ZEPHANIA 1
1
1Judarü Amon tsührü kiulongthsüpuh Josia nimungbo ching, Hezekia tsührü Amaria tsührü Gedalia tsührü Kushi tsührü Zephania kilim arükhi Atungpuh yu.
Atungpuh Mahkhap Nimung
2Inü alomi chingnü lüpdükhi shahde phüta bahbah, Atungpuhnü thachoh. 3Inü mihtsürübo tüsho shiwühbo phüta bahbah; inü thüning wuhnubo tüsho keto ngühbo phüta bahbah. Inü mihbukmuyuk jing mükheshihbah. Inü mihtsürübo alomi chingnü akheamshihbah, Atungpuhnü thachoh.
4Inü Juda tüsho Jirusalem ching larü alala azhihde I khah chungkihbah; tüsho inü ha dangpung chingnü Baal kingaünrü aningkhibo tüsho müzammüram amükinrü amükeamrü mungbo dükheakshihbah; 5sherünü thüyam kumung kheaknü chiningbo ki khukningcho; sherünü khukningcho tüsho Atungpuh ki thiyuchihchimcho, tüsho Molek thrünpuh mung ching she thiyuchihchimcho; 6sherü Atungpuh yankhi chingnü rholode, shepünü Atungpuh müyim yungsho api ki mükeokhide la.
7Atungpuh Thrünpuh miki zhikde laang! Tümüde Atungpuh nimung khah ki lah; Atungpuhnü shuhmülanga jihpü thsakhamlah; apinü api hanrübo jiyukdo. 8Tüsho Atungpuhnü shuhmülanga jihkhi nimung inü atorübo le kiulongthsüpuh tsührübo tüsho khiungkerü khimmih yihrü alala thsümüchibah. 9Ju nimung inü amükinrü nangde kingaünrü, sherünü arü putungrü yam athsümünim tüsho rük mütsünü mishihchonü arü thsümüchibah.
10 Atungpuhnü thachoh, ju nimung Thüngüh Ripit chingnü azhikhi khülang, kiuto dangpung aso chingnü mitripkhi tüsho awungbo chingnü akeamkhi düsheak ato sobah. 11Mortar ching larü tüzhochoh, tümüde shothsümolorü alala dükheakdo; shotoyinchi adünrü alala mülatsan.
12Ju kim ching inü tsünpungbo shuhbah Jirusalem yimbah, tüsho nihbuh kheak reangkeamrü tüsho mulongramrü mihtsürü thsümüchibah, sherünü arü mulong ching thacho, “Atungpuhnü atsü yungsho amütsü she mürhimo.” 13Arü lakhit yankhia lubah, tüsho arü yambo thsümünimbah. Arünü thüyambo thsüthsü she, arünü jurü ching müla; arünü kurungasolu thsüthsü she, arünü jurü chingnü yukhu muyung.
14 Atungpuh nimung ato thüninde lah, thüninde tüsho niokheamde arado; Atungpuh nimung düsheak ju akhüh lah, ju ching thirithsürünü tode zhichoh. 15Ju nimung ju mulong zhipzhip nimung, lümthsünü tüsho thsünü labah, athsümünim tüsho abahyukkhi nimung, amiting tüsho akhüpdokhi nimung, amo-khüpkhi tüsho kheahde amitingkhi nimung labah, 16chipi ayünkhi kiutobo tüsho amühit aheangpungbo azhihde hulipungpung mütkhi tüsho keochihde azhikhi nimung labah.
17Inü hadürü lümthsünü mihtsürübo kheak handarübah, junangde arübo müktukrü nangde atsahbah; tümütüsho arünü Atungpuh azhihde neak yihbeakkhinü, arü thiyih ke nangde abukkhitbah, tüsho arü shih müneanmuru mujung nangde alabah.
18 Atungpuh bukakhiuk nimung ching arü shotoyinchi yungsho sunanü arü mükhümkhitkhuk; api mükthsü mo ching alomiküp athrünkhi aniuabahbah, tümüde apinü alomi ching larü alala zukleangnü akheamshihbah.
Currently Selected:
ZEPHANIA 1: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.