzhide thrütkihang, junangde ashanrünü ju khekhukbah. 3Tümüde kheaküshe akhukhit kim thsungkheak michih khülang lah; ha akheam yo asukchoh, tüsho mükeangrü. Ju lakmama she, aleangang; ha tsükjide arübah, mashu. 4Akükheangrü kheak kheahang! Arü me arü kheak mulungki, tüshe thiyuro-lungkirü arü akin hode alabah.
5Judüalalashe, yukhunü api thsungyukchoh; api bukmüke tüsho keamramde müla. Tümütüsho apinü Ashe-lomi nangde yihnelunelah; Ashekhi nangde küyimkishe api musuhdah. Apinü nihbuh thsungkheak trükshih alala bemukhungchoh, tüsho arü yo thsüpü mihtsürü alala kitmukhungchoh. 6Hadürü mihtsürü ki mihbüm abannü mükhemükimde arü ki keangrüde müthaba de, “Shepünü ahühkhi kukruk tüsho jangkhijangrakhinü nihbuh alarü kamchonü ayokhe!” Hanü külokhüh yüba?
7Nü shozüngrünü nahde masürüba de, tüsho arü asürübah nü majanshihba de? Judüki nü ju arü thsungkheak ayankhikhi kukruk thsübah. 8Tümütüsho nünü trükshih ahihdo yankhia ludo, tümütüsho mihtsürü thiyih bukkhi tüsho alomi kiutobo tüsho jurü ching larü alala ki athsümünim rhimokhinü aninga larü mihtsürü alalanü nü yankhia lubah.
9“ Nüsa sherü nüsa yambo thsungkheak amülim alü thsükhinü, thsünimthsüshi chingnü khümkhitpü thsüde nüsa sap achang kheak lanü are!” 10Nünü mihtsürü ahihdo laksahde nü yamkhün thsungkheak achihbe lümkhi thsüdo; nünü nü rhangdung dükheakshihdo. 11Lungbonü rhü chingnü azhibah, tüsho sanglung chingnü abinkiunü alojihbah.
12“ Nüsa sherünü thiyih bukkhinü kiulongto thsücho, tüsho amülimkhinü kiuto thrünchonü are!” 13Mihtsürübonü motrushihpü mokhih lang Atungpuh kilimnü mürhimode tüsho akeangkeang ching trükshihbo khichoh yung de? 14Tüshe kebonü keto zhidokhi nangde, Atungpuh müretahkhi mükheahmudunü alomi mibah.
15“ Nüsa sherünü yamhingrü ki arü mümüshangyi khiungde arü bünkeang kheahpü thsüde keluh chingnü duhchonü are!” 16Nü müretah müthri achihnü mide akambah. Nü yungang, tüsho yingyingde tsahang! Atungpuh khah tsülim peangnü nü mükamde pung arübah, tüsho nü müretah kheak mungchih arübah! 17Tümüde Lebanon kheak athsümünim rhimokhinü nü zhidobah; tümütüsho mihtsürü thiyih bukkhi tüsho alomi le kiutobo tüsho jurü ching larü alala ki athsümünim rhimokhi hode shiwühbo thsümünimkhinü nü trede akamshihbah.
18Athsürünü athsükhi sangthsü, yungsho akeangyu thsangyukhi mejak tümü yihnüpü la? Tümüde athsükhitkhi ju thiyu masukde sangthsü khülang lalashe ha thsübuhnü ju kheak kinchoh! 19Nüsa sherünü sang ki, “Asürang!” de thacho, malankhi lung ki, “ Wusuang” de thachonü are. Hanü thsangyukhukla de? Kheahang, ha suna tüsho shotoyinchi mujukihkhi lah, tüsho ju ching sheak müla.
20Tüshe Atungpuh api amüsüh arüngyam ching lah; alomi alalanü api miki malande laang!
Currently Selected:
HABAKKUK 2: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.