HABAKKUK 3
3
Habakkuk Tamkhüntamnü
1Wukihbuh Habakkuknü Shigionoth bede tamkhüntamnükhi.
2 Atungpuh , inü nü mungthukhi sodo;
nü rhimokhibo dünkheak inü trede zhip, O Atungpuh .
Isa nimungbo ching jurü thsüphuloshang,
isa kimbo ching jurü mükheahshang;
mulong zhipzhip ching mihmüthsüm lümkhitjang.
3Teman chingnü Thrünpuh, Amüsühbuh Khülang Paran müzüng chingnü arü.
Api müretahkhinü thüningbo muhiudo tüsho api shikhinü alomi mide lakheah.
4Ayinatrümkhi ju ani nangde alakheah;
anijingbo ju api wu jika lapung api khah chingnü arü.
5Api müngüh ashebe-tukthsü yü,
tüsho adunglim arümnü yande yü.
6Apinü tukloa zhip tüsho alomi niuk;
apinü kheah tüsho trükshihbo ajanshih.
Lün lakhi müzüngbo shuh-a ajan;
jipü limtsah limrobo bede lün lakhi wungbo keamyuk.
7Inü Kush khimyambo thsünüde ngü;
Midia lomi khimyam zhindokhimbo ajan.
8Nü bukakhiukkhi ju ayungbo azhihde alakhea de, O Atungpuh ?
Nü mulong zhipzhipkhi ayungbo azhihde alakhea de?
Nünü khora tüsho lolungbebo bechoki nünü keto azhihde bukakhiukkhea de?
9Nünü nü sanglüh atünado,
nü hühzobo kippü thsakham.
Nü ketonü alomi azüshih.
10Müzüngbonü nü ngüchoki, arünü ajan;
thüningbo chingnü kebo bukkhi.
Alomi khüp kebonü ahuk tüsho arü abükkhibo changde yükih.
11Nü hühzobo phürapkhi ching,
nü thsüh rakrakkhi ching,
ani tüsho khinu thüningbo ching zhikde zhip.
12Mulong zhipzhip ching nünü alomi jung,
bukakhiukkhi ching nünü trükshihbo thrüm.
13Nünü nü mihtsürü khümkhitpü,
mujude-mokhitkhi khümkhitpü mikhuh ching arü.
Nünü mihbukmuyuk lomi limberü zünak,
ku chingnü jing khiungde khuka bahjih.
14Nünü isa hiumüzütshihpü chinthrüm nangde,
jikde alakhi zhochihrü muyupü nangde arükhi,
api thirithsürübo limthobuh anihbuh hühzonü chinkhitshih.
15Nünü nü khorabonü keto jung,
ke atobo rhuzhihzhih.
16Inü sochoh, tüsho I mulong ching thukthukchoh;
düsheaknü I münküpbo niukchoh.
I robo ching ashuh yüzahchoh,
tüsho I jingbo ajanchoh.
Isa yanrü mihtsürü kheak thsümütsü nimung arüpü thsungkheak inü zhikde aleangchoh.
17Khubasodung mupungpung she,
tüsho kurungasodungbo kheak aso mükihkih she;
olivnü masoso she tüsho thulubonü jim makhiukkhiuk she;
mihnu yam chingnü mihnu boto mülade kamkam she,
tüsho moshi yam chingnü moshi boto mülade kamkam she,
18tütüshe inü Atungpuh lung asühachihbah;
inü I khümkhitrü Thrünpuh lung tode asühbah.
19Atungpuh T H RÜ NPU H ju sühmüh;
apinü I jing ju shihmüchi jing nangde kamshihchoh,
tüsho achangbo kheak inü jungshihchoh.
Aliu kihkhi khün-khungbenü: khün-huhrü kilim.
Currently Selected:
HABAKKUK 3: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.