JOHAN 13

Jisunü Ajingyanrübo Jing Müsühjihkhi

1Kheakü phungho-thünio müngüh küyimki api kim arüdo de Jisunü amükheahkhea, alomi ching larü nihbuh yo muzhokhinü, apinü khide amuzho huh. 2Tüsho arelim yimtsühchoki api yinatsühshihpü Simon tsührü Juda Iskariot mulong ching amünean menü rük yukjih. 3Jisunü api khah ching Abuhnü lüpdükhi jihdo tüsho api Thrünpuh kilimnü arükheah tüsho Thrünpuh kilim yüchoh de mükheahbah, 4yimtsühpungnü wusu tüsho akhimmih yihkhia zobah khimnunu khülang rüma lu. 5Ju dunglim apinü müsühmüra-phuru ching ke yukbah api jingyanrübo jing müsühjihpü tüsho apinü arümkhi khimnununü ananjihpü tankih. 6Jushu apinü Simon Peter kilim arü. Tüsho Peternü api ki tha, “Atungpuh, nünü I jing müsühjihba de?” 7Jisunü api ki alojihde tha, “Inü tümü rhimochonü nünü kheakü manikhit, tüshe ha dunglim nünü amükheahbah.” 8Peternü api ki tha, “Nünü küyimkishe I jing mümüsüh!” Jisunü api ki alo, “Inü nü mümüsühjihsho, nü I lung shihcham müla.” 9Simon Peternü api ki tha, “Atungpuh, I jing lang yung, tüshe I khahbo le I ku she!” 10Jisunü api ki tha, “Shepü kemüyih-a lanü jingbo lang amüsühbah, api pang abümnü müsühlah; tüsho khülang kheak hode nüsa alala müsühlah.” 11Tümüde shepünü api yinatsühbanü apinü mükheahlah; jumonü apinü tha, “Nüsa alala a amüsüh yung.”

12 # Lk 22.27 Jumonü küyimki apinü arü jing müsühjihkheanü akhimmih lu tüsho binlobah arü ki tha, “Inü nüsa ki tümü rhimokheanü nüsanü mükheahla shi? 13Nüsanü I ki thsangyurü tüsho Atungpuh de jichoh, tüsho nüsanü dükde thachoh, tümüde I ju ruk ah. 14Junangde I nüsa Tungpuh tüsho Thsangyurünü nüsa jingbo müsühkheasho, nüsanü she khülangnü khülang jing müsühjihbeah. 15Tümüde inü nüsa ki rhimoa huhkhi nangde nüsanü arhimoshihpü nüsa ki amütsan khülang jihdo. 16#Mt 10.24; Lk 6.40; Jhn 15.20Atsütsü inü nüsa ki thachoh, yamlarü khülang ju api putungrü kheaknü atobe yung; yungsho shepü thiyia lanü api thiyibuh kheaknü atobe yung. 17Nüsanü harü mükheahde rhimosho nüsa asühpü. 18Inü nüsa alala dünkheak mütha. Inü shepü mokhitdünü inü mükheahlah; tüshe amüsühyu dünjibah, ‘Shepü I lung yikhap tsühchonü I azhihde api lahzhi shuhkihdo.’ 19Ju müdünjiyide inü nüsa ki thachoh, junangde küyimki ju dünjibanü, I api ah de nüsanü amükheahbah. 20#Mt 10.40; Mk 9.37; Lk 9.48; 10.16Atsütsü inü nüsa ki thachoh, shepünü inü athiyikhi leangkhichonü I leangkhichoh; tüsho shepünü I leangkhichonü I thiyibuh leangkhichoh.”

Jisunü Api Yinatsühpü Thakhi

(Mt 26.20-25; Mk 14.17-21; Lk 22.21-23)

21Küyimki Jisunü harü thakhea, api me ching küpkhuk, tüsho khipkhitde tha, “Atsütsü inü nüsa ki thachoh, nüsa khülangnü I yinatsühbah.” 22Judüki jingyanrübonü khülangnü khülang kheahachihbah apinü athakhi dünkheak lümshangmangde kam. 23Jingyanrü bolung khülang, Jisunü amuzhokhi Jisu ki binde alakheah. 24Jumonü apinü shepü dünkheak thachonü Simon Peternü api ki ajuh-a keoshih. 25Junangde apinü Jisu ki sühde yülibah tha, “Atungpuh, ju shepü a?” 26Jisunü alo, “Inü shepü ki yikhap kheam thsambah ajihbanü api ah.” Tüsho apinü yikhap ju thsambah Simon tsührü Juda Iskariot kilim jih. 27Kheakü yikhapkheam tsüh dunglim, api kheak amünean yüzah. Jisunü api ki tha, “Nünü tümü thsüpü lanü nahde rhimoang.” 28Tüshe apinü tümü amütsan anihbuh ki thakheanü dükhüm ki binrü shenü she mümükheah. 29Tümüde Juda ju sho qiuqiu lamonü thünio thsungkheak arü yihnüpü thulopü yungsho apinü tümükhüh zhochihrü kilim jihpü Jisunü api ki thakheah de khürünü lüm. 30Yikhapkheam leangkhia lubah apinü nahde wukhiuk. Tüsho ju are lakheah.

Thiyuzüng Aso

31Jumonü küyimki api wukhiukkhea, Jisunü tha, “Kheakü Mihtsürü Tsührü müretahdo, tüsho api kheak Thrünpuh müretahdo. 32Api kheak Thrünpuh müretahsho, Thrünpuhnü api kheak anihbuh müretahbah, tüsho nahde api müretahbah. 33#Jhn 7.34Azürü nunubo, I nüsa lung anükhüh ruhde alabah. Nüsanü I yimbah; tüsho inü Jihudarü ki, ‘I küching yüchonü nüsanü marükhuk,’ de athakhi nangde, kheakü inü nüsa ki thachoh. 34#Jhn 15.12,17; 1 Jn 3.23; 2 Jn 1.5Nüsa khülangnü khülang muzhoachihpü inü nüsa kilim thiyuzüng aso khülang jihchoh; inü nüsa muzhokhi nangde, nüsa she khülangnü khülang muzhoachihang. 35Nüsa khülangnü khülang muzhoachihsho, ha hode nüsa I jingyanrübo ah de alalanü amükheahbah.”

Peternü Malokhipü Thakhi

(Mt 26.31-35; Mk 14.27-31; Lk 22.31-34)

36Simon Peternü api ki tha, “Atungpuh, nü küching yücho?” Jisunü api ki alo, “I küching yüchonü nünü kheakü I müyankhuk, tüshe anükhüh dunglim nünü I yankhukbah.” 37Peternü api ki tha, “Atungpuh, tümü thsükhi kheakü inü nü müyankhukpü? Nü dünkheaknü inü I rhangdung jihbah.” 38Jisunü api ki alo, “I dünkheaknü nünü nü rhangdung jihba de? Atsütsü inü nü ki thachoh, nünü mahsam ki I malokhiyi khiungde thununü mukhung.

Currently Selected:

JOHAN 13: YIMCBSI

Highlight

Copy