ZEPHANIA 3
3
Jirusalem Neak tüsho Rhokhitkhi
1Ayokhe, athsümünimkhi, amüneankhi, junokhi kiuto! 2Hanü tümü düsheak mani; hanü athsülangkhi müleangkhi. Hanü Atungpuh kheak mükin; hanü nihbuh Thrünpuh kilim phünide müyü. 3Ju ching atorübo ju ahukkhi kekhüzübo lah; mahkhaprübo ju are tsahbe rimrebo, junangde yapsu khiungde tümü maningshih. 4Wukihrübo mükümkangkhi, müthülünkhi mihtsürübo lah; amükeamrübonü tümü amüsüh lanü ju müneando, arünü yakzan thsümünimdo. 5Ju ching lakhi Atungpuh ju thiyuro-lungki; apinü amülim mürhimo. Yapsu aban apinü mahkhapchoh, anipdokhün mülakphah; tüshe thiyuro mülakhinü achihbe tümü mümükheah.
6Inü trükshihbo phüta bahdo; arü chipibo athsümünim ching lah; inü arü kiudunglimrobo thsümünima lashihlah, junangde shenü jurü ching mütsahho; arü kiutobo ching mihtsürü mülade zhikabahshihdo. 7Inü tha, “Tsükjide kiutonü I trebah, hanü athsülangkhi lubah; inü arü ki thsangyukhi yumük küyimkishe mümih.” Tüshe arü rhimobo thsümünimpü arünü alü künde kam.
8Jumonü Atungpuhnü thachoh, inü thiyumütsan thsüde wusurüpü nimung aleangang. Tümüde inü apungkhikhi ju trükshihbo bemukhungpü, kiulongthsübo bemukhungpü, arü kheak I mulong zhipzhip tüsho bukakhiukkhi dungkihpü lah; tümüde I bukakhiukde mo trukhi ching alomi alala aniuabahbah.
9Ju kim ching inü mihtsürübo kilim atsangkhit yutha khülang jihbah, junangde arü alalanü Atungpuh mung jibah tüsho arihako khülangnü api tankihbah. 10Ethiopia ayungbo hode alakhi chingnü, I kingaünrübo inü hiumüzütshihrünü I kilim kingaün hande arübah. 11Ju nimung nünü I azhihde arhimokhi alala dünkheaknü nü achih müngü; tümüde inü nüsa bolungnü kükheangde asühachihrübo yihkhita bahbah, tüsho nüsanü kheaküa I yo amüsüh müzüng kheak lülüshishi müthsü. 12Tümüde inü nüsa bolung azhihayih tüsho akheamkhibe mihtsürü zojihbah. Arünü Atungpuh mung ching tsoyukpung yimbah– 13aningkhi Israel; arünü amülim tümü mürhimo, tüsho akeangyu mütha, yungsho arü mün ching mülapyukkhi mulo müngü. Judüki arünü mihnu boto yimkipbah, tüsho zuhyuka yapbah, tüsho shenü arü mütreshih.
Asühkhi Khün
14Achangnü khün thsang, O Zion mihtsürü,
ahoang, O Israel!
Asühachihang tüsho nü mulong alalanü asühang,
O Jirusalem!
15 Atungpuhnü nü azhihde mahkhap lude tsodo,
apinü nü riribo rholode tsoshihdo.
Israel kiulongthsüpuh, Atungpuhnü lung lah;
nünü kheaküa thsümütsü tümü mütre.
16Ju nimung Jirusalem ki ha thabah:
Dütre, O Zion;
nü khahbo dükheahkhishih.
17 Atungpuh , nü Thrünpuh, nüsa bolung lah,
Wuto Khülangnü nü khümkhitbah;
apinü nü kurungkheak asühbah,
apinü api muzho ching nü aso kamshihbah;
apinü nü kurungkheak asühde khün thsübah,
18thünio nimung nangde inü nü kheaknü thsümütsü hanakhinbah,
junangde nü achih mühan.
19Inü ju kim ching nü junorü alala ki rhimobah.
Tüsho inü jingkikrü khümkhitbah tüsho hiumüzüta larü bemukhungbah,
tüsho inü arü achih ngükhi ju mungshi müthrijihbah tüsho alomi alala ching mungthu labah.
20Ju kim ching inü nüsa bemukhungchoki nü thüyam lim bedarübah,
tümüde inü nü kuhibo jihlochoki,
nü alomi mihtsürü alala bolung mungthu tüsho mungshi kamshihbah,
Atungpuhnü thachoh.
Currently Selected:
ZEPHANIA 3: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.