JOHAN 12

Jisu kheak Müdangke Mujujihkhi

(Mt 26.6-13; Mk 14.3-9)

1Judüki phungho-thünio müngüh nimung thuruk lachoki, shebah apinü arhang kamloshihbuh Lazar lapung Bethani ching Jisunü arü. 2Ju ching arünü api khilim are-jim thsakham; tüsho Marthanü ahiuhakhip, tüshe Lazar a dükhüm ki binrü lung lakheah. 3#Lk 7.37,38Judüki Marinü amo-chakkhi rhümthünea müdangke pungdüchi chamshakkhüh lubah Jisu jing kheak bukkihjih, tüsho anihbe kuyünü nanjih, tüsho müdangke rhümthüneakhinü thüyam mide kam. 4Jushu api jingyanrü bolung, khülang api yinatsühpü lakhi Simon tsührü Juda Iskariotnü tha, 5“Tümü thsükhi ha rhümthüneabe shotoyinchi nak 300 dün yinbah ju sho zhochihrü kilim müjihkhea?” 6Ha apinü zhochihrü lümrhihmonü athakhi yung, tüshe api ju ahührü tüsho sho qiuqiu lamonü ah; tüsho ju ching yukkhi apinü lude la. 7Judüki Jisunü tha, “Alibe langzü zojang; alibenü ha I mibah nimung thsungkheak zolah. 8Tümüde zhochihrü a nüsa lung kamruhroro lah, tüshe I a nüsa lung kamruhroro lapü yung.”

Lazar azhihde Rük Yimkhi

9Judüki Jihudarü ahihkhühnü api ju ching lakhi mükheah; tüsho arünü Jisu thsungkheaknü lang yung, tüshe apinü ashe chingnü arhang kamloshihkhi Lazar she akheahpü arükheah. 10Jumonü amükeam putungrübonü Lazar she asheshihpü lümkhi thsü, 11tümütüsho api dünkheaknü Jihudarü ahihkhüh tsoabah tüsho Jisu kheak kin.

Akuk Ngüde Yüzahkhi

(Mt 21.1-11; Mk 11.1-11; Lk 19.28-40)

12Ashidopü thünio ching arükhi yimto atonü küyimki Jisu ju Jirusalem lim arüde asokhea, 13ashisang khahbo lubah api shorupü wukhiuk, tüsho zhi, “Hosanna! Shepü Atungpuh mung ching arüchonü müngühmühi thsang! Israel kiulongthsüpuh Thrünpuhnü müngühshang!” 14Jisunü donki nunu ngübah ha thrüta lakhi nangde ju kheak bin:

15“Dütre, O Zion tsührübe;

kheahang, nü kiulongthsüpuh donki nunu kheak binbah arüchoh.”

16Akhuhlim api jingyanrübonü ha manikhit; tüshe küyimki Jisu müretahkheanü, api dünkheak harü thrütkhi tüsho api kheak ju dünjikhi arünü lümkhit. 17Jumonü apinü Lazar kiuyuk chingnü ajikhitchoki tüsho ashe chingnü api arhang kamloshihchoki api lung larü mihtsürünü thiyumütsan thsü. 18Ha dünkheaknü mihtsürübonü api shoru, tümütüsho apinü khinthiyinbe rhimodo de arünü so. 19Jumonü Pharisirünü arü bolung thaachih, “Nüsanü tümü müthsükhukkhi nüsanü ngülah. Kheahang, alominü api dunglim yüabahdo!”

Greekrünü Jisu Yimkhi

20Kheakü thünio ching kingaünpü aturü bolung Greekrü khürü lakheah. 21Judüki arünü Galilee ching lakhi Bethsaidarü Philip kilim arübah api ki keokhi, “Atobuh, isanü Jisu ngünelah.” 22Philipnü arübah Andria ki tha, tüsho jushu Andria le Philipnü Jisu ki tha. 23Tüshe Jisunü arü ki alo, “Mihtsürü Tsührü müretahpü thsüde kim arüdo. 24Atsütsü inü nüsa ki thachoh, wheat hi ju alo ching ayobah müshikhitsho, ju ruk lang lachoh; tüshe ju shikhitsho, junü hi ahihdo mukhuhshihchoh. 25#Mt 10.39; 16.25; Mk 8.35; Lk 9.24; 17.33Shepünü nihbuh rhangdung muzhochonü ju adükheakbah, tüsho shepünü ha lomi ching nihbuh rhangdung thraneanchonü ju lün rhangdung thsungkheak labah. 26Khürünü I tankihsho, apinü I dunglim yanshang; tüsho I küching labanü I tankihrü she ju ching labah. Khürünü I tankihsho, I Buhnü api wüntre jihbah.

Jisunü Api Shepü Thakhi

27“Kheakü I me küpkhuklah, tüsho inü tümü thaba? ‘Abuh, ha kim chingnü I khümkhitang’ de athaba shi? Tüshe ha thsungkheaknü I ha kim ching arükheah. 28Abuh, nü mung müretahang.” Judüki yinmi chingnü düsheak khülang arü, “Inü müretahdo tüsho kheaküshe müretahbah.” 29Jumonü ju ki zhipkhi mihtsürübonü ju sobah tsüngmukdo de tha. Püpürünü tha, “Yunirü khülangnü api ki asukdo.” 30Jisunü tha, “Ha düsheak ju I yungde nüsa thsungkheak ah. 31Kheakü ha lomi mahkhapkhi lah; kheakü ha lomi yakzanshuhrü yankhitbah. 32Tüsho alomi chingnü I bekihsho, mihtsürü alala I kilim bea lubah.” 33Api tümünü ashebanü ju amütsan apinü athakheah. 34Mihtsürübonü api ki alo, “Khrista lünnü alabuh de isanü yakzan chingnü sodo; Mihtsürü Tsührü abekihbah de küde thsah nünü thacho? Mihtsürü Tsührü ha she a?” 35Jisunü arü ki tha, “Nüsa lung ayin ju anükhüh ruhde lah. Nüsanü ayin lachoki tsahang, jude yungsho amitingnü nüsa yanphuhbah; shepü amiting ching tsahchonü külim yüchonü mümükheah. 36Nüsanü ayin lachoki ayin kheak kinang, junangde nüsa ju ayin tsührübo kambah.” Jisunü harü thabah chamachih, tüsho arü kheaknü jikabah.

Mihtsürübonü Mükinkhi

37Tüshe apinü arü miki khinthiyinbe ahihdo rhimomo she arünü api kheak mükin, 38junangde wukihrü Isaianü athakhi yu dünjipü lakheah:

“Atungpuh, shepünü isa yusheak kinkhea?

Tüsho shepü ki Atungpuh khah akhiuka huhkhea?”

39Jumonü arünü mükinkhuk, tümütüsho Isaianü kheaküshe tha:

40“Apinü arü mük tukshih tüsho arü mulong müküpshih,

jude yungsho arü mükbonü angübah tüsho mulongnü anikhitbah,

tüsho rholode arübah inü arü thsüngubah.”

41Harü Isaianü api müretah ngüchoki tüsho api dünkheak asukchoki thakheah. 42Judüalalashe yakzanshuhrü bolung ahihkhühnü api kheak kin, tüshe Pharisirübo dünkheaknü arünü api ki malokhi, jude yungsho sinagog chingnü ayankhitbah; 43tümüde arünü Thrünpuh mungshi kheaknü mihtsürü mungshi alü muzhodo.

Jisu Yu hode Mahkhap

44Judüki Jisunü zhide tha, “Shepünü I kheak kinchonü, I yungde I thiyibuh kheak kinchoh. 45Tüsho shepünü I ngüchonü I thiyibuh ngüchoh. 46I ju alomi ching ayinatrüm khülang nangde arü, junangde sherünü I kheak kinbanü amiting ching müla. 47Tüsho khürünü I yubo sobah I mükinsho, inü api mahmükhapchoh; tümüde I alomi mahkhappü yung tüshe alomi khümkhitpü arükheah. 48Shepünü I bahyukcho tüsho I yubo müleangkhichonü mahkhap khülang lah; inü athakhi yu hode akheam nimung api mahkhapbah. 49Tümüde inü I yo thiyukhüm-sühmühnü masuk; tüshe inü tümü thaba tüsho tümü asukbanü I thiyibuh I Buhnü I ki thiyukhüm jih. 50Tüsho api yukhüm ju akheam müla rhangdung de inü mükheahlah. Jumonü inü tümüpürü asukchonü I Buhnü I ki thakhi nangde asukchoh.”

Currently Selected:

JOHAN 12: YIMCBSI

Highlight

Copy