ZEPHANIA 2
2
Mulong Müthripü Jikhi
1Rukhüh mukhungang, mukhungang, O machihkhi trükshih, 2hitsüt nangde nü yüna mutsoshihyikinü, Atungpuh mulong zhipzhip nü kheak marüyichokinü, Atungpuh bukakhiukkhi nimung nü kheak marüyichokinü! 3Atungpuh yimang, nüsa lomi ching azhihayihrü alala, sherünü api yukhümbo rhimocho; thiyuro-lungki yimang, azhihayih yimang; khükijua Atungpuh bukakhiuk nimung nü tsokhitbah.
Israel Mühi Trükshihbo Thsümütsü
4Tümüde Gaza ju abahyukbah, tüsho Askelon zhikabahbah; Ashdod mihtsürübo animuro yankhita bahbah. 5Ah, keyean larübo, nü Kerethrü trükshih! Atungpuh yunü nü azhihde lah, O Kanan, Filistia lomi; inü sheshe maningshihde nü dükheakshihbah. 6Tüsho nü, O kemungyean ju rimlopung kambah, namfimihnu neakrü ku alampung tüsho mihnu boto yambo kambah. 7Kemungyean ju Juda yamkhün aningkhi yamalo thsüde, ju kheak arünü mihnu boto yimkipbah, tüsho Ashkelon yambo ching arünü azhing ching yapbah. Tümüde Atungpuh arü Thrünpuhnü arü kümbah tüsho arü kuhibo jihlobah.
8Moabrü tüsho Amonrünü I mihtsürü mükthsüde arü lomi azhihde kükheangkhi inü sodo. 9Jumonü Wuto Atungpuh Israel Thrünpuhnü thachoh, I lale, Moab ju Sodom nangde tüsho Amonrü ju Gomorra nangde ayangbo tüsho thimi khün lakhi lomi kambah, tüsho lünnü thsümünima labah. I mihtsürü aningkhinü arü yankhia lubah tüsho I trükshih rhangdung larünü arü müküh-a lubah.
10Ha arü kükheangkhi müthri arü shihcham labah, tümütüsho arünü Wuto Atungpuh mihtsürü azhihde mükthsü tüsho kükheang. 11Atungpuh mihtrebe thsüde arü azhihbah; apinü lomi thrünpuhbo alala thsümünimbah, tüsho keyeanlobo tüsho kekung-lo trükshihbo alalanü nihbuh dangpung chingnü api ki kingaünbah.
12O Ethiopiarü, nüsa she I nukshangnü alaksahbah.
13Tüsho dukulim azhihde api khah chungkihbah, tüsho Asiria thsümünimbah; tüsho apinü Nineve ju azhikkhi, loshelo nangde abahkhi akung kamshihbah. 14Moshi, mihnu tüsho mütüm shiwüh lüpdükhi ju ching labah; loshelo lungru tüsho amüsükbe lungru dungjingku kheak labah; lungrunü ayinripit kheak khungbah, khüjaknü ripit-limro kheak khungbah; tümüde cedar sangnü arhimokhi ju aleangkheak labah. 15Ha lülüshishi tüsho tsüde lah dükhi kiuto, anihbenü tha, “ I lah tüsho sheshe müla!” Anihbe küdükhüh athsümünimkhi kamde, mütüm shiwüh yam lah! Anihbe tsahhorü abannü ish thsüchoh tüsho khahduthrung hitchoh.
Currently Selected:
ZEPHANIA 2: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.