HAGGAI 1
1
Arüngyam Thsülopü Atungpuhnü Thiyukhüm Jihkhi
1Darius kiulongthsü mahnepü kam khinu thuruk, atan ni wukihbuh Haggai hode Shealtiel tsührü, Juda kovünor Zerubbabel, tüsho Jehozadak tsührü, achangbe amükeambuh Jihusua kilim Atungpuh yu arü: 2Wuto Atungpuhnü ha thachoh: Atungpuhnü yam thsülopü kim marüyi de harü mihtsürünü thachoh. 3Judüki wukihbuh Haggai hode Atungpuh yu arü: 4Ha yam thsümünima lachoki, nüsa a thüyam atsübo ching lapü ha kim a de? 5Kheakü jumonü Wuto Atungpuhnü ha thachoh: Nüsa limrobo lümakheahang. 6Nüsanü hihde mükheando, tüshe nükde yimludo; nüsanü tsühchoh, tüshe küyimkishe nüsa bukmüthsü; nüsanü yungchoh, tüshe küyimkishe nüsa kethürimüri; nüsanü khim phuyuchoh, tüshe sheshe mülamlam, tüsho nüsanü mulomüthsükhi ju akhün bitkhi qiuqiu ching yukpü mulomüthsüchoh.
7Wuto Atungpuhnü ha thachoh: Nüsa limrobo lümakheahang. 8Müzüngbo ching wutuang tüsho sang hande arang tüsho thüyam thsüang, junangde inü ju ching asühbah tüsho wüntrebah, Atungpuhnü thachoh. 9Nüsanü ahihkhüh thsungkheak kheahdo, tüsho kheahang ha anikhüh arüdo; tüsho küyimki nüsanü ju thüyam lim hande arükheanü, inü müta tsoshih. Wuto Atungpuhnü thachoh, tümü thsükhea? Tümütüsho nüsa alala nihbuh yam ching athsümünim ching lah. 10Jumonü achanglim thüningbonü ayinke tukloshihdo, tüsho alominü amukhuhpü tuklodo. 11Tüsho lomi le müzüngbo kheak, hi kheak, yukhu aso, müdangke, alonü mukhuhshihkhi kheak, mihtsürü tüsho shiwühbo kheak, tüsho nüsa khah rhimo alala kheak kungshihpü inü ji.
Mihtsürünü Atungpuh Yukhüm Ani
12Judüki Shealtiel tsührü Zerubbabel, tüsho Jehozadak tsührü achangbe amükeambuh Jihusua, ju lung aningkhi mihtsürü alalanü Atungpuh arü Thrünpuh düsheak, tüsho Atungpuh arü Thrünpuhnü api thiyikhi nangde wukihbuh Haggai yubo ani; tüsho mihtsürübonü Atungpuh tre. 13Judüki Atungpuh yunithsürü Haggainü mihtsürübo ki Atungpuh yusheak asuk, I nüsa lung lah, Atungpuhnü thachoh. 14Tüsho Atungpuhnü Shealtiel tsührü, Juda kovünor Zerubbabel me, tüsho Jehozadak tsührü, achangbe amükeambuh Jihusua me, tüsho aningkhi mihtsürü alala me thurumusu; arünü arü tüsho arü Thrünpuh Wuto Atungpuh yam rhimomusu, 15kiulongthsüpuh Darius kam mahnepü, khinu thuruk nimung mukukheak phüyi nipü lakheah.
Currently Selected:
HAGGAI 1: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.